رد: اهداء الى الغالي مخيـــطووو
مايبرد واهج الشوق وشعور الهيام
غير سرداً تطوي البعد بالسرعه طوي
بديها من خلف ماهوب مثله من امام
مستوي في حال .. وبحال ماهو مستوي
خشمها عبرود طلقه .. وموخرها بهام
رافعه راعيه بأشارة ٍ ماتنغوي
لابدو دعاء السفر .. واعلنو ربط الحزام
ورشادات الامن لو ترتطم والا تهوي
واستلمها واحد ٍ خبرته عشرين عام
كبتن ٍ بالله وبكتابه إيمانه قوي
مسلم ٍ عنده خبر بالحلال وبالحرام
جابله ربي على الدين وسلوكه سوي
وصعدت مثل اشقر ٍ فوق جول الصيد حام
لمراوحها مع الجو لجه وحدوي
مثل مايدوي صدى صوت رعاد الغمام
صوتها صداه عبر الفضا يدوي دوي
صنعة اللي ماعرفوا لاصلاة ولاصيام
شعب ٍ أكثرهم ماهو عارف ٍ منهو ذوي
بالنهار لياتعلت كبر فرخ الحمام
دونها الاف المسافات تزويها زوي
وان تغطلس بينك وبين رؤيتها الظلام
كن في روس اجنحتها مشاهيب بدوي
دوبهم دكو عن دلاله الربع الحشام
تحتها من وقدة السمر جمر ٍ مجثوي
دايم وربعه على جلسة ٍ عنده حيام
ابلج ٍ لين جنابه لربعه وحموي
مالي الا هي .. لياجا للاشواق أحتدام
وقامت الذكرى على القلب تكويني كوي
لي شهر وشوي عيني محاربها المنام
ودي احضر جوازي وادورلي خوي (تياترو)
بيني وبينه مسافات وحدود ونظام
واحد ٍ فرقاه شاويتن فوادي شوي
بس ابا ازوره مثل مايزارون الكرام
لين عيني من قباله وشوفه ترتوي
لو بغيت اصبر .. واكابر .. واقول اني تمام
ذيب حبه بين جرد المحاديب يعوي
كان مالي في دروب الهوا شف ومرام
لين شفته .. واشهد انه هواة المهتوي
ياسلام الله على السلهمه والابتسام
وياسلام الله على اللي مابيله مطروي
كن مالله حط في منطقة خصره عظام
وكن غيره ماحتوى مثل ماهو محتوي
لاقعد ماوده يقوم .. ولياقام قام
تلوي اعناق البشر قومته يمه لوي
تقل بين اعلا الجسم واسفل الجسم انقسام
شي من جسمه مرتب وشي ٍ فوضوي
استلمني في جبروته اشر استلام
لين طيّح معنويات راس المعنوي
الغرام ليابطش فيك ملعون الرسام
مايعرف هذا قبيلي .. وهذاك خلوي
إهداء إلى اخوي تياترو واللي كتبته كثير في حقي وانت تستحق ان الشخص يصعد مراحل لكي يصل الى قامتك الشامخة تحياتي لك وللأخوة الاعضاء الذين ردوا وتستاهلون الطيب وعز الله انكم اخجلتوني .. عسى الله يوفقكم .
التعديل الأخير تم بواسطة مخيطووو ; 2013-01-06 الساعة 10:29 AM