مرحبا بالمزاعيط و المزعوطات
اول شيء اتشرف بالانضمام الى هذا المنتدى الرائع بكيانه و اعضاءة كلهم بدون استثناء
صراحة انا لست من رواد المغرب و لكني تشرفت بالسفر لها و السهر في اجواءها المميزة و المنعشة التي تطربك و ترفعك فوق السحاب دون ركوب الطائرة
في هذا الموضوع راح اتحدث عن موقف محرج حصل لي في فندق بسمة كنزي في كازا
من هنا راح اقلب عامي..
السالفة و مافيها اني كنت جاي من المطار على طول على فندق بسمة كنزي في كازا..
سويت تشك ان و دخلت الغرفة..
الله يكرمكم كنت محتاج دورة المياه..
رحت الدورة و افتح الحنفية.. الصدمة.. ما فيه مويه..و افتح المروش .. برضوه ما فيه مويه.. و افتح كل شيء ممكن افتحه في الحمام.. حتى السخانه حاولت افتحها "قلب سباك الاخ" .. بس ما فيش فايدة..
طلعت و كلمت الاستقبال و قالوا مافيه مويه.. لكن راح ترجع بعد نص ساعة.. قلت الشكوى لله.. مالها الا نومه واذا صحيت يحلها الف حلال..
نمت نومة عمية من تعب السفر.. و قمت وسط نومي الا اشوف اثنين واقفين عند راسي كل واحد اطول من الثاني.. قلت يا ساتر اكيد هذا منكر ونكير.. قمت اتشهد و استغفر الله..
اشوي الا يكلمني يا اخي وش سويت.. فركت عيني عشان اشوف زين الا هم موظفين الفندق .. بدون مبالغة يمكن الطاقم كله داخل غرفتي.. قلت ياساتر وش المصيبة اللي سويتها..
قمت ما ني داري وش السالفة.. وقفت على رجولي..اول ما وقفت على رجولي عرفت الكارثة اللي سويتها..
اكثر موقف محرج تعرضت له في حياتي الموقف هذا..
وقفت على رجولي واشوف الارض كلها مويه..مش كذا وبس نص الدور اللي انا فيه غرق من الموية اللي خرجت من غرفتي..
طبعا السبب اني فتحت كل الحنفيات اللي بالحمام.. و نسيت ما اقفلها لان المويه كانت مقطوعة.. ومن تعب السفر نمت نومة اهل الكهف.. ولاحسيت بالمويه يوم رجعت.. و صار اللي صار..
صحيح اني جبت العيد بس الشهادة لله الفندق كان تعاملهم رااااائع وبدلوا لي الغرفة بدون اي رسوم اضافيه..
طبعا انا ما قدرت اكمل في الفندق من الاحراج.. وعلى طول اليوم الثاني سويت تشك اوت.. و على فندق فال انفا عين دياب الجميييل جدا..