السلام عليكم
اول شي الحمدالله على سلامتي و السموحه اني تأخرت اكتب لكم التقرير
و حاب بشكل مبسط و اهم الاشياء اكتب لكم الصراحه ما صورت بذاك زود لانه من ابي اصور شي بحصل جنبي 3 اشخاص يقعدون يضايقوني (الشحاتين )وانا مب متعود على هاي الاجواء ..
عدد الاشخاص انا و صديقي
السعر التذكره 2950 ريال على خطوط جوية القطرية ( ترانزيت ساعة ف تونس ) 9 ساعات و نصف مدة الرحلة .
اول يوم حجزت ف كازا فندق نوفيتيل سيتي سنتر السعر 457 ريال على موقع بوكينغ
و مراكش شقة سلمى غرفتين و صاله و مطبخ و حمامين 1000 درهم = تقريبا 500 ريال
و تكلفة الرحله بحدود 13 ألف تقريبا
و نقول بسم الله نبتدي بتقرير بس ان شاء الله يعجبكم و أي استفسار انا حاضر لكم ..
وصلت كازا على ساعة 4و نصف تقريبا و خلصت من جمارك و تفاجأت انه لما اطلع من جمارك اول ناس يستقبلوني هم تكاسي كل واحد يحذفني على ثاني و كل واحد يقولي سعر و جاني شخص يقولي انه اخذ سياره للايجار على 350درهم يا بلاش اقوله يبه ما نبي اول شي ما اعرف قوانين المرور فالمغرب و اول سفره لي ما اقدر اغامر و اجر سياره و اتوهق وياه وين اروح ما ادل فندق ولا ادل مكان المهم عصبت عليه قلت له ماااااااااااااااااااااااا اابي اتركني ياخي و بعدها قالي خلاص روح خلك تكاسي يقصون عليك نرفزني من بداية دخولي الى مغرب ما اقول الا حسبيه الله و بعدها لما رحت للتكاسي الله يا عمري المغرب 8 طبوا على كل واحد يعطيني بسعر 500 درهم لين فندق و الي يقولي 400 و الي يقولي 350 درهم بالاخير اخترت شخص قالي على 300 درهم و وافقت على طول و رحت وياه لما وصلني الفندق طبعا يبي اكراميه و بعد ما وصلت الفندق قلت برتاح و تفاجات انه فندق 4 نجوم و خدماتهم زفت زفت زفت ما انصح اي شخص يسكن ف هاي فندق موظفة الاستقبال نفسيتها خايسه و اسلوبها اخس المهم قلت يمكن الغرفه بيكون اوكي طلع نفس وجهها مافي تكيف اتصل فيها اقول لها ابعثي شخص يشوف التكيف محد عبرني و لما قلت لها غيري لي غرفه اتقولي لا ابعث لك شخص يشووف مكيف طبعا محد جى و طول وقت نايم فالحر وانا على اعصابي و فيني هووشه ...
و ثاني يوم ن صباح و انا قلت بطلع شوفت لي تكسي كلمته علشان يوديني مراكش قالي على 1000 درهم قلت له اوكي مب مشكله هذاك كلم شخص ثاني يوديني لين مطار و بعدين شخص ثالث بياخذني لين مراكش و لما وصلني المراكش قالي السعر 1200 درهم قلت له الشخص قال لنا على الف قالي ايه بس احين ابي 1200 عاد انا حدي متنرفز ما عرفت شو اسوي و نفس وقت ابي افتك منه اعطيته ان شاء الله ما يتوفق .. و حصلت اخت ناديه اهي الي حجزت لي ف شقه سلمى وما قصرت و طيبة بخاطري ..
و تفاجأت انه ف مراكش نصب عيني عينك ف تكاسي من يعرفون انك خليجي يعني بنك السعر دبل .
و زرت اماكن سياحيه مثل اوريكا و ستي فاطمة
و سهرات رحت الديوان بس
و هاي المختصر المفيد الي قدرت اكتب لكم و اتمنى تستفيدون من اخطاءي
و اذا حابين تسألوني اي شي حاضر لكم
اخوكم
بوسعود