كم قطار في حياتك و كم محطة
مساء الخير اخواني المزاعيط و المزعوطات
ليلة الجمعة كنت معزوم بالنعيرية وشفت واحد من الشيبان من الرواد مزعوط قديم ما عرفني وانا خليته بعد السوالف و القهوة وخذ علم و ود علم قلطو عشاهم و خلصنا وجلسو الاجناب يشكرون و ويمشون واحد واحد
وصفينا انا يا هل المحل الرفيق و العاني و القريب قمت من محلي و سلمت على شايبنا من جديد و تحفيته و هو مستغرب لكن مستحي يقولي من انت ويطمر واحد من الربع كان يقولة يابو شري هذا ولد فلان
وقوم المسكين احبب في وترحم على شايبي و عيونه تغرغر دمع
المهم بدينا في علوم وسوالف قديمة وجديدة وكان جو كايف ليل وبر وتطلق عيونك في سباريت الخلا وعطايا الرحمان من يمين و يسار مجاهيم و وضح
مالكم في الطويلة نشدته ابو شري كم لك عن المغرب قالي اخر مره مع عد لي شيبان كلهم في ذمة الله واولهم ابوي قلتلة عام كم قالي 1992م قلت له تغيرت عليك يا بوشري قالي اعرف وقام يسرد على علومهم ذاك الزمان و خبرته انا باعلومي ثم قلت له اني عازمك على المغرب من ورا العيد قالي لالا (القطار عداني وفات)
جلست احاول قالي اسمع يابوك عد معي قلت سم قالي عندك قطار العمر وعندك قطار الرزق و عندك قطار الحب والعشق و عندك قطار الزواج اذا جيت المحطة ولقيته فات خلاص ما تقدر تلحقة ولا تركب قطار غيرة والسبب ما فية قطار غيرة هو الوحيد
قلت له ابو شري كم محطة لك هل قطارات الي عديت محطتين في مكانين لكن الارض وحدة ابوشري كيف قالي تولد في مكان وهذي محطة على الارض و تموت وهذي محطة على الارض الارض وحدة لكن الجغرافيا متغيرة
اخواني المزاعيط يا ترى كم قطار فات و كم قطار جيته على الوقت .