السلام عليكم والرحمه وبركاته
اكمل تقريري واختصره بيومياتي في المغرب الحبيبه
اليوم الرابع بتاريخ 3/3/2014
كالمعتاد صيحنا بدري لان اليوم هو التيشك اوت من رياض زوله :(((((
ولان اخر يوم لنا لازم نروح نخلص الشوبينغ لان ما بنحصل مثل البضاعه الموجوده في اسواق جامع الفنا
افطرنا اليوم بعد مقابل المسبح
يقدمون لنا السويت ( الحلا ) قبل الاكل
يارباااه لذيذ الخيز الفرنسي مع الجبن المبروش
الحمد لله على النعمه
اتجهنا الى السوق وبالاخص سوق بهجه في جامع الفنا
وصلنا للمكان المنشود عنده اشياااء حلوه تجنن وعليكم بالمكاسر الى اخر نفس ( مب شاطره في هذي السوالف )
نودع السوق والجو روعه مغييم
دخلنا الاغراض اللي شريناها في الشنط..
وعلى الساعه 11.30 سوينا التشيك اوت سلمنا على مديره المكان فاطيمه وعلى جميع العاملين
وشكرناهم على حسن الضيافه
صاحبتي همست في اذني بتصيحين هالمكان
طلعنا من الرياض في طريقنا لباب القصور ..ينتظرنا السواق الى...
طلب لنا الرياض تاكسي كبير بقيمه 100 درهم..متجهين الى *****
نفس تاكسينا
الى اللقاء يا مراكش الحب..
دعاية شركة اتصالات في الطريق
وصلنا المطار
بعد البحث الطويل والتواصل مع شركات تأجير السيارات
في منهم من رد علي وبعدين اختفى بدون ما يعطيني اي رد وفي منهم ما عطاني رد
فقررت اتوجهه الى الحجز اون لاين ( الطريقة الأممن بالنسبه لي )
التفاصيل
حجزت من موقع
Cheap Car Rentals, Best Prices Guaranteed! - rentalcars.com
الصراحه اول مره اتعامل مع الموقع وكنت متخوفه منه جداً
توكلت على الله وحددت التواريخ اللي ابغي فيها السياره وهي من 3-6/3/2014
اخترت سياره كبيره ( بيجو 508 او تشابهها ) ودفعت قيمة التأمين الشامل وضرائب الطريق وضرائب المطار
السعر: 1604 درهم إماراتي..تم خصمها على طول من الكرديت كارد
بعد ما حجزت وصلني ايميل من الشركة انتظري 48 ساعه لين ما نحصل الشركة اللي تقبل بالسعر اللي شريتي به
هني انا احبطت.. وتوترت قلت شنو هالشركة..ونصبه وغيرها
بعدين قلت انتظر 48 ساعه اذا مافي شي بتواصل معهم
بعد 24 ساعه وصلني ايميل باسم الشركة وهي Locationauto
فتحت الفاوتشر وبعدني مب مطمنه
مكتوب ان لهم فرع في صاله القادمون الطابق الثاني بمطار مراكش
دخلت على موقع مطار مراكش ومب موجوده
اتصل على الرقم الموجود محد يرد
الحجز تم في 15/1/2014 يعني قبل رحلتي بشهر ونص
بعد كم يوم رديت اتصلت والحمدلله لقيت الرد واكدد لي المعلومات
المهم وصلنا المطار التاكسي نزل اغراضنا وتلاقنا حمال شنط..
قلت له كم تبي قال اللي يطلع منج..سالته اكثر من مره ورد نفس الجواب.قلت له بعطيك 20 درهم بس ووافق
دخلنا المطار
وكان بانتظارنا
المطار من الداخل..صاله القادمون
هذي اللوحه في كل مطار من مطارات المغرب بتشوفها..فكره رائعه لتوفير لطاقه
اخذنا الشخص اللي ينظرنا لخارج المطار للسياره بدون اي اجراءات نعملها داخل المطار
مشينا إلى اخر مواقف السيارات ..وكان المسؤل موجود عند السيارات اللي بيأجرها
الشخص المسؤول كان قاعد بالسياره ..وما كلف على نفسه يطلع برع السياره يخلص الاجراءات...شغل مب بروفيشنال ابداً
طلب مني صورة الليسن والجواز وعبأ الورقة
بعدها طلب مني الكرديت كارد لحجز مبلغ التأمين..سالته كم بتحجز قال 25000 درهم مغربي اي 2500 يورو
احتجيت قلت له المبلغ جداً عالي..استاجرنا من اوربا سياره احسن عنها ولمده اطول ما اخذوا علينا 2000 يورو
قال لي الاجراءات عندنا جذي ويكلمني من طرف خشمه
قلت امري لله باخذها لان سعرها مدفوع مسبقاً عطيته البطاقة واخذ المبلغ
سالته اذا صار حادث لا سمح الله كيف بتصرف..قال لي اتصلي على هالرقم بس وانا بخبرج بالاجراءا..انزين خبرني الحين عشان اعرف اتصرف..رفع ضغطي
قلت له تاميني شامل..قال نعم التامين شامل بس اذا صار حادث انتي تدفعين وتطالبين الشركة اللي حجزتي منها تدفع لج مبلغ التأمين؟؟!!!
قلت وين بطاقة الشارع السيار لانه مذكوره بالحجز
قام يستهبل وقال انا قريت الجمله ومافهمتها واحنا ماعندنا هالنظام مب مثل اوربا وممكن تطالبين الشركه بسعرها!!
