تجربه سيئه مع ابن بلدي .. للاسف
مساء الخير
في اخر سفريه لي للمغرب العام الماضي
كنت في مطار الملك عبدالعزيز بجده .. وكنت منتهى من شحن الشنطه وتختيم الجواز وقص البوردنق
وجالس اشرب لي قهوه واقلب في جوالي في مقهى المطار
ومن قرادة حظي رفعت راسي اناظر في الناس
ووقعت عيني على شخص جالس بطاوله جنبي
ناظرني وابتسم وسلم علي رديت السلام
وليتني ماابتسمت ولارديت السلام
نادني قال وين رايح ليتني قلت المريخ او السلفادور او جزر هاييتي
قلت له المغرب
قال يعني خوينا وقام وهو يسولف وجا جلس معي
وقام يعطيني من الخرررطي حقه والحروب والجهاد اللي يعمله كل صيفيه
وقال انا انسان احب السفر لوحدي متعه وراحه نفسيه قلت حلللو
المهم قال انت وحدك لما حسيته بيلزق فيني قلت لا ينتظرني شباب هناك
قال ماعليه ماراح اثقل عليكم
اقلعنا واتجهنا للمغرب وطول الطريق يبربر صدع براسي
طبعا هو كبير سن بس شكله صايع مع مرتبة الشرف
وصلنا المغرب وكان فيه صديق لي مغربي ينتظرني بسيارته
وصلت لصديقي وقلت له معي واحد ناشب بحلقي ساعدني اتخلص منه
طووول الطريق واحنا متجهين لكازا يقول وين راح تسكن ولازم امر عليك ومن هالكلام
وقفنا في شارع فيه صرافين وانطلق بسرعه امامي للصرافين
وبعدين جاني مسرع قال تعال لقيت لك صراف هنا رخيص
لما سألت الصراف بكم تصرف لقيته زود الرقم عشان يتقاسمه هو والحرامي اللي جاي معي وابن بلدي وطول الطريق مسوي صديقي
قلت اذا انت ثور وهذا بقره انا انسان وفاهم ولا انت ولا هو ولا عشره من اشكالكم يلعب علي
وانت ياوجه العنز من الان انقلع لا اشوفك تروح معي ولاتركب معي
وانا ماراح اصرف هنا
ثم مشيت انا وصديقي المغربي ورحنا لصرافين بشارع ثاني وصرفت من هناك
بصراحه حسيت بقهر من هذا الادمي الكبير بالسن اللي فاكر الناس لعبه وممكن يضحك عليهم
وحتى صديقي المغربي تفاجأ بالموقف وقال معقوله فيه ناس تغدر في بعضها كذا عيني عينك
ادري قصه قديمه ويمكن مالها داعي
بس حبيت افضفض فيها هنا وان لاتثق في اي احد بسرعه
ودي وتقديري