مسافر وحيد والقلب حديد

ehaab

مزعوط نشيط

المشاركات: 84

تاريخ التسجيل: Jan 2015

الدولة: الرياض

العمر: 44

2015-05-08, 12:42 AM

الحلقة الثانية : مسافر وحيد والقلب حديد

الحلقة الثانية

قبل ما ابدء بسرد قصة رحلتي للمعشوقه أود التوضيح بأن هذه الرحلة كانت سنة 2013م نعم متأخر واجد للاسف اعتذر للكل ، لكن قررت بأن اسردها حتى يستفيد الاخرون من هذه التجربه، وفي ملاحظة ما عرفت ارفع الصور عشان ارفقها بالتقرير

.

نبدء : قبل السفر بأيام وصلني ايميل من أجنحة البستان الفندقية في كازا يشكرني على اختياري لهم ويسعدهم خدمتي وهل يوجد اي استفسار او طلب حتى تكون اقامتي سعيدة عندهم، انا كبر راسي

وقلت حلو خلني اطلب منهم يرسلون لي سواق يستقبلني في المطار ارسلت لهم موعد الوصول ورقم الرحلة ، وسبب طلب السواق لاني تخيلت من كلام وتجارب الاعضاء بان سواقيين التكاسي (طاكسي) صح كذا، ،، المهم بانه السواقيين لعند المطار دوشه وراعين مشاكل

.
فجر يوم الاربعاء تاريخ 16 اكتوبر الموافق 11 ذو الحجه ثاني ايام عيد الاضحى المبارك انها الساعة الرابعة بسرعة ترويشه واطلع ادور ليموزين سحبته للبيت :
- أنا : تعال صديق ودي مطار كم ؟؟؟
- محمد أنور (سائق الليموزين) : 100 ريال "بلهجه باكستانية"
- أنا : ايش لا يا أخي 70 زين ؟؟؟ خلك كريم يا شيخ عشان بركة الفجر يله.
- محمد أنور : اوكي توكلنا على الله.
وانطلقنا للمطار وبلغت السائق انه يسرع شوي عشان ما اتاخر لازم اكون هناك قبل الساعة 6 ، تعرفت على الشيخ محمد أنور واحنا بالطريق سوالف وعطاني رقم جواله وقال
- محمد أنور : اذا انت يروح مره تاني (وليس ثاني) مطار كلم انا

.
الا انا واصل للمطار كان لسه حتى الشمس ما شعشعت ، وادور كاونتر الخطوط الخاصه بالمغرب وادور وادور انلقب راسي وين الكوتنر

واغلبها ما في موظفيين وين الشباب والمطار شبه فاضي لانه ثاني ايام العيد والساعة خمسه وربع حرام والله حرام ، اطالع يساري الا اشوف شاشه مكتوب عليها "الدارالبيضاء" واخذ نفس عميق وزفير بتنهيده "اووووووووه"

وتوه الموظف يستلم تفضل هذا الجواز وهذي نسخة من التذكرة والشنطة على السير ، وشوي الا اسمع كلمة " تفضل توصل بالسلامة" الله يسلمك توصي شي من هناك (مسوي كريم) واهرول الى الجوازات

تفضل واحط اصابعي على الجهاز ما باقي الا احط اصابع رجلي واطلع للتفتيش وامر من اجهزة الاسكانير تمام كلوا تمام وفي خاطري اغني "مع السلامه بيباي بالانجليزي GoodBay " ...

