كازا تطلع منها وتمسك السيار الي الشمال ,, حتى تصل الي لوحة العرايش , تاخذ يمين وتمر على الاداء وتدفع فلوسك وبعد الاداء يجيك دوار , خذ معه يسار , فيه اثنين بتلقاهم على الدوار اعبطهم ولاتفكر فيهم وهذي على مسئوليتي لمن خذيت يسار ادعس ع طوووووووووووووووووووووووو وووووووووووووووووول مع المدينه الصغنونه لايسار ولا يمين ولما تدخل وسطها وتعدي اول اشاره طالع من بعدها مدري الثاني او الثالثه تجيك لوحة يمين مكتوب ليكسوس الاثري او وادي ليكسوس خذ معه يمين ثم يسار وادعس بتلقى نفسك طلعت من العرايش ومقبل على وادي مثل النهر امش واقطعه ان كان ودك بالمكان الاثري والتاريخي شوفه قدامك على اليسار مثل الهضبه عنده اشجار كثيره ولوحته عندها ترا مافيه مرشد الا واحد شايب واذا قالو لك راح مع قروب انس انك تنتظره يبي له ساعه
الموهم خلصت من ليكسوس كمل مع دربك متجه لـ اصيله تمر قبلها على مناظر حلوة ع الطريق تفتح النفس وتحمس على الجولات الحلوة اللي مثل هذي , بتجيك خميس الساحل بتقطعها في دقيقتين من غير اشارات , ادعس لين يجيك لوحة اصيله عند دوار يمينك السيار وسيده اصيله امش اصيله وادخلها واتجه على المدينه القديمه وروح عند البحر ( بجانب البوابه اللي على البحر ) ولبق موترك وادخل داخلها وعندك حوالي 40 دقيقه تقضيها في المدينه القديمه تفرها فر على رجولك حتى توصل للي يطلعك على البحر واشرب اتاي واستمتع 5 دقايق بوقت استراحه ثم دحدر منه على موترك واطلع ولك الخيار وقتها تمشي مع الوطني للي متجه لطنجه ( ماجربته الي الان بس يمدحونه ) او تطلع على السيار وتدعس لين تدخل طنجه ,,
ترا المشوار هذا تقدر تسويه اذا طلعت قبل 10 او 10 حكم من كازا ,,,, الموهم تدخل طنجه وعلى طول نيشان على الكورنيش لان هناك السكن وكل شي تبيه
الجهه اليمنى والاخيره من الكورنيش عندك فندق سيزر + موفنبيك + طاررق , اليسرى عندك رمادا وفنادق صغار والفله كلها , ترا المشوار من موفنبيك الي الميناء بعد رمادا مايجي 4 دقايق بالسياره , ريح في طنجه 2-3 ايام , بعدها تطلع لـ تطوان من الطريق اللي بوصفك الحين :
تروح كأنك تبي موفنبيك ثم تتعداه وهو يسارك بعده بحوالي كيلو الطريق بياخذك يسار وتلقى حرف تي خذ يسار وتدعس وبتمر على منار بارك وكاب مالبطا كمل دربك ولكن انتبه من السرعه الزايده تقيد بالانظمه وادعس تمر على ميناء طنجه الجديد بعده يجيك القصر الصغير هناك يجيك مطعمين يمينك وقف اذا حاب تتغدى واطلع الدور اللي فوق عند اخر مطعم يمينك خلص وع طول تمسك خططك ترا بعد المطعم اجباري تاخذ يسار وقريب منك السيار اللي يودي لتطوان بس طنشه لاني بخليلك تمر ع سبته , الموهيم تدعس بعد القصر الصغير بحوالي 15-25 كيلو فوق الهضبه فيه تفتيش جمرك مع درك حبوبين واجباري بيوقفونك بس ماعليك اخسرهم وكلمتين حلوة وتمشي تكمل وبعدها تلقى دوار قدامك يسار مخرج سبته المحتله الله يردها للمسلمين ويمين الدرب للمضيق