تكملة رحلتي والنقاط الهامة :
* الأمتعة ( العفش ) :
كانت الرحلة من الرياض الى كازا ومن ثم مراكش .. وصلنا للكونتر اللي في الرياض وقص لنا البوردنغ لكازا ولمراكش .. قلنا نبى نأخذ الشنط في كازا .. قال أطلبها منهم وراح يعطونك .
المهم وصلنا كازا طلبنا الشنط قالوا مانقدر نعطيكم أنتم رحلتكم إلى مراكش .. طيب يا جماعة الخير حنا أصحاب الشنط ونحتاجها .. قالوا لا تاخذونها من مراكش قلنا اوكي .. وصلنا مراكش .. ننتظر الشنط قالوا الشنط في كازا ماوصلت .. يا جماعة الخير ما يصير هذا الكلام .. قالوا ما وصلنا شي والشنط بكازا ..
كتبنا شكوى عند مسئول الأمتعة بعدم وصول الشنط .. قلت لصاحبي نروح نستلم السكن ونشوف .. استلمنا السكن ( له حديث خاص ). جلسنا بدون شنط .. واستلمنا السيارة من ( شيخة المزيونات ) قلت نروح كازا كلها 250 كيلو .. قال اوكي .. وصلنا كازا بالسيارة .. قالوا وحده من الشنط وصلت مراكش .. قلنا الحمد لله .. طيب الشنطة الثانية .. قالوا ماوصلت ويمكن تكون في الرياض .
طبعا سلمناهم الشكوى وقلنا مستحيل وهذه أوراق الشنط .. المهم بحثنا عن الشنط بأنفسنا ماوجدنا شي .
قلنا خلاص نروح مراكش والله يعوض علينا .. طبعا الشنط اللي وصلت مراكش هي شنطتي هههه وشنطة صاحبي ماوصلت .
رجعنا مطار مراكش واستلمت الشنطة .. وقلنا نروح السكن نرتاح وبكره نشتري ملابس لصديقي .
كنا جالسين بقهوة قصر النخيل .. وجانا اتصال من مطار مراكش على الساعة الثانية الفجر بوصول الشنطة .. ومن الفرحة .. نسينا نأخذ الجوزات ..وصلنا المطار .. وقالوا لنا لازم الجوزات .. قلنا يا جماعة الخير كنا عندكم وتعبنا مانمنا ونحن نبحث عن الشنطة .. المهم تعاطف معنا المسئول وقال استلم الشنطة .. كأننا أخذنا مليون ريال من الفرحة ههههههه .

خلاصة الأمتعة ( الشنط ) :
* كثير من الأشخاص يفقدون شنطهم وهذا فقط في الخطوط المغربيه .

* الشنط نصيحة استلمها من مطار كازا حتى لو كان عندك رحلة داخلية إلى مدينه ثانية .

* اتخذ الإجراءات الرسمية بتقديم شكوى رسمية لمسئول المطار حتى يتم الاهتمام بالموضوع أكثر .

* نشكر المسئول الموجود بمطار مراكش على اهتمامه وتواصله معنا

* هذا بخصوص الأمتعة .. والتكلمة مع السكن في وقت لاحق ان شاء الله .

تقبلوا تحياتي .