تقرير حول رحلتي الأولى إلى مراكش في تاريخ 1 أغسطس ولمدة عشرة أيام
 

بسم الله الرحمن الرحيم
بداية اتقدم بخالص الشكر لأعضاء منتدى المزاعيط الذي كان لي العون بعد الله سبحانه وتعالى في معرفة الكثير من الأمور وكيفية التعامل معها .
ثانيا : شكر خاص للأخت ( شيخة المزيونات ) على تعاملها الراقي والصدق والأمانة في كل شي .
ثالثا : شكر وخاص للأخ ( محمد العثماني ) المسئول في منتجع النخيل الدرقاوي على لطف تعامله وأخلاقه العالية وتقديم كل العون بكل رحابة صدر .
وأحب أن أتكلم عن تجربتي في أربع نقاط هامة من وجهة نظري للفائده لجميع المزاعيط وهي :
* الطيران
* الأمتعة
* السكن
* شارع كليز

وسوف اتكلم عن كل نقطة لوحدها .. شاكر للجميع مرورهم مسبقا وتفاعلهم .

مرحبا بييك… حمدلله على سلامتك… ومنور منتدى… وياليت كل المزاعيط يحذون حذوك ويسردلنا مواجهه في السفر وانطباعاته… لكي يستفيد الجميع ..ولكن للاسف اغلبهم قبل السفر منهمك في كثر الاسئله ولما ياتي ب السلامه… لايتكلم ولو بانطباعاته عن المغرب وبعض من نصايح ..وايجابيات وسلبيات الي قد تواجهه… تحياتي لك ومتابع تقريرك ونصايحك…

شكرا لك حبيب قلبى سكر وإن شاء نقدر نفيد إخواننا المزاعيط

تكملة المشوار رحلتي :
* الطيران :
كانت الخطوط هي ( المغربية ) وكان خط سير الرحلة من الدمام - الرياض - كازا - مراكش وهو نفس خط الرجعة .
بالنسبة للطيران المغربي كانت الطيارة جدا جميلة ورائعة ومقاعد الطائرة مكونة من 2-3-2 وكانت الرحلة مباشرة من الرياض الى كازا
العيب الوحيد في الطيران المغربي هو ضعف الخدمة كتقديم المشروبات وغيرها .. يتم تقديم الخدمة بداية الرحلة ثم تترك الأمور على كيف الركاب هههه .
عموما كانت رحلة مريحة بالطيارة كنوع وحجم الطيارة .

هذا بخصوص الطيران .

تكملة بخصوص الطيران الداخلي المغربي :
كانت رحلتنا من كازا إلى مراكش بالطيران وانتظرنا تقريبا خمس ساعات في مطار كازا .. وهذه من أخطاء الرحلة.. وبعد الانتظار غادرنا إلى مراكش في طيارة صغيرة ( أم مرواح ) صراحة كانت مخيفة ومتعبة جداااااا . رغم قرب المسافة وماصدقنا ان نوصل بالسلامة إلى مراكش .
نصيحتي للطيران :
مانصح بالطيران الداخلي نهائيا .. خصوصا إذا كانت الطيارة أم مرواح هذه .. عكس سبحان الله رحلتنا الداخلية من مراكش إلى كازا .
كانت الطيارة كبيرة وماحسينا بالخوف مثل الطيارة السابقة .
الأفضل خذ سيارة من كازا إلى الجهة المراد الوصول لها وهذه نصيحة .

هلا و غلا نورتنا و الشكر موصول لك ما عملنا معك الا الواجب و قصرنا بعد

رأيتك بيضاء اخت شيخة المزيونات .. ما قصرتي معاي وكنت نعم الأخت وفيه وصادقة وتبحثين عن الشي المناسب .. شكرا لك من القلب .

السلام عليكم صح التكسي احسن وهم تشوف مناظر طبيعيه بالدرب

كلامك صحيح اخوي ادرس ... ولعل المزاعيط يستفيدون منها

تكملة رحلتي والنقاط الهامة :
* الأمتعة ( العفش ) :
كانت الرحلة من الرياض الى كازا ومن ثم مراكش .. وصلنا للكونتر اللي في الرياض وقص لنا البوردنغ لكازا ولمراكش .. قلنا نبى نأخذ الشنط في كازا .. قال أطلبها منهم وراح يعطونك .
المهم وصلنا كازا طلبنا الشنط قالوا مانقدر نعطيكم أنتم رحلتكم إلى مراكش .. طيب يا جماعة الخير حنا أصحاب الشنط ونحتاجها .. قالوا لا تاخذونها من مراكش قلنا اوكي .. وصلنا مراكش .. ننتظر الشنط قالوا الشنط في كازا ماوصلت .. يا جماعة الخير ما يصير هذا الكلام .. قالوا ما وصلنا شي والشنط بكازا ..
كتبنا شكوى عند مسئول الأمتعة بعدم وصول الشنط .. قلت لصاحبي نروح نستلم السكن ونشوف .. استلمنا السكن ( له حديث خاص ). جلسنا بدون شنط .. واستلمنا السيارة من ( شيخة المزيونات ) قلت نروح كازا كلها 250 كيلو .. قال اوكي .. وصلنا كازا بالسيارة .. قالوا وحده من الشنط وصلت مراكش .. قلنا الحمد لله .. طيب الشنطة الثانية .. قالوا ماوصلت ويمكن تكون في الرياض .
طبعا سلمناهم الشكوى وقلنا مستحيل وهذه أوراق الشنط .. المهم بحثنا عن الشنط بأنفسنا ماوجدنا شي .
قلنا خلاص نروح مراكش والله يعوض علينا .. طبعا الشنط اللي وصلت مراكش هي شنطتي هههه وشنطة صاحبي ماوصلت .
رجعنا مطار مراكش واستلمت الشنطة .. وقلنا نروح السكن نرتاح وبكره نشتري ملابس لصديقي .
كنا جالسين بقهوة قصر النخيل .. وجانا اتصال من مطار مراكش على الساعة الثانية الفجر بوصول الشنطة .. ومن الفرحة .. نسينا نأخذ الجوزات ..وصلنا المطار .. وقالوا لنا لازم الجوزات .. قلنا يا جماعة الخير كنا عندكم وتعبنا مانمنا ونحن نبحث عن الشنطة .. المهم تعاطف معنا المسئول وقال استلم الشنطة .. كأننا أخذنا مليون ريال من الفرحة ههههههه .

خلاصة الأمتعة ( الشنط ) :
* كثير من الأشخاص يفقدون شنطهم وهذا فقط في الخطوط المغربيه .

* الشنط نصيحة استلمها من مطار كازا حتى لو كان عندك رحلة داخلية إلى مدينه ثانية .

* اتخذ الإجراءات الرسمية بتقديم شكوى رسمية لمسئول المطار حتى يتم الاهتمام بالموضوع أكثر .

* نشكر المسئول الموجود بمطار مراكش على اهتمامه وتواصله معنا

* هذا بخصوص الأمتعة .. والتكلمة مع السكن في وقت لاحق ان شاء الله .

تقبلوا تحياتي .