سلام عليكم


شخباركم جميع : (113):


بصراحة انا من النوع اللي مااتقن المقدمات الحلوه وحبيت انزل لكم موضوع عن سفرتي للمغرب لعل احد يستفيد من هالموضوع واعذروني عن اي قصور بالتقرير لكن قبل ماانزل الموضوع


حبيت اشكر كل الاعضاء اللي موجودين بالمنتدى عامه
واخص بالشكر : (772): شيخ المزاعيط ومصطي واخوي الصارم وسلامه للمعلومات اللي قدموها لي والنصائح الحلوه .


راح اسرد لكم الموضوع وبذكر تعليقي على كل شي من ايجابيات وسلبيات .




بالدايه ماكنت ناوي اروح للمغرب ابد كلموني : (503): اثنين من الشباب وقالوا لي ايش رايك نروح للمغرب قلت لهم تم انا موافق وكان التخطيط نجلس سبع ايام ونرجع طبعا كلنا مارحنا من قبل : (134): قالوا لي خلاص انت نسق كل شي ورتب الامور وحنا جاهزين والله واتحمس واجلس افرفر بالمنتديات والفلف معلومات منا ومنا الين بالصدفه طحت ع هالمنتدى الحلو واللي غني بالمعلومات وجلست اخذت معلومات واطبع اوراق وارتب كل شي كلمتهم قلت كل شي جاهز بس باقي نقرر متى موعد السفر جلسوا الاثنين يماطلون وحسيت انهم ماعاد يبون يروحون وانا عصبت من كثر التعب اللي تعبته على المعلومات وتجميعها : (76): المهم قلت اذا ماتبون تروحون عادي قولو لي قالوا بصراحة الامور ماضبطت معانا قلت لهم بكيفكم لكن انا والله بمشي لو اروح بروحي والله واكمل مشوار تجميع المعلومات وغيرت الحسبه لاني بروح لوحدي المهم وفي احد الايام وانا ادور بالنت الا وواحد من الشباب يكلمني امارتي الولد وكان بالسعوديه كلمني وجلس يسولف وقالي انه في اجازه سولفت معاه وقالي بتقدر تلاقي اجازه نبي نسافر انا وانت قلت انا والله ابي اسافر هاليومين قال خلاص نروح اوروبا قلت لا والله انا ماسكه معي ع المغرب نروح نفتل ونشوف المغرب شي جديد قال تم .


اتفقنى مدة الرحله 11 يوم وكانت الميزانية 35 الف من غير التذاكر


جلست اشوف الحجوزات وكلمت مكتب الطيار وخليتهم يحجزون لنا ولقينا على طيران الاتحاد بتاريخ 8 / 6 وكان مسار الرحله الدمام ابوظبي الدار البيضاء وكان سعر التذكره 3332 ريال والله حجزان وكان يوم الخميس الساعه 9:50 دقيقه وقت الاقلاع من الدمام جلسنا نرتب الامور ورحت اشوف لي ملابس وفي ليلة السفر رحت لاسواق التميمي واخذت الرز ومعلبات وبهارات ودخان واخذت شاهي مفضل عندي : (212): عارف ماراح الاقيه هناك المهم رتبت الامور كلها رجعت لخويي وكانت الساعه 3 الفجر نمنا ساعتين وصحينا الساعه 6 الصبح ورتبنا شنطنا بسيارتي ونمشي من البيت الساعه 7 الصبح وصلنا المطار قصينا بطاقه الصعود وجلسنا نتظر فتحوا البوابه ودخلنا داخل وهذي صورة من داخل المطار اثنى دخولنا .




ركبنا الطائره وهذي صور من داخل الطائره .








وهذي صور من فوق ابوظبي


وهذي صورة اثنى هبوط الطائره بمطار ابوظبي





دخلنا المطار وكان الترانزيت اقل من ساعه على طول رحنا للبوابه المتجهة لكازا وكانت زحمه شوي والاكثريه حريم وهذي صور من البوابه لا احد يدقق بالصور




وهذي صورة ثانية





ركبنا الطائره متجهين من أبوظبي لكازا


وهذي صور من فوق بالطائره


صورة للبحر الاحمر





وهذي صوره من فوق كازا

وصلنا مطار محمد الخامس كانت الساعه بتوقيت المغرب 9 المغرب وهذي صور من المطار







وصلنا للجوازات وكانت مره زحمه وصلت موظف الجوازات وجلس يتكلم ويبرطم وانا مسوي نفسي موفاهم ايش يقول : (498): عصب علي لاني ساكت قالي ايش فيك ماترد ليش معصب قلت له مو معصب تعبان بعد السفر ختم جوازي وطلعنا من الجوازات رحنا للشنط وتعال طرد وراء الشنط ولفلفها كل وحده بوادي اخذنا الشنط وكانت الساعه تقريبا 10 ونص بالليل وكنا تعبانين ع الاخر وكان التخطيط ناخذ قطار قالي خويي خلينا ناخذ تاكسي ونمشي بلا قطار بلا هم طلعنا برا واخذنا تاكسي واتفقنا معاه من البدايه على 1300 درهم ركبنا معاه وكانت سيارته كويسه مورسيديس موديل 98 تقريبا مشينا وكان واحد من الشباب معطينا رقم صاحبة الفله ومتفقين ع السعر والف شكر له كلمت صاحبة الفله وقالت اوكي اول ماتوصلون مراكش كلمني وقفنا بالطريق تعشينا ومشينا اعطيتها السوالق وقالت له المكان وكان السكن فله في منتجع الريفر بالم مكونه من دورين تحت صالتين وصاله طعام ومطبخ كبير فيه كل الاغراض ودورة مياه اعزكم الله وفوق غرفتين نوم كل وحده ماستر وكانت مره حلوه وبكره انشاءالله انزل لكم الصور للفله قابلنا صاحبة الفله وكانت جايبه حتى الشغاله لاني قلت لها نبغى شغاله طول اليوم خلصنا معاها ومشت من عندنا وطلعت الشغاله شناطنا فوق وكانت الساعه تقريبا 1 ونص بالليل وكنا مره تعبانين وطلعنا ونمنا ......




مرئياتي عن طيران الاتحاد مره كويس وفيه ترفيه بس المره الجايه لو رحت للمغرب ماراح اروح عليه بطلع ع السعوديه لان فيه فرق وقت تقريبا 3 ساعات ذبحنا الجلسه بالطائره




نوقف هنا وبكره نكمل لكم القصه وانشاءالله اكون افدكم لو بشي قليل