السلام عليكم والرحمه وبركاته
نكمل التقرير
اليوم الثالث 2/3/2014
صحينا اليوم بدري على الساعه 7.00 صباحا لان موعدنا مع الشركة اللي بتاخذنا الى اوريكا الساعه 9.00 صباحاً
ولان احنا بنات ونحب نتسحب ونتدلع ما وعينا الا الساعه 8.30 واعلن حالة الطوارئ
باقي نص ساعه وما تكفينا للريوق..بس لازم نفطر
طلعنا من الغرفة وطلبنا فطورنا اليوم امام المسبح
وخبرت محمد ان احنا مستعجلين بسرعه جيب الفطور
هذي الصورة تذكرني بالبيت العود
حيــاكم
بسم الله
8.50 وصلني تلفون من الشركه وين انتو
قلت له نفطر قالي استعجلي الساعه 9.00 لازم تكونين واقفه عند باب القصور
وناكل بسرعه بسرعه
قبل ما نطلع اكدت على الريسبشن بان يكون السواق جاهز الساعه 8 المسا عشان سهره الليله
حرق تلفوني من الاتصالات ,, مره اسوي عمري مضيعه ومب عارفه الدرب عشان اكسب وقت
ومره ما ارد عليه,,وكنت خايفة يروحون عنا
وصلنا باب القصور الساعه 9.20 صباحا >> مواعيد عرب
تاسفت من الاجانب وتأفأفو في وجهنا
قلت ماعليه بعدين بنعدل العلاقات معاكم ههه
هذا سواقنا
متجهين صوب ساحه جامع الفناء لاخذ ناس منها ( اذا سكنت في المدينه القديمه اجباري يوميا تمر على هالساحه )
الساحه فاضيه
الله يرزقكم بالرزق الحلال ياربي
صور من طريقنا لأوريكا
دخلنا بعض القرى
وصلنــا قرية البربر
دخلنا احد بيوت البربر ( البغبغ بالفرنسي
)
هني عزك الله مكان للبقر والدواب ( الريحه قاتله زين ما اغمى علي )
مرتاحه المسكينه
الاجانب عندهم فضول عجيب..ما تهمهم الروايح زين ما دخلوا عن البقرة يتصورون معاها
محمد المرشد السياحي لنا,, ماشاء الله عليه يتكلم 7 لغات
فقلت له عطني مخك احكه بمخي يمكن اقدر اتكلم 3 لغات ههه
المهم محمد تم يكلمنا بالانجليزي نظرا للقروب اللي معانا,, فاصيرينا انه يعرفنا على المكان بالعربي
قلنا له نفهم انجليزي ..بس احنا عرب كلمنا عربي والكلمه اللي تستصعب عليك ممكن تنطقها بالانجليزي
مجلس خارجي
مجلس داخلي
المطبخ
الكل داخل...اهم شي البطن
الست زهره سوت لنا اتاي مغربي اتوقع بالمراميه ..ما ذقته مثله بالمغرب..صج صج لذيذ
هذا بيت النحل,,بعد ما يتكون العسل يولعوا النار من الطرف الثاني عشان يظهر النحل وبجذي يستفيدوا من العسل..اتوقع بيكون smoked honey ههههه
صب لي من القهوه فنجان
منظر لبرع المنزل من الاعلى
سبحان ناس عايشة في بيوت طين!!
المطبخ الثاني في البيت
وصل محمد ومعاه زيت الارغان والعسل والزبده والخبز يمممممممممي
صب الشاي
يوزع علينا الخبز
وبعد الانتهاء سالنا بلطف ان نحط اي مبلغ مالي للسيده زهره
كبير البيت قعد من قيلولته وطلع يسلم علينا
كان البيت فاضي وفي لحظة ما دخل علينا 3 قروبات..ازحموا المكان
طلعنا من البيت وتمشينا في السكيك ( الزنقات ) الرمليه والطنيه..شعور رائع لا يوصف
باب احد البيوت
افتح ياسمسم ابواككــ نحن الاطفال
حي اليهود..وفي الصوره بيوت احد تجار اليهود اللي تركوا المنطقة
محمد يشرح لنا
اطفال المنطقة..ويتكلمون عربي ويفهمون لنا..وعلى كلام محمد تم ادخال منهجج اللغه العربيه واجباري ويتم تدريسه في مدراس البرير
خلصنا قرية البربر منطلقين لمكان ثاني
في كل مكان بتشوفون الفخار..اشكال وانواع >> يعني هذا كيف نشحنه بيتكسر
سبحان الله الارض خضرا
وقفنا عند هذي المحطة للي حاب يركب الجمل او يتصور
تحركنا ووصلنا إلى الجميعه التعاونية لصناعه زيت الأرغان
في طريقنا للجمعيه
غبر علينا
واخيراً وصلنا,, طبعا اخر الواصلات..القروب سابقنا ب 5 دقايق
استلمتنا هالبنوته المرشده,,وكانت تتكلم خليجي معانا
الحريم
الارغان قبل عصره..ويتم الاستفاده منه بشكل كامل حتى القشره يتم استخدامها اذا ماخاب ظني يورون الضو بها
بعد الجولة التعريفيه..قعدنا في هالمكان لعرض المنتجات علينا مع الضيافه البسيطة
دخلنا داخل عشان نتشرى الاشياء اللي عجبتنا..