وامر على د.كيف :
- انا : صديق ون كابشينوا ويذ هيزل نت ، الترجمه ( يا صديقي واحد قهوة ايطاليه مخفوقه مع الحليب واضف عليه نكهة البندق).
- عامل د.كيف : اوكي سير
وانا انتظر رحلتي وامزز القهوة

عند باب الطيارة واخذ لها صورة للذكره ، شوى الا شوف شي صغير اخضر طاير جمبي يصقع في باب دخول ممر الطائرة الا هو رجال اخذ منه الدهر عتيا ، لابس بدلة رسمية لونها اخضر ويتلفت ويسألني:
- متى يفتحون الباب
- قلت : لسه على سته وربع
وانا اطلعه من فوق لتحت وجالس اتخيل شكلي بعمره ومستغرب من لهفته واسال نفسي هل راح اكون مثله يوم من الايام

،،، الا فاتحيين الباب واسمع "الدارالبيضاء" كنت من اوائل من دخلوا الطيارة ورحت لمقعدي مختار المقعد من يوم حاجز التذكرة عند الشباك ، ما هي الا دقايق الا اشوف مقفلين الباب وش السالفه خلاص الطيارة لسه نصها او اكثر فاضيه ونقلع من الرياض بالوقت المحدد حلو يعطيهم العافية الخطوط وانا اقول وين لاسمع واقرء عنه انها اسوء خطوط بالمواعيد وغيرها

، الا شوف بالشاشه لامامي "الوقت المتوقع وصوله لجدة" ايش

؟؟؟؟ وانزع السماعات واكلم المضيفه:
- انا : لو سمحتي.
- المضيفه : تفضل.
- انا : الرحلة مو مباشرة للدارالبيضاء ، بالتذكرة ما هو مذكور انها ترانزيت ، زي العودة ؟؟؟
- المضيفه : لا استاذ راح نهبط نغير فقط الطاقم عشردقايق ربع ساعه بالكثير وتكملون الرحلة.
- انا : اوكي مشكوره .
وفعلا هبطنا بجدة واشوف ملعب الجوهرة ، اوكي ما عليه حلو استفدنا شئ اني اشوف معلب الملك عبدالله على الاقل من بعيد (قبل افتتاح الملعب) ، وفتح الباب نزل الكابتن والطاقم ، شوي الا داخل فريق صيانة ونظافة وخدمات فنية وش السالفه بعدها اشوف باص يوقف وينزل منه طاقم جديد كويس مثل ما قالت المضيفه، استعجلت بالحكم جلسنا بارض المطار الملك عبدالعزيز اكثر من ساعة عارفين ليش ....

في تركيب مسافرين من جدة الاماكن الفاضيه امتلت على بكرة ابيها ، واقلعنا الشي الايجابي ان الشاشه كانت تشتغل بشكل جيد شفت كم فلم ، والغريب اننا وصلنا على الموعد شكله الطيار داعس هههه ، طبعا وزعوا علينا كروت دخول لمملكة المغرب وكتبة كل شئ صحيح الا الوظيفه خفت اكتب اداري مشاريع يلزقون فيني حقين الجوازات والجمارك قلت اكتب معلم احسن ، الشيء العجيب يوم هبطنا في مطار محمد الخامس الكل قام يصفق ويهلهل وش السالفه قلت اصفق

معهم واشوف الابتسامات العرضيه تجتاح جميع الركاب . وانزل من الطائرة وعلى الجوازات وادور طابور كله اوروبيين امشي وراهم (حسب نصيحة شباب المنتدى) وبعد انتظار جاء دوري :
- انا : تفضل .
- موظف الجوازات : سعودي.
- انا : نعم .
- الموظف : ليش تمشي مع الاوروبيين
- انا : اول مره ازور المغرب وما اعرف النظام
- الموظف : سير خيي
- انا : شكرا
وانزل لمكان استلام الشنط انتظر شنطتي وبعد انتظار اتت المحروسه هههه ، واسحبها وادز طاير ادور الباب الخروج الجمارك ما كلمني ولا سلام حتى ، فراقكم عيد ههه حسب ما اسمع من الشباب ههه واطلع ادور اسمي ، طبعا كنت متخيل انه نفس وضع دبي موظفة

فندق تستقبلك وتاخذك لسيارة حديثة اخر موديل ، لا بنت و لا سيارة طلع سواق طاكسي يتعامل معه الفندق بس الامانة الرجل محترم وسيارته نظيفه طبعا استذانته باني اروح اصرف فلوس وراجع ما في دقايق الا طالع من المطار ومتجه لعين الدياب الطريق ممتع اشجار وهواء عليل

، وصلنا لأجنحة البستان الفندقية واشوف قصر ابو متعب (الله يرحمة) كان مقابل الشقق وادخل المبنى وعند الاستقبال:
- انا : مرحبا اسمي فلان بن فلان آل فلاني ، عندي حجز عندكم.

