توديع العزوبية للمرة الثانية (3 أيام في أكادير أغسطس 2013)

توحشتك بالزاف

مزعوط نشيط

المشاركات: 100

تاريخ التسجيل: Nov 2012

2013-10-03, 12:40 PM

الجزء الرابع
وأنا غارق في النوم تلقيت اتصال من صديقي على الساعة الواحدة ظهراً
يقولي شوي وجاينك بالطريق
قم أصحى وعبء شنطتك عشان نسافر كازا
سوى checkout لغرفنا الثلاث وانتظرنا بالرسبشن
أقوله : ليه أنتم وين ؟
يقولي : نجي ونشرح لك

ضبطت أموري وأنا أتسال وينهم هذول
بعد ما انتهيت من كل شيء الساعة قاربت على 2 الظهر والعيال لا حس ولا خبر
طيارتنا الساعه 7.30 المساء وحنا للحين بأغادير
باقي 5 ساعات عالطياره
أدق على العيال يقولون قربنا
صارت 2.15 شرفوا العيال الفندق
أركب السيارة لقيت الكنارى وصحباتها معاهم
أقولهم : ي عيال وش ذا الروقان والبرود
رحلتنا بعد 5 ساعات بس
يردون علي نوصل إن شاء الله ما عليك
خلينا نوصل البنات ونمشي
وأنا ي صبر الارض بعد بتوصلون البنات !!

وصلنا البنات ومسكنا الطريق طيران
طبعاً بديت أسال العيال وش صار ومتى طلعتوا ؟
قالي صاحبي الحبييب أنا ما نمت وجاني اتصال من الكنارى
وقالي ابي اشوفك قبل لا تسافر
ونفس الكلام صاحبة الكنارى كانت متفقه مع صحابي الثاني
رحنا فوق الجبل وأتمشينا بالقلعه
طبعاً حكو لي عن أشياء صارت في القلعة
ما قدرت أصدقها أو أبلعها للحين
ما علينا

نمت بالسيارة وفي عز سباتي بالطريق
صاحبي موقف على جنب
أقوله : وش السالفه ؟
يقولي لقطنا الردار وانا أمشي 190 كم
طبعاً جاء في بالي كلام الاعضاء بخصوص
رشوة المرور بمبلغ 400 درهم كحد أقصى أو خذ المخالفة
نزل صاحبي اللي يسوق وعطيناه كل ما معنا في حدود 300 درهم
وقلنا له أتصرف
جاءنا واحد من اللي واقفين مع الضابط وطلب دخان
من القمطة عطيته البكت كله
رجع صاحبي يقول أنزل أتفاهم معه
أنا ما أفهم كلامه المغربي بس ال 300 درهم ما عجبته
طبعا طلعوا ي عيال اللي معاكم
واحد من العيال معاه سعودي خمسميات بس
أخذت خمسمية ع 300 درهم الموجودة ورحت له
كان جالس بوسط السيارة المرور الفان بالخلف
شوية هدرة مغربية من هنا ومن هنا
انا على أعصابي الساعة 4 تقريبا وحنا ماوصلنا مراكش حتى
طبعاً بالبداية قفل الموضوع بوجهي
وقالي السيارة تنحجز وعليكم محاكمة القاضي يحكم فيها
وأتذكر واحد من العيال عنده نفس المشكلة بالبحرين
بسبب السرعة منعوا خروجه من البحرين
لين يراجع القاضي ويدفع الغرامة
بعد المحاولات فهمت انه يبي فلوس
عطيته الفلوس المغربية 300 تقريبا رفض
وقالي ما ينفعوما تكفيني لحالي
قلت له ما معي كاش ولا فيه صرافات قريبه
قالي دبر حالك
قلت له بروح لاصحابي وأرجعلك
وأروح أطالع في أخوياي شوي وأرجعله
وأعطيه 500 سعودي قلت له ممكن الحين نمشي
وتعطيني جواز خوي واستمارة السيارة
قالي طيب وأصحابي
قلت له هذا كل اللي معي
قالي أعطيني طيب الفلوس المغربية بعد
قلت له كذا ما يبقى معي شيء
قالي خلاص أعطيك مخالفة ونحجز السيارة
أاااه ي القهر
عطيته ومشينا

