تقرير مختصر لرحلتي مراكش اغادير مراكش

السلام عليكم ورحمه الله وبركاته

كيفكم يامزاعيط انشالله بخير

راح اختصر هالتقرير واعطيكم الده للفائده

رحلتي الى ديار الراحه والهدوء الى وطني الثاني المغرب

كانت المده 2 مراكش 4 اغادير 2 مراكش

الناقل الخطوط السعوديه سعر التذكره 2500 ريال من الرياض - جده - الدار البيضاء

الاشخاص 3

وصلت الى مطار كازا الساعه 4 ونصف كانت الرحله روعه

كانت الاجراءات سلسه مافيه طلب اكراميات الوضع مزيان

كنت متصل على شخص يوفر لي سياره اسمه عصام من مكتب تاجير بكازا الاستلام والتسليم بالمطار كيا ب 250 درهم

وتفاجئت ان السياره اللي جايبها هونداي ب 275 قلنا اوك ماتفرق

ركبنا الطريق وكانت السياره مش ولابد هلكانه المهم وصلنا مراكش واتصلت عليه قلت لازم تبدل السياره قال واخا بجيب لك سياره لمراكش

بس ادفع حق الطريق وبتكون ب 350 قلت اوك

على طول مكتب الدوقاوي استاجرنا شقه صاله و2غرف كانت فخمه في بوابه 10 تدفئه ودي اس ال وشغاله وكانت ممتازه كثير

وكان سعرها باليوم 1500

كان الجو بارد بس مانحس فيه الا اذا طلعنا

اخذنا يومين فيها واستانسنا مافيه اي مضايقات وراحه كامله

انصح الجميع بمكتب الدرقاوي ممتاز في التعامل والامان والابتعاد عن السمسارين


وصلت سيارتنا الجديده من كازا اسمها مااذكره بس كانت مزيانه 2012 وكان الاخ عصام تعاملو ممتاز بس سيارتهم مش ولابد

انصح بالاستئجار من المطار سياراتهم جديده ومضمونه وتختار قبل تستاجر حنا انحدينا بس ماوجهنا اي مشاكل


مشينا اغادير وصلنا الساعه 10 ليلا على طول لمطعم القلعه تعشينا واتصلت على شخص اسمه عبدوو رقمه بالمطعم

قلت ابي سكن قال اختار وين تبي اماديل ولا المارينا ولا صحارا قلت نشوف اماديل

رحنا اماديل صراحه موقعه مزيان بس الغرف متهالكه وفيه ريحه في الممرات وتحس جوه ممل مااعجبنا الجو

رحنا المارينا وكان فيه في الريسبشن موضف عسسل مااذكر اسمه بس ولد حليو وكلمه عبدو ومالقا الا 3 شقق

كل شقه غرفه وحمام ومطبخ وجلسه وبلكونه مطله بس صراحه قمه الفخامه والنظافه والروعه ب 1136 لليوم الشقه

ارخص سعر عن طريق المويد

اعجبتنا واستاجرناها وصراحه تعاملهم ممتاز ولافيه مضايقات

نصيحه خذ اغراضك من برا المنتجع عشان لاتطلب منهم اي شي لان السعر عندهم مليون الدبل ولك حريه الاختيار

تخيلو اخذت دبه مويه صغيره ب 40 درهم

المهم اتمشينا باغادير 4 ليالي كانت روعه وموقع المارينا روعه كل شي قريب منك

عندهم مساج لايفوتكم مع حمام مغربي وتنظيف بشره ب 950 درهم


ودعنا اغادير الحب ورجعنا مراكش

وحنا راجعين من الطريق داخلين مراكش وقفنا واخذنا خروف ب 700 درهم وجميع انواع الخضار والفواكه ب 100 درهم رخيصه مرره

لو من داخل مراكش كان الدبل مرتين

على طول رحنا للدرقاوي واستاجرنا شقه 3 غرف وصاله وبلكونه ومطبخ وحمامين ب 1950 في بوابه 10

وكانت نفس الاولى روعه روعه مع خدامتين يشيلونك على كفوف الراحه وتعامل مكتب الدرقاوي قمه الاحترام


