بسم الله الرحمن الرحيم
كيف حالكم شباب
بصراحة نصحوني بعض الشباب ازور المغرب وقالو لاتزورها الا ومعك قروب شباب عشان تنبسط
وبصراحة طنشت كلامهم ورحت لحالي
المهم مالكم بالطويلة
سافرت عن طريق الخطوط المصرية يوم 20 يناير 2017 ترانزيت
الرحلة من القاهرة لكازا تقريبا 4 ساعات و40 دقيقة ووصلت مطار محمد الخامس تقريبا الساعة 1 ظهرا ولقيت زحمة صينيين عند الجوازات مدري وش موديهم المغرب عيال التنين
المهم طال الانتظار والحمد لله انتهت الاجراءات واتجهت على طول لمحل الصرافة لتحويل العملة
وبعدها صف طويل جدا فيه مليون صيني عند الجمارك وتفتيش الشنط وانتهيت ابشركم
اتجهت بعدها لشراء شريحة من اتصالات المغرب ( بعد ماتطلع من الجمرك على يدك اليمين على طول )
بعدها قلت لازم استاجر سيارة ونزلت لمكتب sovoy بصراحة تعاملهم ممتاز خذيت اكسنت 2016 بمبلغ 325 درهم لليوم
يطلب الرخصة وصورة من الجواز
بعدها ركبت السيارة وعلى اساس اشوف فندق ارقد فيه لان اليوم الثاني رايح مراكش
والله يجيركم طحت في زحمة كازا واول مرة اسوق عندهم الناس كلهم رابطين حزام الامان وفيه التزام عند الدورات
وجلست 3 ساعات ادوج بهالشوارع مدري وين انا فيه بغيت اصيح وكان برد موت
المهم سويت بعض الاتصالات نصحوني اتجه لفندق حياة ريجنسي وفعلا رحت له وقال لي موظف الاستقبال للاسف الفندق مابه ولا غرفة فااضية بغيت ابكي عنده تعبان وحيلي مهدود وابغى الفراش لكن بصراحة كانت غلطتي لاني ماحجزت قبل رجعت سويت بعض الاتصالات نصحوني اروح عين الذئاب وفعلا اتجهت لعين الذئاب ولقيت فندق هناك بصراحة اسمه صعب فرنسي على اسباني عجزت احفظة لكن هو فندق تقريبا 3 نجوم خذيته بي 500 درهم لليلة
وبصراحة ماعجبني تعامل موظف الاستقبال لانه اول ماشافني قال هلا بالسعودية يامرحبا تبي حشيش او بنات
انا والله انصدمت قلت معقولة وش هالوقاحة لكن بصراحة كنت مرهق وتعبان وابي ارقد وصرت اجامله الله ياخذة عشان ارقد بس وفعلا رقدت ذيك الليلة ودرجة الحرارة تقريبا 3 درجات
وللحديث بقية
ابو طلااال