عندهم عجينه اللوز بزيت الارغان..شي مو طبيعي
والاسعار غاليه مب رخيصه
جيل المستقبل
صور منوعه للمكان
الخيمه اللي قعدنا فيها
احدى المرشدات بتقدم الضيافه لاحد المجموعات القادمه
زحمه
صاحبتي تلاحق القطاوه ( القطط)
فوق السطح
ياسلام على هالجلسه في وقت غروب الشمس واتااااي
ياحافظ يصير نسرق الفكره ونسويها في بيتنا!!
ودعنا الحريم والبنات
صور من الطريق
المطاعم منتشره في كل مكان
جلسات ترد الروح على نسمات بارده
النهر جاري
وقفنا عند احد الجسور المعلقه..انا وصلت لنصه..صاحبتي قالت الروح مره وحده ( خوافه ) وقفت على طرف الجسر وصورت
الشواب اللي معانا مغامرين..ما تم بالعمر شي يجربون كل شي
ركبنا الفان
وصلنا للمطعم
منظر النهر من المطعم وفيه جلسات بالاسفل قريبه من النهر للي حاب
يتأمل
هالقطوه ما خلتني اتهنى بالمكان تمشي تحت رجل >> اخاف من القطاوه
غدانا..ألحمد لله على النعمه..المنيو محدود جدا اخذنا نفس الشي
الشباب..اقصد الشواب راحوا للشلالات..احنا ما رحنا ..
الركبه تعبانه
طلعنا نتمشى في المنطقه ونكتشفها..
محمد المرشد اصر يمشي معانا عشان محد يتعرض لنا وتصير لنا مشاكل
شكرناه بلطف وقلنا له اذا احد ضايقنا بنتصل لك
المحلات التجاريه..وغاليه جداً
صور للنهر والجلسات بالاسفل
نتمشى بالمنطقة
واحنا نمشي انفتح خيط الجوتي الله يعزكم ويكرمكم
وكنت واقفه يم مطعم..فقعدت على الكرسي عشان اربطه..طلع لي الجرسون
قال لي ادفعي..قلت له ادفع شنو؟؟!!
قال لي قيمه جلستك على الكرسي ؟؟!!!!
طنشته ومشيت...يستغفلني؟؟
ومره وحده تغير الجو ..وشمينا بالجو مطر..
الدنيا بارده واحنا مب ماخذين احتياطنا في هالسفره كلها..
الكل قال ان الجو ربيعي فاخذنا ملابس خفيفه..ندمنا
ملينا من كثر الروحات والردات ..المكان مافيه شي
تذكرنا ان عندنا خنفروش.. طلبنا معاه اتاااي
وبعدين وزعنا على الناس الموجودين بالمكان..
وحده عيوز حليلها عطينها..وطلبت تعطي عيالها ..قلنا لها اخذيه كله
عزمتنا على الغدا اللي عندها...كرم كبير منها..شكرناها وقلنا لها بالصحه
واتموا علينا شباب اعمارهم 18 سنه كانوا قاعدين مع المرشد
واحد يقول انا تعلمت الخليجي من كثر ما اشوف قناه MBC هههه
تاخروا جماعتنا فوق الشلالات,, يرجعون لنا الصاع صاعين هههه لان تاخرنا عليهم بالصبح
وتمنيت لو دفعت اكثر ويكون السواق تحت امري..متى ما شبعت من المكان اتحرك
وصلوا الشواب ..اقوى عنا
تحركنا وصلنا الرياض الساعه 6.30 المسا..يعني جدامنا ساعه ونص للراحه قبل السهره
يا محلى الروووز