اخذت اوراقي منه..والسياره بعدها مب جاهزه يغسلونها
مع اني حاجزتها الساعه 11 الصبح يعني لازم تكون جاهزه..وصلت الساعه 12 الظهر وعلى بال ما خلصنا الاجراءات وصلت الساعه 12:30 الظهر..وسجل بالورقة اني استلمها الساعه 11.00 االظهر
سالته لو رجعتها الساعه 12.30 او 1.00 الظهر قال بينحسب عليج يوم كامل وسعرها لليوم 800 درهم
انغشيت الصراحه واخر مره اتعامل مع جذي شركه..الشركات العالميه افضل في تعاملها
واخر مره احجز من هالموقع الفاشل
استلمني شخص ثاني عطاني مفتاح السياره واوراق السياره..ونبهه علي بان لا المفتاح ولا الاوراق تضيع
شيكت معاه السياره وللاسف السياره دمار كلها ضربات وشمووخ..فكنت معاه على كل شمخ صغير عشان يسجله
بعد هالمعامله ما أمنت في هالشركة
.gif "Morocco 5 (57)")
السياره وبعده يغسلها..ومع ان غسلها بس ضلت وصخه..مب مغسله عدل
صورت كل الضربات والشموخ بالسياره عشان اذا صار ما صار الصور خير دليل
صاحبتي عصبت اكثر مني على المعامله..فهديتها عشان ما يخترب يومنا
توكلنا على الله ..ركبنا النفقيشن GPS صديقنا بالسفرات
وانا في بالي الف سؤال وسؤال اشلون بسوق في الزحمه اللي شفتها واشلون بتصرف
لازم تكون فاتح كل حواسك..تنتبه للسياره اللي بجانبك واللي بتدخل عليك..وتنتبه على الناس اللي تشوفها في نص الشارع والاشاره خضرا..وتنتبه مع اصحاب الدرجات وتنتبه اهم شي من الدرك اللي مزروعين في كل مكان
طردت كل هالافكار من مخي وتوكلت..قرينا دعاء السفر
اول شي توجهنا لمحطة البنزين عبيناها ديزل
بعدها توجهنا الى المزار مول..نتشرى لنا بعض التسالي للطريق واهم شي ناخذ شنطة للمشتريات اللي شريناها شنطنا ما تتحملها
المول من الداخل
خلصنا مشترياات,ومسكنا الخط..متجين الى مدينه الصويره
محطة المقطار بمراكش
شفت بالصدفه صالون ديسانج..وتحسفت ان ما عرفت عنه من قبل
له فروع في باريس والبحرين وقطر..شغلهم روعه
لوحات تعريفيه
طبعا GPS الحبيب خذاني في الطريق الزراعي والسبب انا يوم اخترت الاحداثيات اخذت الاقصر وقت بدون ما اطلع الشارع
فقلت لعله خير..
نهاية مراكش كان في نقطة تفتيش..ياساتر
وقفني الشرطي على جنب
طلب اوراق السياره..عطيته الظرف اللي عندي..رفض يستلمه قال لي عطيني ورقه ورقه
استغربت من التصرف!!!
قلت له ان شاء الله..انا ماشيه على السرعه المحدده..ولابسين الحزام
على طلبه عطيته ورقه ورقه ومن ثم طلب الليسن والجواز عطيته
سالني وين رايحه قلت له الصويره
تم يتبسم وانا مسويه عمري مثل الهبله..سالني تعرفين فرنسي قلت له لا بس انجليزي
قال همممم وهدر هدره مغربيه..وسالني فهمتي علي
ضحكت قلت له الصراحه لا..
سلمني الاوراق وقال لي تاكدي منها..وتوكلي على الله
لازم هالتعطيل يعني؟؟!!!
تحركنا
صور من الطريق
لافته موضح عليها ان نحترم المسارات وما ندخل في مسار الدرجات..ما اعرف ليش ما خلوها بالعكس هم ما يدخلون مساراتنا!!
بيك اب حامل قرع للكسكس..والكثير من تجاوز الشاحنات والشارع رايح راد
معصرة الزيتون..وكثير لقينا منها بالشارع
وقفنا عند هالمطل الطبيعي
نكمل
الحمدلله بعد رحله دامت 3 ساعات خاليه من المنغصات ما عدا بدايتها وصلنا للصويره
حطيت احداثيه سوفيتيل الصويره وطلع لي هالفندق
في طريقنا للميناء مثل ما اتفقت مع الرياض
وصلنا للميناء
وقفنا ورى هالسياره بانتظار احد يجي ياخذنا من الرياض ويورينا مكان مواقف السيارات
الموقف كان بجانبنا..اوقفنا السياره فيها وسعر الموقف ليوم كامل 2 يورو بمايعادل 20 درهم مغربي
شنطنا اللي كل يوم تتكاثر :(((
محلات تبيع السمك الطازج وتحضرها على حسب طلبك بجانب المينا وعند مواقف السيارات
بوستر لشركة تسوي رحلات
خالي اصبر شوي لا تركض..نبي نصور ونلقط نفسنا هههه
ساحه المينا
مسكين انصدم من الشنط..عور قلبنا ههههه
.gif "Morocco 5 (105)")
الهوا كان جداً جداً جداً قوووي..زين ما طيرنا ( لازم مدينه الرياح بس ما توقعنا جذي )
2014-03-31, 03:15 AM
.gif "Morocco 5 (97)")
.gif "Maroc (1033)")
.gif "Maroc (1147)")
استمتعنا بهالجزء وننتظر الباقي
العرض العادي
الدرهم المغربي مقابل عملات الخليج