الثقه ......وقصة الابتزاز
بسم الله وبه نستعين
تحياتي للجميع وعذري وأسفي من الاداره والزملاء الاعضاء لعدم تواجدي
الفتره الماضيه لظروف عمليه واسريه وكذلك اعتذر لجرأة الموضوع وحساسيته...
يقول الامام الشافعي "أسئ الظن فأن سوء الظن من حسن الفطن"
لمن نعطي الثقه وقت السفر والبعد عن الديار ؟
اراه بأنه لا يستحقها كائنا من كان وانت مغترب وبعيد عن ناسك
واليكم احبتي هالقصه الواقعيه:
قبل أيام عاد زميل لي عزيز من المغرب وهو في غاية السعاده
وكل جلساته يحكي عن المغرب وطيبة ناسه وسحره الفطري
ومن يومين تقابلنا مساء .. وبدت عليه الحسره وضيقة الصدر
واختفت الابتسامه المعهوده .
سألته وش اللي فيك متعكر مزاجك ووجهك معبس
قال جتني مشكله غير متوقعه وخلتني افقد تركيزي ولازم اعلمك نتشارك فيها
قلت له خير يالله عسى خير قول ولايهمك حبيبي
قال شفت الي احكيك عنها وانها قمة الادب والاخلاق وووو
سوت علي حركه غير طبيعيه
كنت انا وهي بالشقه ايام المغرب ووثقت فيها وكانت كامل اغراضي بغرفتي
جوازي وهواتفي وشنطي والجوالات وين مااروح هي معي
شافت جواز سفري ولا عطيت الموضوع اي اهتمام
وبعدين تاخذ الجوال وتقلب فيه وتشوف الصور وانا معها وتسألني عن الصور
واعلمها هذي فلانه وهذا فلان " عياله الصغار"
واحيانا وهي تقلب يدق احد وتعطيني الجوال واكلم وهي ساكته ...
واظهرت لي انها طيبه وقلبها طيب
ولما رجعت كانت تدق علي واكلمها ووو
وفجأه طلبتني حواله وانت عارف مستحيل ارسل لها اولادي وعيالي اولى
كررت والحت واعتذرت بلباقه وقفلت وصلتني رساله منها استشفيت منها انها تهديد
راجعت الذاكره وقلت معقوله لقطت جوال العيال ومن حسن حظي كنت بالبيت
غافلت العيال واخذت جوالها ومشيت ... ورديت ع رسالتها برد طبيعي جدا
وبعدين قالت انت بالبيت قلت لا والله انا برا قالت اوكي
وجوال زوجتي معي الا وهي تدق عليه طنشتها وقلت اشوف النهايه
كررت كذا مره مارديت وبعدين ارسلت رساله على جوالي انا
قالت تعرف هالرقم ..... رقم زوجتي رديت عليها وش المطلوب طيب
قالت عشرة الاف درهم تنرفزت ورديت عليها انتي ماتستحقين الثقه واللي اعطيتك
حرام فيك ووووو خلاص لا عاد تدقين علي مره ثانيه ماودي اسب واغلط
ردت علي هي طيب نشوف .
وارسلت رساله ع جوال زوجتي اللي هو معي اصلا
"انا من المغرب وزوجك ابو ... حبيبي
جلس معي اسبوعين وتوه راجع وماعاد رد علي واذا ماصدقتي اعطيني ايميلك وارسلك
صوري انا وياه "... مسكت الجوال واعطيتها برساله ايميلي الثاني "لاني ماتصورت معها ابد والله"
وقلت اشوف وش عندها للآخر
وفعلا ارسلت كلام كثير وبالتفصيل ووصفتني ووصفت كل شيء واسماء اولادي وكم فيلم يظهر صوتها وصورتها فيه وتظهر لي لقطات فيه مادري كيف جات وكلها من الثقه".
يالله وش ذا ياناس " حقيقه اي انسانه تدخل هيك مجال توقع منها اي شيء فهي باعت اغلى ماتملك وهو شرفها وشلون ماتبيعك انت"
الحقيقه ان زميلي طلع محظوظ ولما اخذ جوال زوجته طلع نبيه والا كان الله العالم وش صار
المهم كسر الشريحه حقت زوجته وغيرها رقم ثاني وكمان جهاز ثاني على ان جهازها ضاع
...انتهت القصه
بصراحه ترددت كثير في طرح الموضوع وخصوصا انه لربما يمثل حاله شاذه ومن هذا القبيل
ولكن قررت انزاله ليستفيد الجميع .
خلاصه " اغراضك الشخصيه "هواتف ومحفظه وجواز سفر "" ملكك انت وانت فقط لاتسمح لأحد
كائنا من كان بتفتيشها.
والثقه لا تعطيها شخص لايستحقها والشخص الذي لايقدر نفسه فحتما لا يقدرك .
تحياتي للجميع .