ياروضة المسجد الاحوال ماهي تمام
لو أني بخير ماجيتك بالثلث الاخير

جيتك قبل لايناديني عليك الامام
يقودني الهم قود ام الخشب للضرير

جيتك ابي منك تفيضين حب وهيام
للي قضي نصف عمره فالمآسي آسير

نسايمك للجروح الجرد برد وسلام
وارياحها كل ماهبت ورود وعبير

كن وقفتي عند بابك تحت جنح الظلام
وقوف منهو بعد خوض المعارك كسير

بكّيت من صادق الاحزان بيض الغمام
وانا عيوني تكابر دمعتي لا تسير

في داخلي حرب ماهي بالقنا والحسام
لكني من وقعها والله ماني بخير

ماطحت من حيرتي لكن عليّ الحرام
إن بيني وبين عثراتي خطاوي مسير

من حزمة الصبر باقي عود نصفه حطام
مانيب آيوب..انا للصبر عندي اخير

اللي بعيني من النظرات كل الكلام
حدقّ بعيني وتعرف ويش ضايع مصير

مروري بالفانيه ماهو مرور الكرام
لاوالله..الا مروري في كنفها خطير

شاعر تلاعب احساسيه هديل الحمام
وشلون لاشاف منحوت الخصر مايثير

احيان..كن داخلي يوسف عليه السلام
واحيان..أقدّ لي قمصان ولا استخير!!

على كثر ماجرفني سيل (وادي حرام)
على كثر مايأنبني حديث الضمير

واآنفسي اللي تعاتبني بكثر الملام
هي نفسها كل ماهبّ الهوا تستدير

تقودني مغريات الارض قود الخطام
في كف راعي لاشافام الغنج يستثير

ماكني اللي قضى تسعه وعشرين عام
كل يوم اكبر..احس اني هذاك الصغير

(الله اكبر) هِنا يانفس مات الكلام
نادى المؤذن بعد طول العتاب المرير

"ياروضة المسجد" احوالي على مايرام
شكراً على ضيافتك شكراً وشكراً كثير

لعل دعوة فجر ترقى ل رب الأنام
وتدلني للطريق الهادي المستنير..