مشينا بسرعة السيارة القصوى
بصراحة اختيار الاسكودا كان خيار جيد
طبعا وحنا بالخط أتذكرت فلوس الطريق السيار 140 درهم
مافي ولا صراف بالطريق
بعد ما قلبنا جيوبنا فوق وتحت
لقى صاحبي 20 يورو
الحمدلله يارب
كمل الطريق بسرعة دخلنا مشارف كازا تقريباً على 6.00
باقي عالرحلة ساعة و 30 دقيقه
طبعا أتذكرت رحلتي الاخيرة من كازا
وأنتظاري للبوردنج مدة ساعة ونصف
المهم مع اللخمة طلع علينا رجل مرور على السير اللي نمشي فيه ويأشر يسار
اللي فهمناه إنه حول السير اليسار وأمشي
خصوصاً أنو اللي قدامنا سوى كذا
صاحبي اللي يسوق يقول كان يأشر لي وقف
طبعاً قلنا له أمشي مافي وقت بس
طبعاً اللي فهمناه إنه تحويل مسار
قبل لا نوصل كلمت حق مكتب الايجار
عشان يرسل واحد يستلم السيارة
باقي على الإقلاع ساعة
وصلنا مدخل المطار ويوقفنا شرطي
ويسحب استمارة ورخصة وجواز خوي اللي يسوق
ويقول وقف على جنب
الاعصاب هنا أنحرقت حرق
رحت للشرطي وأنا أقوله باقي ساعه ايش المشكلة
قالي انتظر رجل المرور اللي بنقطة المطار
أنتوا هربتوا منه
طبعا وقتها لخمه وربكه
كل اللي جاء في بالي وقتها متى بلقى رحلة بديلة
خصوصاً وإني كنت ناوي أجل الرحلة يومين إضافيه
بس التذكرة حقتي ما تتغير لانها بسعر رخيص

انتظرنا وجاء بعدها شرطي ونزل من التاكسي
أول ما نزل قام يصرخ علينا ويسب فينا
أخذ جواز خوي ورخصته واستمارة السيارة
قال أنا أوريكم أعلمكم كيف تحترمونا ي كلاب
بعدها قال ارجعوا معي النقطة اللي مشيتوا منها
ويستمر في السب واللعن
لدرجة إنه قام يسب أمي وأم خوي

واقفين وقتها محتارين نطالع فيه ونطالع ببعض
أنا بصراحة بديت أرتعش من القهر
وتفكيري لو أضربه وش بيصير
يعني اتزقق عشان فلوس بمشيها بس وصلت إنك تسب وتهدد
يعني لو بالسعودية وعسكري يقولي بمسح فيك الارض
بتضطر تلعب بملامح وجهه
بس بالمغرب وش بتسوي
أنا أعصابي وقتها بدأت تفرط قلت خلني أبعد عنه
صاحبي الحبييب نزل عليه برود أعصاب غريب عجيب
وبدأ يتكلم معه بهدوء وذاك العسكري يرد بوقاحه ما بعدها وقاحة
خوي من باب الادب يقوله الاسم الكريم أو أبو ايش عشان يتكلم معه
وذاك يحسب إنه خوي بيأخذ اسمه عشان يشتكي
ويرجع العسكري يسب ويلعن
خوي اللي كان يسوق وهو اول مرة يجي المغرب
يطالع فيني بنظرة معناها هذي المغرب اللي صجتنا عليها
أنا كنت اتوقع الموضوع ما راح ينحل بفلوس
لين جاني حق إيجار السيارة وقالي اعطيه فلوس وأرتاح
دخلت المطار بسرعة أبي اسحب فلوس
عشان ارميها بوجهه
وأنا مستعجل عند بوابة المطار يفتشني العسكري ويبغى إكرامية
انا نفسي أساله وقتها ، إكرامية ليه عشان فتشتني ؟
رحت أركض و أسحب فلوس
وأطلع من المطار ويوقفني العسكري اللي عند المخرج يبي إكرامية
تباً لكم
وأطلع من المطار ويتجمع علي كم واحد
يقولي بزبطك مع العسكري وزبطني
رجعت لقيت صاحبي يقول لا تسوي شيء
أتفق معه خوينا وبيجي يعطيه الفلوس
أنتظرت وجاء خوي وأعطاه 700 درهم جعلها سم بدمه
وحل الموضوع وأخذ الاوراق حقتنا
وسلمنا السيارة لمكتب الايجار بدون مشاكل
وبدون أي رسوم إضافية
كنت متخوف كثير من مكتب الايجار لكن طلعوا محترمين