اخذنا يومين وكانت رحلت العوده الى ارض الوطن

اخوياي قررو يمددون اسبوع وانا لضروف العمل قررت العوده الى الوطن وكنت مره زعلان لان السفره توها تضبط: (720):


رحت للمطار وكان الطريق اخضر كله والجو مزيان ودموعي اربع اربع كنت برجع بس تذكرت الدوام خخخخخخخ

وصلت المطار وانهيت اجراءاتي وركبنا الطايره وحسيت ان الطايره راح تطيح كانت خه كانت تسحب فينا جلنطات بالجو

ووصلنا الرياض الساعه 5 ونصف فجرا مرورا بجده


تكاليف السفره كانت 13000 بالتذكره مع العلم اني كنت مبذر ولا كانت اقل


اتمنا افدتكم اخواني المزاعيط واحتراما للمنتدى واخواننا المغاربه ابتعدت عن بعض الامور اللي لاتناسب الذوق العام

كم كنت اتمنا ان يعاملونا كالاجانب وان يبتعدو عن الاكراميات وزياده الاسعار على الخليجي وتعمد ايقافك من الدرك لاخذ اكراميه

ولكن انت من تحدد موقفك معهم فانا كنت صارم معهم وخصوصا الدرك وكان يوقفني عشان اكراميه ومااعطيه وفي الاخير يقول روح

خلوكم مثلي ومااحد يخاف الا اللي وضعه مو كويس يبخشش بسرعه عشان لايتمشكل : (165):
احترامي وتقديري للجميع

__________________
7lm w antha

حمد لله على السلامة
وتعوضها مرة ثانية اهم شي عملك
تقرير جميل وقصير
اتمنى نصايحك وسلبيات وايجابيات مراكش واغاديرارفع لك االقبعة
على التقرير
اخوك علوووش

__________________
:yess:

هلا بالاخوان علوش واحمد

اشكر لكم المرور الجميل

بالنسبه لمراكش السلبيات اكثر شوي كونها تعج بالسكان والسواح

الدرك في كل مكان ولازم توقيف سوا رايح ولا جاي
المكوث في السكن كثير مما يحسسك بالطفش لقله الخيارات
المضايقات في ساحه الفنا والاماكن السياحيه من قبل الشحاثين
وارتفاع الاسعار
بوابين السكن وطرارتهم
الليل فيها قااتل تحس ان الجو كئيب

هذي لاتقلل من جمال وحلاوه مرااكش فهي تستحق الزياره
بس ماتصلح للمسافر الوحيد لزياده التكاليف عليه يبي لها ٣ او ٤



اغادير

النهار والليل سواء
نهارها جميل وهادي ولايوجد زحمه
فيها الخيارات كثيره من حيث التماشي
مطله عالمحيط روووعه
قله الدرك ماتشوفهم كثير
لايوجد مضايقات والصرف فيها قليل لايكثر فيها البخشيش
تصلح لشخص بمفرده او اكثر
ناسها مايحبو المشاكل رايقين شوي
يعني رووووعه بالمختصر



تحياتي

__________________
7lm w antha

الحمد الله عالسلامه اخوي

تقرير بسيط ومفيد .. بس اهم شي في مراكش خيارات السكن متعدده ورخيصه
عكس اكادير ..

والليل في مراكش غير غيييييير .. بس الظاهر انت من مزاعيط اغادير وكازا وقلبك يميل هناك

تسلم يالحبيب عالنصايح والتقرير عشره على عشره

__________________
i am a very private person, yet i am an open book
if you dont ask... i won't tell

تسلم يدينك

هلا اخوي بالعكس انا مالي وجهه معينه

احيانا تضبط علا اغادير واحيانا مراكش

كازا مااجيها مره

انا اشوف اغادير ارخص بالسكن 500 ريال باليوم مناسبه

في مراكش شقق اقليز مااحس ان فيها امان فالنخيل افضل من هالناحيه

وليل مراكش والله عادي مايقارن باغادير

يسلمو عالمرور

__________________
7lm w antha

وايدك حبيب

__________________
7lm w antha

تسلم يالغالي تقرير مبسط وحلو

معاك 100 ٪

مراكش تتضايق فيها من كثر الاستغلال في كل مكان ....

أغادير حبيبة حبيبة جداً

ولكن تظل مراكش سهراتها وليلها روعة .....