الحقيقة يامهندس ان الجزائر من حيث الاجواء والطبيعة والناس تملك مقومات السياحة.

ومرشحه انها تكون وجهة سياحية مميزة على مستوى افريقيا لكن الحكومة باختصار لاتريد ذالك والبلد شبه منغلق على نفسه في ذالك .

من ناحية الأمن والأمان تطمن من هالناحية ولاتشيل هم ابد زيها زي المغرب وربما افضل فهناك لن تجد عسكري او رجل جمارك يطلب منك دينار واحد اضافة الى الشعب كل في حالة ومحد يمك من الاخر .

بخصوص كم تقعد هذي يبيلها تفصيل اذا انتي جاي تمشية وحاب تستكشف البلد ربما شهر مايكفيك فيها عدة مدن واثار ومعالم سياحية تستاهل الزيارة .

اذا سياحة ليل فتعتمد على مزاجك لكن حقها مابين ٤ ايام الى اسبوع من وجهة نظري ..

مدن سياحية عندك بجاية وجيجل اضافة للعاصمة الجزائر وايضا وهران وتلمسان .

سكن عندك فندق الرياض بالعاصمة الجزائر فندق على البحر بناه الفرنسيين ايام الاستعمار وفيه غيره طبعا .

عندك منطقة سيدي يحي وفيها شارع سيدي يحي فيه عدة مقاهي ومطاعم ويعتبر الافضل على مستوى المدينة .

عندك مول باب الزوار وشارع ديدوش مراد(الشارع هذا يشهد الان من وقت الى اخر احتجاجات ضد بوتفليقة ويقع على الشارع هذا جامعة الجزائر)

السهر طبعا الجزائر مشهورة باغاني الراي وهي الاغلب هناك والسهر مستواه عادي لايرقى لمستوى مراكش او دبي مثلا لكن دامك رايح رايح لازم تقضي وقتك هناك عندك ديسكو شيراتون ولاروز بلو وسلطان وغيره .

عندي رقم سواق سبق تعاملنا معاه من فترة طويلة عام٢٠١٠ ولازلت على تواصل معه من فترة الى فترة اذا حبيت اعطيك رقمه تواصل معي خاص وتقدر تستفسر من السواق اللي تبي وهو رجل ثقة وكبير وبيكون معك مرشد سياحي لان معلوماتي عن الجزائر قديمة

كنا نعطيه يوميته معنا شامل سيارته وكل شي مايقارب ٣٠٠٠ دينار جزائري ويكون معنا طول اليوم طبعا وقتها 3000دينار تساوي 155 ريال سعودي ..الان ارتفع سعر صرف الريال مقابل الدينار الجزائري من 19الى31دينار يعني عملتهم انهارت شوي ..اتوقع يطلب منك 5000 تقريبا لكن انت تفاوض معه وقله من طرف ابو صلاح يعرفني اذا مانسى بعد.
ورحلة موفقة