منتجع DAR JELLOUNA

في بداية هذا التقرير المتواضع احب أن اشكر الأخ العزيز أهنجار خليجي (ابو عبدالله) على كل ماقدمه لنا من خدمات مع العلم اني قبل السفره هذي لاتربطني به أي صله ولا معرفه لكن يعلم الله انه واحد من اهم الاسباب الي سهلت علينا امور كثير بهالرحلة واتوقع مهما أثنيت عليك يابو عبدالله ماراح اوفيك حقك .

طبعا في البداية كانت السفره من الرياض الى المغرب عن طريق الخطوط التركية ( نصيحة لااحد يسافر عليها لانها متعبه جدا) في تاريخ 8 مارس 2013 عددنا 3 اشخاص.
أول ماوصلنا لكازا استأجرنا سياره من شركة جواد لتأجير السيارات وصراحه كان افضل مكتب تأجير تعاملت معاه في المغرب وكان جدا متعاون والأخوان استقبلوني في المطار بالسياره الي انا مستأجرها وحاسبتهم ومشيت كانو سلسين جدا في التعامل واسعارهم اقل بكثير من اسعار المكاتب الاخرى وسياراتهم كلها جديده .
قررنا في البداية اننا ننزل لاقادير بحكم عددنا القليل (ثلاث اشخاص) بالاضافه الى اني من عشاق هالمدينة، كان جلوسنا في اقادير الى تاريخ 13 مارس يعني خمس ايام.

بعد كذا نزلنا لمراكش وجونا 5 من الشباب يعني العدد صار 8 وهذي من أهم المشاكل الي واجهتنا هناك بسبب ان العدد كبير تعبنا وحنا ندور سكن وكلمت ابو عبدالله قبل السفر باسبوعين بهالموضوع و قال لي لقيت لك فله 8 سويتات وبعد محاورات ومناوشات مع الاخوه الي معي بالقروب توكلنا على الله وحولت قيمة يومين الى الاخت منى (الي تشتغل مع الأخ اهنجار في المكتب) في مراكش عن طريق ويست نيونيون وبعد ذلك تم تأكيد حجزنا.

الفله هي عباره عن منتجع اسمه DAR JELLOUNA تقع على طريق اوريكا تبعد عن مراكش حوالي 13 كيلو وهذي اهم ميزه فيها انها بعيده عن النخيل وحوسة الدرك الي هناك ونقاط التفتيش والابتزاز الي تكون باخر الليل في منطقة النخيل والفله هذي ماسكتها شركة عندهم مجموعه من الفلل الخاصه وياجرونها باسعار انا اعتبرها معقولة بالنسبة لخدمتهم ومستوى النظافة والأمان .