دخلنا المطار نركض
ووقتها فكرة واحدة برأسي
ما راح أرجع المغرب مرة ثانية
صاحبي الحبييب بيطلع فوق على الصاله الجديدة رحلته عالسعودية
وأنا وصاحبي بنروح يمين على الصاله القديمة رحلتنا على المغربية
طبعاً وأنا أمشي أوسوس بنلحق الرحلة أو لا ؟
وصلت الكاونتر حق قص البوردنج لقيته فاضي
أتوقعت إنهم قفلوا الرحلة
وصلت و الحمدلله باقي وقت
قصت الموظفة البوردنج
واستقعدت على نص كيلو لشنطتي و400 جرام لشنطة خوي
الشنطة 23 كيلو بالضبط لا تزيد جرام واحد
خلصت البوردنج وتنفست الصعداء
أول مره أبي أطلع من المغرب
خلاص أبي أركب الطياره وبس
والفكرة الوحيدة اللي في بالي بعد المشكلة
ما راح أرجع المغرب مرة ثانية
طبعاً للأسف وقت المشكلة سحبت مبلغ 2000 درهم
لكن بما أن صاحبي حلها تبقى لدي المبلغ
قبل الدخول تذكرت قرف العسكر بمكانين
المكان الأول
الكاونتر اللي يسأل عن المبالغ المغربية التي يتم إخراجها
مكانه بعد تجاوز التفتيش الاول وقبل ختم الجوازات
ولو معك فلوس يطلبون تعبئة أوراق لإعطائك تصريح بإخراج الاموال المغربية
يعني يتعبونك ويغثونك عشان تقولهم بالنهاية خذوها و صافي
المكان الثاني
نفس الكلام التفتيش الاخير اللي بعد الجوازات
يقعد يمحص أغراضك محفظتك لين يأخذ الفلوس
فكرت إني أحط الفلوس بشراب الحذاء وأفتك من القرف
طبعاً وأنا أفكر أسوي ذا الشيء
قلت للمرحلة ذي وصلت القمطة !!!
يعني حسيت وقتها بعد مشكلة العسكري وقمطتي على الفلوس
إني معتقل مو مسافر للسياحة والراحة
وإني حمار لو رجعت البلد هذي

المهم عديت التفتيش الاول والكاونتر
وبعدها الجوازات وبعدها التفتيش الاخير
ونفس السيناريو المتوقع حصل معي من ثقالة الدم والقرف
بس الحمدلله ولا درهم أخذوا
أول ما عديت منهم وانا متوجه عالطيارة
تزداد فكرة ما راح أرجع المغرب مرة ثانية إصرار
تأخرت الرحلة كالعادة
جميع المسافرون مبتسمون وأنا وخوي قافلين

اتصال خوي الحبييب وقالي انه وصل البوابة و بيركب الباص
طبعاً أول ماركبت الطيارة أرتحت
أخيراً بطلع من المغرب
طبعاً الطيارة لحسن الحظ طلعت طيارة برتغالية من الطراز الكبير
أستاجرتها الخطوط المغربية لبعض الرحلات
يعني حمدلله الطيارة بتكون مريحة