والفنيدق تكمل معه على طول تتعداهم تجيك كابو نيقرو لاتفوتها وقف فيها وفرفر تراك وصلت لتطوان خلاص تمش في كابو وشوف المنتجعات واطلع منها متجه لمارتيل بعد كابو نيقرو تمشي سيده تجيك اشاره حسب ما اذكر اخذ يسار وسيده وبعدها اجباري تاخذ يمين احفظ الوصف وتلقى ع يمينك عماير ويسارك البحر هذا كورنيش مارتيل امش سيده بعدها على اليمين 15 دقيقه تجيك تطوان هناك اختر وين ماتبي من السكن في المدينه القديمه او اقرب فندق ,
نام بتطوان ليله وقض وقتك تمشيه فيها وبعدها تصحى الصبح ويكون هذا يومك الرابع والاتجاه على شفشاون..شفشاون من تطوان حوالي 60 كيلو تقطعها في ساعه بس انتبه ثم انتبه على السرعه ولو لقيت لوحه تقول هدي السرعه هدي لاتكابر الطريق وعر شوي بس يحبه قلبك , بعدها توصل شفشاون وهناك لازم المبيت اقل شي يوم وانا انصح بيومين , السكن في رياض حسن او فرعه او فندق نسيت اسمه هو الوحيد وعنده توقف سيارتك لازم شفشاون تقضي وقتك تمشيه ع رجولك تلبق السياره عند الفندق وتدخل من باب المخزن على ساحة اوطا حمام ,,,
بعد شفشاون وماتقضي يوم فيها او يومين تطلع متجه على وزان <= ركز ومن وزان تمسك الخط متجه على فاس افران ومكناس هذي يبي لها 3 ايام انصح بالمرور اولا على فاس والمبيت فيها في فندق ايبس جنب محطة القطار وتتمشى في المدينه القديمه وثاني يوم تصحى تدعس منها متجى على افران اللوحات هناك سهله عندك قبل افران ضاية عوا ( بحيره ) ولما تقبل على افران يجي يمينك الجامعه الاخوين وجبل مشلفن وعين تغسالين ووسط المدينه الصغنوني ,,, تخلص منها خلال ساعتين الي 3 بالكثير ,,, تتجه ناحية الحاجب - مكناس , على مدخل مكناس يجيك بوفكران مشاوي انصحك بعدم تجربتها , تدخل مكناس وهناك تبي تسكن في المدينه القديمه بالرياض يعقوب اذا ماني بغلطان او الحمريه فيها فندق الريف وعبر المحيط وايبيس على منتصف المدينه جنب ماكدو او الزاكي في مكناس عندك ساحة الهديم في المدينه القديمه والاسواق الشعبيه والمتحف ومقابلها باب المنصور وخلفه القصر الملكي وحبس قاره والمحكمه وقبة السفراء وقبر مؤسس المغرب مولاي اسماعيل ,
بعد مكناس نكون كذا خلصنا 8 ايام تقدر تمد في اي وحده من المدن اللي اعجبتك او تقدر تختصرها وتكسب ايام تقدر تحط مدن اخرى اذا في راسك حب ما انطحن من الفرفره,,,
تطلع من مكناس وتمسك السيار المتجه على الرباط كازا مراكش ,,, اذا معك ايام اكثر انصحك تدعس وتتعدى كازا وتتجه ازمور وتشوف المدينه القديمه وبعده منتجع مزقان بيتش وتختمها في الجديده وتبات فيها والفنادق حقتها على مدخل المدينه اذا انت جايها من طريق مزقان وازمور ,,, الجديده فيها الحي البرتغالي مايفوت بعد الجديده تقدر تطلع ناحية مراكش مع طريق وطني او ترجع على الطريق السريع من كازا 90 كيلو تخلصه في 45 دقيقه ومن هناك تدعس على مراكش وهناك انت عارف ويش تبي ,,,, او تكمل من الجديده على اسفي ثم الصويره ثم تنزل متجه اغادير