السلام عليكم ... اعزائي اعضاء المنتدى احب اني انقلكم تجربتي والاحداث التي حصلت معي بجنة النخيل واترك الحكم لكم ...

هذي رابع مرة ازور فيها مراكش بهالسنة وسكنت بجنة النخيل مرتين من قبل وهذي الثالثة وطبعا بالمرتين اللي قبل لم تواجهني اي مشكلة الا المشاكل البسيطة التي لا تستحق الذكر وكانت جدا عادية وتنحل بسرعه .. المهم المرة هذي سكنت عن طريق وحدة اسمها نادية اخذت رقمها من واحد من الشباب وكلمتها واتفقت معها على 8 ليالي وبسعر 3000 درهم بالليلة وكنت شارط عليها اني اسكن بفيلا 67 بالايدم بالم لاني مجرب المنتجع من قبل ومجرب نفس الفيلا وكنت مرتاح فيها .. وصلت كازا ولقيت السيارة بأستقبالي مع السواق طبعا السيارة عن طريق الاخت نادية . ركبنا السيارة ووصلنا لمراكش ودخلنا الفيلا والاوضاع ممتازة وتفاجئت انه الشغالة مو نفسها الشغاله اللي كنا متعودين عليها ,, المهم مو هذي المشكلة بس ذكرت هالشي من باب التفصيل لا اكثر . كلمتني الاخت نادية وقالتلي بيجيك واحد اسمه مروان وعطه الفلوس واتفق معه على كل شي وهو بيكون بخدمتكم اذا احتجتوا اي شي . جانا الاخ مروان ومعه واحد اسمه ياسين ويصيرون اخوان نادية المهم عاينت الفيلا وعطيتهم الفلوس وسألته عن موضوع الزوار والضيوف وقالي انه اي ضيف يجيك لازم يمر من عند البوابه (الريسبشن ) وناخذ بياناته بس لازم تكلمني قبلها فأسغربت من الموضوع بس قلت يلا مو مشكله بيفكونا من حنة البوابة والبخاشيش . فصار كل مايجينا ضيف نكلم مروان وطبعا مرات يرد ومرات مايرد واذا رد يلطع امنا بالقليل ربع ساعه وفوق هذا كله مايفكك الا وهو ماخذ بالقليل 100 درهم يعني ما استفدنا شي مع اني كنت متفق مع نادية من قبل وقالتلي لا تعطي بخشيش للبوابه وانها هي واخوانها راح يفكونا من سالفة البخاشيش وفجأة تغير الاتفاق مع العلم ياشباب ان حنا ماعندنا مشكلة بالبخاشيش لكن القصد من الاتفاق انه 3000 درهم شاملة كل شي وغير كذا ماكان لنا خلق قروشة البوابه وتعرفون الواحد يرجع من السهر وماله خلق يتفاهم مع احد . المهم كان الاخ مروان جدا استغلالي ونفسه في خشمه وكنا اذا كلمناه ولا قابلناه يالله يتكلم معنا كأننا نشحت منه وغير كذا انواع التحرش بالضيوف .وفي مرة اخوه ياسين طاح من الدباب وانجرحت رجله وكلمنا الاخ مروان وقالنا لازم تعوضونه وتعطونه فلوس لأنه طاح من الدباب وهو رايح للبوابه عشان يخلصلكم الامور ويدخل الضيوف !!!!!!!!! سلامااااااااااااااااااااا اااااات !!! طبعا هذي المرة الوحيدة اللي وقفنا بوجهه وماعطينا شي وقلناله وش دخلنا حنا ؟؟ حنا كلمناك انت ماكلمنا اخوك وانت اللي ارسلت اخوك بالدباب فعلى اي اساس اعوضه ؟؟؟ المهم المعاملة من بعدها صارت من اسوأ الى اسوأ وكان الاخ مروان اذا جانا الفيلا ليته يدق الباب وينتظر ,, كان الاخ اذا انفتحله باب الفيلا يدخل وياخذ فره على المطبخ وعلى الصاله ويتصرف كأن الفيلا له وهو مسكنا فيها ببلاش طبعا شفت الموضوع زاد عن حده كلمت الشغاله وقلتلها اي واحد يدق الباب ماتفتحيله الا اذا انا اذنتلك وحتى اذا فتحتيله الباب مايدخل اي احد الا لمن انا اجي وادخله ولا ترى بكلم الاخت نادية . بالفعل بعدها ماعاد شفناه يدخل الفيلا . المهم الى هنا وكل هذا اشوفه مشاكل عادية وتافهه وممكن انها تنبلع لين ماجات الليله الاخيرة يعني اليوم السابع والباب يدق وفتحت الباب ولقيت الاخت نادية قدامي وسلمت عليها وكانت جدا راقية بالتعامل وقالتلي ياطلال ابي اطلب منك خدمة ومنحرجة منك قلتلها ابد آمري واذا قدرت ابشري قالتلي انا مفكره انكم جالسين سبع ايام بس فعشان كذا انا ارتبطت مع زباين ثانيين بيوصلون اليوم ودافعينلي عربون ويبغون نفس الفيلا اللي انتم فيها ونسيت انكم لسه موجودين وباقيلكم يوم فقلتها وش المطلوب ؟؟ قالتلي بنقلكم فيلا ثانية قريبه وبخلي الشغالات يرتبون عفشكم ويرتبون كل شي لكم لنت خلك مرتاح بالصاله وحنا نسوي كل شي والشغاله بتجي معكم للفيلا الثانية وبتجيب معها اغراض المطبخ كلها . وبصراحة كان اسلوبها جدا راقي بالكلام وقلت ياولد كلها يوم وبنمشي وانا منيب خسران شي ويمكن اذا خدمتها الحين بالمستقبل بحتاجها وبتخدمني فوافقت على طلبها . المهم هنا بدت المشكلة انتظرنا اكثر من ساعه ولا احد رتب اغراضنا وكل ما كلمنا الشغاله تقولنا شوي انا مشغولة فقلت للشباب اللي معي يلا ياشباب كل واحد يرتب اغراضه بدل ما حنا قاعدين فاضيين ويضيع علينا الوقت على الفاضي فقمنا ورتبنا كل شي وانتظرنا بالصاله لين ماجانا الاخ مروان وقالنا يلا مشينا فطلعنا ومعنا ضيوفنا وتفاجئنا بسيارة كبيرة تنتظرنا قلت لمروان سلامات بتوصلونا المطار من بدري ؟؟!! قالي لا بس الفيلا بعيده شوي ومانبي نتعبكم !! وانا اقول في نفسي غريبه وش هالطيبة اللي نزلت عليه فجأة !المهم ركبنا السيارة معه الا الاخ متوجه خارج المنتجع وطبعا حنا متفاجئين لأن على بالنا الفيلا بعيده بس مو بره المنتجع المهم طلعنا ووصلنا للريفر بالم ودخلنا حنا وضيوفنا للفيلا طبعا انا ساكت وماقلت شي لان معنا ضيوفنا فخفت نتهاوش معه ولا نتجادل اقلها يحقد علينا ويجيب فينا العيد مع الدرك فبلعت لساني وسكت وقلت ياولد باقي ليله وخلنا نعديها على خير فدخلنا الفيلا وكانت 3 غرف نوم فقط مع انه اللي كنا ساكنين فيها كانت 4 غرف نوم ولا فيها شغاله وحتى شغالتنا ماجت معنا... بعدها مشا مروان وجانا الامن حق المنتجع وقالنا ترى ممنوع التكاسي تدخل وممنوع الضيوف يدخلون وممنوع وممنوع طبعا كل هذا عشان يبغون بخاشيش وكان لهم ما ارادوا ...وسلامتكم هذي كل السالفة طبعا بعدها حرمت اتعامل معها وارسلتلها مسج اعاتبها فيه ودقت علي بعدها ومارديت .... فهذا اللي حصل معي بالظبط والله على ما اقول شهيد واترك الحكم لكم .. تحياتي للجميع