- موظف الاستقبال : أهلا وسهلاين نورة الدار استاذ ، اذا بتسمح بجواز السفر.
- انا : اكيد ، تفضل .
في هذي الاثناء اشوف السواق وصل شنطتي لعندي واتجه لباب مكتوب عليه الادارة دخل وطلع من الباب شخص اوروبي طويل ومعاه السواق ووصل لعندي ومد يده يسلم، ( بترجم لكم الحوار مباشره لانه ما ابي اتعبكم تضليل تنسخ لصق في جوجل ترجمه )
- الشخص الغريب : مرحبا نورت الدار بالضيوف معاك مدير الاجنحة فلان بن فلان ، اشكرك انك حجزت عندنا وبخدمتك واذا احتجت اي شيء لا يردك الا اللسانك.
- انا : شكرا ، كافي استقبالك الحار تاكد باني راح اسوي لكم دعاية عند قبيلة آل فلان .
- موظفة الاستقبال : تفضل استاذ هذا مفتاح غرفة وانا بالخدمة.
- موظف الاستقبال : تفضل استاذ هذا جواز سفرك وانا كمان بالخدمة ، وهذا الشاب راح يوصل شنطتك.
- انا : مشكوريين ما قصرتوا اشوفكم بعدين.
وانزل وادخل غرفتي الصراحة اثاث جيد جدا ً ومستوى النظافة جيد كمان ، تعليق على هذا الفندق هو عبارة عن شقق بخدمة فندقية يصلح للعوائل اكثر أو من يحب الهدواء موقعه بالضبط مقابل مسجد الملك عبدالعزيز ملاصق لمجمع انفا سنتر (ودي احط لكم الصور لكن للأسف ما عرفت ارفعها) . وبعد اطلعي على مرفقات الغرفة و فتحت ارتب الشنطة واطلع بعض الاشياء قررت اخذ دش واغير ملابسي وفعلا طلعت من الفندق واتجه جهة عين الدياب اتمشى

على الشاطى للاسف فاتني فترة غروب الشمس وكان المكان روشه ناس اشكال والوان ، البسيط والصعب يحتفلون بالعيد الكبار والصغار اجواء جميله وصلت لمطعم كنتاكي قلت ارجع واتعشى وصلت لمطعم ماكدونالدز لاني للاسف ما لقيت مطعم فرايديز لقيته مسكر (سألت ليش المطعم مسكر في روايتان الرواية الاولة وشكلها الاقرب للحقيقة صاحب المطعم مستثمر عربي عنده مشاكل مع مصلحة الضرائب ، اما الرواية الثانية تقول بسبب حدوث عدة جرائم في المطعم شكله متاثر بسبيس تون لقال لي السالفه)وطلبت وجبه من ماك زحمه وما في مكان تجلس عشان تاكل الشعب كله قرر يتعشى ماك ذاك اليوم وحتى مطعم الطازج ما شاء الله سوقه قوي ، قلت لازم ادور شيشه الراس مصدع واسئل اذا في مقهى قريب للاسف اغلبها مقفل احتراما للايام المباركه ولقيت واحد هو مرقص في الاصل بس مقفل الاغاني وما يبيع عصيرات رمان فاخر ولا شراب لوز ، الشيشة عندة تمشي الحال العوض ولا القطيعة والعب بالجوال لين انتفخ الراس حان وقت النوم انها الساعة 11 مساءا.

انتهت الحلقة الثانية. انتظرو احداث الحلقه الثالثه

__________________

Ehaab