عرض مشاركة واحدة
مغربية مغتربة

المشاركات: 4,880
تاريخ التسجيل: May 2011
الدولة: الجنة ان شاء الله
مغربية مغتربة غير متواجد حالياً  
قديم 2012-07-02, 03:38 PM
 
هذه انا مغربية مغتربة

حصري على منتديات مزاعيط ههههههههههه
من كتاباتي وتعريف قليلا عن نفسي
ياليت تنال عن اعجابكم والى ماعجباتكم عادي غي ماتقولوها ليا ههههههه

هذه أنا المغربية
نعم انا هي انا وغنبقى انا
مانسمح لحد يلعب بيا ولا يستهزئ بيا
ومانسمح يسيئ لا ختي
وغنضيف ايضا للتعريف بنفسي شكون انا
العزة دالنفس كتحكمني **
واللون الاسود سيد الالوان
الحياة لا تخلو من الصعاب ! ولكن تعلمت مانترك يداي المجاديف في مساء عاصف..
تعلمت عند الاشجار صبرها وتماسكها رغم قوة العواصف احيانا فهي ماكتكسرش
الذاكرة ديالي كنظن انها سليمة مافيها والو! بالرغم انها سريعة النسيان ولكن كتحتفظ ديما بالي ذكرني وجلس حدايا فالحظة اضعف ديالي ..
انا اجتماعية كنبغي الاصدقاء ومنهم الي كان وفي حتى لهاد الوقت
وفيهم ايضا لي مايعرفني الا وقت المصلحة ..
وفيهم تا لي بغى صداقتي باش يتباهى بها
ولكن تعلمت انو ملي يغدر بي شي صديق نبتسم حيت ضاف لي درس جديد نتعلمو
وفنفس الوقت كنحس بالحزن الصامت حيت خسرني وخسر محبتي وثقتي به
انا بحال النهر ماكينقطعش العطاء ديالو ابدا
وبحال البحر لي بغى يرمي فيه الاحزان ديالو
عزيز عليا نسمع لمشاكل ديال الناس ونواسيهم وننصحهم بالي نقدر عليه
ومن ديما معروف عليا كنز الاسرار بين صديقاتي
وانا بحال الصندوق مسدود بالساروت
والساروت رماوه باعماق المحيط مايقدر حد يلقاه
هذي هي انا ماكنخاف من الموت
ولكن كنخاف من فراق الاحبة
وفيه احبة اجبرتهم الظروف عن الابتعاد ومازلت ليومنا هذا اتذكرهم
نراجع شريط الذكرايات معهم
اضحك ملي نتفكر اللحظات لي دوزتها معهم
ونبكي ملي نرجع للواقع ونعرف انهم مشاو بلا رجعة

ديما كنضحك وانا كنضحك غي باش نخفي دموعي وحزني
اه كنضحك باش مايحس تا واحد بداكشي لي كاين فالداخل ديالي
وباش مايبان داك الآلم لي فقلبي
تيقولو عني حمقة هبيلة مكلخة ..
كنثيق فكلشي اي واحد قال لي شي حاجة كنثيقها
وتيقولو عني قوية وهناك الي يلقبني بالمرأة الحديدية
ولكن ماعارفين اني اضعف مخلوقة فهاد الدنيا
منين غتجيني القوة؟ انا ماتيبان ليا غي الضعف
حيت مانحمل حد يشوف دمعتي وخا يوصل بيا الآلم اعلى الدرجات
كنحاول نبين ديما ضحكتي ونخرج سناني برا
ولكن ملي نكون بوحدي كنبكي نبكي تا نطلع كلللشي داك البركان لي فالداخل

انا عزيز عليا المزاح بزاف كنضحك مع صحباتي ومع اقاريبي
حيت الكل كيفرح الى كنت في مجمع
هذي هي انا
عزيز عليا الشعر الامازيغي وكنشعر شعر امازيغي فالاعراس والمناسبات
شعر الحب شعر الفراق وشعر آلاحساس بالظلم
بالشعر كنعبر بداكشي لي كنحس به
كنخرج كلشي عن طريق الشعر
وبلا مايحس حد بتجريح ولا والو

كاع البنات وتا العيالات الكبار عزيز عليهم يجتمعو حولي فالمناسبات باش يسمعوني اش كنقول
وعزيز عليا شعر عن الام والاخوة حيت انا بعيدة عليهم بزاف
الناس كيعاونوني فالشعر وكيفرحو ظنا منهم اني كنغني بقلب فارح
ولكن انا كلي آآآآالم وحزن كيظنو ان الطيير يرقص من فرحا ولكن لا كيرقص من شدة الالم
هذه هي انا مغربية مغتربة
نتمنى تعجبكم كتاباتي : (233):
__________________
لو عرفت قدر نفسك عند الله ما أهنتها بالمعاصي
انما أبعدنا ابليس اذ لم يسجد لك وأنت في صلب أبيك
فوا عجبا كيف صالحته وتركتنا

ربي اغفر لي ذنبي فانه لا يغفر الذنوب الا انت


التعديل الأخير تم بواسطة مغربية مغتربة ; 2012-07-02 الساعة 03:43 PM
رد مع اقتباس