السلام عليكم ورحمة الله وبركاته
حبيت اشارككم تجربتي لمنتجع روز قاردن في زيارتي الاخيره لمراكش بشهر نوفمبر 2013
طبعا انا راح اكتب الايجابيات والسلبيات ,, واتمنى ادارة المنتجع تتقبلهم بصدر رحب وتعتبرها نقد بنَاء من اجل تحسين الخدمه والجوده
لكن الصراحه واقول الحق ان الايجابيات اكثر من السلبيات ,, ولكن السلبيات صراحه تخلَي الزبون يعيد التفكير قبل ما يسكن مره ثانيه
في البدايه تراسلت مع ابو ادم على الواتساب من الرقم الموجود في الموضوع الموجود بالاسفل
العروض وحجز الشقق و الفلل في المغرب
طبعا الفيلا المطلوبه ما كانت متوفره (4 غرف) ولكن انا رحت للمنتجع بنفسي وتكلمت مع الاستاذ عبدالرحيم وشرحت له طلبي (فيلا 4 غرف او فيلا 3 غرف + غرفه مستقله)
والسبب ان صاحبنا بالغرفه المستقله جالس يومين وبعدها مسافر , وبنبقى في الفيلا 3 غرف ايام زياده
الصراحه الاستاذ عبدالرحيم جدا خلوق ومتعاون وخدمنا كثير ,, وتقابلت مع ابو ادم وسلمت عليه وكان رجل قمة في الادب والصدق
قبل وصولنا بيوم اتصل فيني الاستاذ عبدالرحيم وقالي تم تأكيد فيلا 3 غرف و غرفه مستقله
وصلنا ودفعنا قيمة اول يومين وعملوا لنا خصم (بدون خصم المنتدى) ... وخصم المنتدى اللي بالموضوع اعلاه استفدنا منه في الايام الاخيره لما صرنا فيلا وحده 3 غرف
وهذا شيء اشكر عليه الاداره وكان حجزنا ملخبط ولكن لما صار واضح اخذنا الفيلا بـ 2750 بدلا من 3000 درهم
طبعا الفيلا صراحه مستواها جيد جدا وحاولت اصور لها بعض الصور واتمنى انها تعجبكم
في الحقيقه الفيلا اصلا عباره عن مدخل وصاله وغرفتين ,, لكن تم تحويلها الى مدخل و 3 غرف ..
يعني الغرفه رقم 1 : غرفه معها حمام خاص وباب خارجي وباب على المدخل الامامي
و الغرفه رقم 2 : غرفه معها حمام خاص وباب خارجي وباب على المدخل الامامي
و الغرفه رقم 3 : غرفه بدون حمام خاص ولكن ساكن الغرفه رقم 3 يضطر انه يستخدم الحمام الموجود بالمدخل (الصاله)
انا والشباب قسمنا الغرفه الى 3 اجزاء .. بحيث كل واحد من الشباب يسكن في غرفه من اللي معهم حمام ... وانا سكنت بالغرفه الوسطى واستخدم الحمام اللي بالمدخل (لكن المدخل والمطبخ ملك لي)
لكن صرت انا منزعج لأن لو سهر الشباب عندي لازم انتظرهم لين يرحوون علشان اقدر انام
اخليكم مع صور الفيلا
~~~
هذا المدخل الرئيسي (المدخل الامامي) ويدخلك على الصاله والغرف الثلاث : عاليمين وعاليسار الغرف اللي فيهم حمام خاص ,, وبالنص الغرفه اللي بدون حمام خاص
هذي الصاله وفيها جلستين
وهذا الغرفه رقم 1 (لاحظ لها باب ثاني عالشارع)
وهذا الغرفه رقم 2 (لاحظ لها باب ثاني عالشارع)
وهذا الغرفه رقم 3 اللي بدون حمام خاص ولها مدخل واحد من المدخل الامامي (مافيها شبابيك)
وهذا حمام الصاله ويستخدمه ساكن الغرفه رقم 3
خدمة الغرف يجونك يوميا ينظفون الغرف ويغيرون الشراشف وهذا بدون رسوم ,, لكن لو بغيت تجيب طباخه (وتنظف بنفس الوقت) تجلس عندك 24 ساعه تحتاج تدفع 250 درهم اضافيه وهذا متعارف عليه في اغلب الفلل ,, لكن اذكر في الدرقاوي كنا ندفع 100 درهم وهذا الكلام في 2009 .. لكن في 2013 كان المبلغ من 200 الى 250 بالكثير
من الايجابيات
1. تعامل راقي جدا من جميع الموظفين (حارس المنتجع + خدمة التنظيف + المساج + روم سيرفس + الاستقبال) ,, ومافيه احد طلب مننا اكراميه/بخشيش ولا غيره ,, ولكن حنا تعطيهم من طيب خاطرنا من وقت لوقت
2. امان داخل وخارج المنتدع ,, مافيه درك ملكي ولا شرطه يتنطط لك عند المدخل ,, ولا فيه سيكورتي يطلبك حاجه
3. الغرف نظيفه ولكن مثل جميع المنتجعات يكثر فيهم البعوض بسبب وجود الاشجار فانصحكم تاخذون معكم مبيد حشرات (بف باف او غيره) وفيه خدة رش من الخارج ولكن ماتقضي بشكل تام
4. المويه البارده والدافيه متوفره وما تنقطع
5. خدمة المطعم 24 ساعه ولو تبغى يوصلون لك شيشه او جمر الى الفيلا
6. وجود سهره داخل المنتجع لكن ما اشوف زحمه فيها
من السلبيات
1. غسل الملابس غالي جدا (القميص يكلف 50 درهم مثلا)
2. لاحظت في جميع منتجعات المغرب انعدام ثقافة الصيانه الدوريه للمباني ,, ونظام الصيانه عند الطلب .. وهذا شيء ينرفز ويضايق لما كل شويه تتصل عليهم تطلبهم يصلحون لك حاجه .. من الامثله :
- في غرفتي كرسي المرحاض يتحرك كله ومو مثبّت بالارض ,, اتصلت عليهم وجاني المهندس وشافه لكن ما صلحوه
- تلفونات الفيلا كلهم ما يشتغلون ,, و عبدالرحيم قال لي ان المشكله من اتصالات المغرب مو منهم ,, ولكن صاحبنا بالغرفه الثانيه كان تلفونه يشتغل
- باب الفيلا اول ما وصلنا مايتقفل ,, واتصلت بعبدالرحيم وثاني يوم جاني المهندس وغير القفل ,, لكن ما ركبه كويس وصار المقبض مرتخي (شوف الصوره)
- منظر شطاف الحمام صراحه مقرف في احد الغرف (شوف الصوره)
- الثلاجه اختربت اخر يوم والسبب ان ما عليها صيانه
- باب الغرفه رقم 3 مايفتح من الداخل ولازم احد من الخارج يفتح لك !!! (شوف الصوره)
اتمنى اني اكون وصلت لكم الفكره مثل ماهي عالواقع واتمنى لكم طيب الاقامه فالمنتجع وهو اختيار موفق