غادي نقدم ليكم ضلعة البقري متبلة و مشوية في الشواية

لهد الوصفة خاصنا


جوج معالق زيت الزيتون
جوج معالق خل تفاح
معلة ديال الطحميرة (فلفل احمر)

واحد الخليط خمس انواع الفلفل Mélange 5 Baies اي البزار
الكحل والبيض والحمر والاخضر والتاني نسيت اسمو



وكذلك خاصنا ياسيادي ولالياتي معلقة من الزعتر (الزعتر المجفف)

وواحد مولاتي معلقة كبيرة ديال الهريسة (وقيلا سميتها شطة)

والملح على حساب الذوق تقدرو تقولو معلقة
وواحد يوغورت او دانون طبيعي او زبادي كترو الاسامي

عصيرة حامضة (ليمونة بالنسبة الاخوان العرب)


نمشيو دبا باش نبداو نرقدو الضلعة في التتبيلة او التشرميلة الى غادي نديرو

في ايناء او جبانية كبيرة
نديرو الزيت
والخل
وعصير الحامضة (الليمون بالنسبة للاخوان والاخوات العرب)

ونخلطو ونجلطو هههههه

ونزيدو الفلفل الاحمر اي الطحميرة ديالنا مع هداك الخليط ديال الفلف الاسود والابيض والاخضر والاحمر الى سبق وريتكم الفوق

من بعد نزيدو الهريسة
والملحة
والزبادي او دانون الطبيعي
ونخلطوهم حتى نحصلو على خليط متجانس >>>>متعوب على متجانس هههههههه


وناخدو الضلعة ونرقدوها في هاد الخليط
ومنساوش ندخلو شوية بين الللحم والعضم باش تشرمل مزيااان



مني نشرمول الضلعة مزيان نغطيوها ب papier sulfurisé >>>سمحو لي ماعرفتش سميتو بالعربية :ang::ang:



ونحطوها في تلاجة لمدة تلات ساعات او الا بغيتو اكتر ماكين مشكيل هو من الاحسن تشرمل بالليل وتحطوها في تلاجة حتى الصباح باش تشرب مزيان الشرمولة او التتبيلة

من بعد نشدو الشواية ديالنا او نسخنو المجمر على حساب
الى عندو شواية ديال الكهرباء او مجمر ماشي مشكل

المهم نسخونها مزيان
ونحطو الضلعة باش تتحمر
على الجهتين




نحاولو نخليها اقل شي خمس دقايق على كل جهه حتى تحمر مزيان




تتقدرو ترفقو هاد الضلعه بالسلطة او البطاطس مقلية
انا هنا درت بطاطس مقلية واللوبية خضرا مقلية في شوية زيت عود

وبالصحة والراحة