مساكم الله بالخير
وشكرا للجميع
وسأحاول الرد على كافة الاستفسارات من خلال سرد تفاصيل الرحلة.
كان الوصول صبيحة يوم الجمعة لمطار كازا من خلال طيران المغرب رحلة مباشرة من الرياض لكازا وتأخر اقلاعها حوالي 30 دقيقة.
وصلت كازا واستلمت الحقيبة وشريحة اتصالات المغرب مجانية وحرصت على الصرف من خارج حدود الجمارك. وكنت متفق مع سائق للحضور للمطار والتوجه مباشرة لمراكش، وصل أبو الشباب وكان مرتبك ومتردد وكأنه بيهرب مخدرات! عند السيارة طلبت أن اسوق واركب مكانه وعلى أقرب محطة بنزين ودعسه وحده لمراكش الحمراء.
[COLOR="red"]*تنبيه : اتفق مع السائق سواء من المطار أو بتوصية أو بشو ما يكون على كل شيء .. من يتحمل سعر الوقود ورسوم الطريق ؟ ووضعك في المكان الذي تريد للمدينة المتجه اليها.
وصلت مراكش وطلبت من السائق استلام الطارة ، ونزلت في ضيافة خاصة عند مقيم غربي لمدة ليلتين . فور وصولي والترحيب بي من الصديق الغربي وتناول الاتاي المغربي والشابورة وبعد أن ارتحت قليلا بالغرفة وأخذت شور توجهت لجامع الفناء واديت صلاة الجمعة وبعدها عدت للمنزل واسترخيت وتناولت غدائي مع الصديق وكان الغداء منوع بيدي السيدة فاطمة. ومع حلول العصر خرجت لساحة الفنا وتجولت في ازقتها شبر شبر ودار دار وزنقة زنقة .. ومع حلول الظلام تناولت القليل من الطعام وعدت لسكني.
* تنبيه : ساحة الفنا مليئة بالنصابين والدجالين والصعاليك ويجب عدم التحدث معهم يعني لا تعطيهم وجه وكشر في وجيهم . قابلت واحد معاه ثعابين وخذ جوالي وصورني وعلق ثعبان على رقبتي واكرمته بعشرين درهم جلس يصارخ وينافخ ويقول أقل من 200 درهم ما اخذ! قلت بنفسي انت كلك ما تسوا 100 درهم .. الزبدة قلت له تبيها خذها وما تبيها رجعها وغير هالكلام ما فيه شي .. خذها الهيس وهو يدعي .. الله يخلصك
بعد استرخاء بالسكن حسيت عصافير بطني تزءزء .. كلمت السواق وحضر وطلعنا دوران بالليل وقلت له مشتهي مشاوي وخذاني لمطعم شعبي في طرف مراكش كل زباينه مغاربه تأخذ اللحمة والكبدة واللي تبي من الجزار قدامك وتسلمها للي يشويها وأحلى عشوة والله يديمها نعمة.
بعد العشوة والوقت متاخر قلت للسواق اطلع للنرجس. . ولما رحت حسيت اني جاي لمباراة النصر والهلال .. زحمة بشكل مو طبيعي وتحت ما تقدر تمشي ولا تلاقي أحد يكلمك والعاملين مو هم اللي اول ما فيه غير عزيز !! اوما البنت الدلوعة أم شعر أشقر ما حصلتها واللي على البار والبوابة تغيروا. طلعت فوق استرقت نظرة هنا ونظرة هناك .. شفت اللي كنت اشوفه بالشام .. يا ليتني من عرب شمر .. وعتيبه والقحاطين والمطران و .. و .. الخ .. وخذ نطل فلوس .. كرهت المكان وكرهت نفسي وقلت الله يستر لا يكون الوضع كذا ع طول .
طلعت ورجعت للبيت .. واحلى نومه.
وبكره لنا لقاء أن شاء الله