أخيراً بنام وأرتاح
والجميل مكاني منفصل عن خوي وبعيد عنه
لاني حسيت وقتها إني بنطق منه
أقلعت الرحلة وأنا أطالع من الشباك
وأتذكر الأشياء الحلوة وابتسم
و يجي في بالي العسكري ويخرب مزاجي
نمت وغبت في سبات عميق
فجأة اللي جنبي يصحيني عشان الأكل
طبعاً الرجال يحب السواليف من أول ما ركبنا يسولف
وأنا أعطيته وضعية الميت ونمت
قعدنا نسولف وأقوله وش رأيك في المغرب ؟
ويمدح بالمغرب ويشكر ويقول ما راح أسافر غير المغرب
يقولي : وأنت؟
قلت له : أخر مرة أجي المغرب ان شاء الله
طالع فيني باستغراب وطارت عيونه
قلت له اللي حصل باختصار
وقلت له على موضوع التفتيش وزرف الفلوس
قالي : صدقت أنا راحت علي 500 درهم بعد تقليبي من شرطة المطار

عقدنا مقارنات بين المغرب وأي دولة أخرى
شبيحة النظام من الشرطة والجوازات يكرهونك حياتك
المتعة في التجول بالأماكن العامة مفقودة
لان طول الوقت بتقعد شايل هم الشحاتين أو السرقة
نظرة الناس أصبحت غريبة للسائح الخليجي
بالنسبة لهم أنك بنك متحرك لازم تمشي وتوزع فوق وتحت ويمين ويسار
وإذا أنت زرت الأماكن السياحية في المغرب ماهو الداعي لزيارتها مرة أخرى
تبي تتفرج على قلعة أو شلال أو قمة جبل أو شاطىء نظيف
أو إنك بترجع المغرب من أجل "شعبها"
اتفقنا بالأخير أنك تستطيع الذهاب إلى دبي أو فرنسا أو اسبانيا
وتعيد ذكرياتك بالمغرب بدون أي دوشة أو وجع رأس
تعيش الحرية ع أصولها وتكسب راحه نفسية لا مثيل لها
ربما البعض يتسغرب مما أكتبه
لكن أنا أنقل لكم مشاعري وقتها وأفكاري
و فكرة ما راح أرجع المغرب مرة ثانية ستصبح شعاري

وصلت جدة مطار الحجاج
وتبقى لدي رحلة للرياض من مطار جدة الثاني
العسكر طقطقه عليك
يسأل : من وين جاي ؟
أجاوبه : من المغرب
يعطيك النظرة اللي أنا فهمتكوا
وانواع التعليقات الغبية
لقيت مغربية جايه معنا بالطيارة
رجعوها من كاونتر الجوازات وتحقيق عن كل شيء
فكرت والله عسكرنا مو بعيدين عن المغرب
كل واحد يبحث عن اللي يبيه

خلصت أموري من الجوازات
رحت أبي أحاول الفلوس المغربية من بنك الراجحي
طبعاً أنا في ديرتي والوضع أمان مافي زرف
مو زي المغرب هذا ما كنت اعتقده
أعطيته 2000 درهم وحولي الفلوس وأعطاني إياها 660 ريال
من غير إيصال صرف أو طلب بطاقة الأحوال
من التعب ما دققت كثير
طلع موظف الراجحي نصاب كبير
طلعت من المطار
ويتجمعون علي الكداده كأني في مطار كازا
والسعر من مطار الحجاج للمطار العادي 100 ريال
طبعا مافي شيء اسمه عداد يقولون
بعد المكاسر رحت بي 60 ريال
والمشوار كله على بعضه 10 دقائق

بعد ماجلست بالطيارة اللي رايحين منها على الرياض
قعدت أفكر وأقلب المواقف برأسي
قارنتها بينها وبين المغرب
موقف العسكري مع المغربية
موقف موظف بنك الراجحي
موقف أصحاب التكاسي
لقيت إننا مثلهم وأردى شوي

بنهاية تقريري رغبت أن أنقل لكم تجربتي الشخصيه
مع إنها غير مليئة بالمعلومات السياحية
ولكني مقتنع بأن أحدكم سيستفيد مما حصل لي
ربما لو تسألني الان هل ستذهب إلى المغرب ؟
سأقول لك طبعا سأذهب
وصافي

__________________

https://www.mza3et.com/morocco15822.html
سفرة توديع العزوبية أكادير - مراكش - كازابلانكا

سفرة توديع العزوبية 2
https://www.mza3et.com/morocco19885.html