حآلياً في مراكش ، تجارب ومواقف وبعض المشاكل !
 

بالخير جميعا نفر نفر ، ان شالله الجميع بخير ..

هذا رابع يوم لي في مراكش وحبيت انقل لكم بعض مشاهداتي وملاحظاتي حتى الآن وتعاملي مع بعض الشركات والجهات واللي بعضها موثق في المنتدى . واذا استجد شي راح اكتبه في هذا الموضوع ..

وكالة بداية ( شقة من غرفة واحدة في قيليز ) : اطفاء الكهرباء بدون استئذان او طلب او تنبيه على الرغم ان مستوى الصوت هو صوت التلفزيون ( وهذا كان اتفاقنا ان يكون الصوت بمستوى التلفزيون ) لكن السبب الحقيقي هو انه طلب العساس اكرامية من الضيف وبكل قلة ادب يطلب منه ان يطلبها مني وعندما رفض الضيف حب العساس يسوي هالمشكلة ، مع الاخذ بالاعتبار انه كان شرطا اساسيا من شروط الحجز لديهم عدم طلب اكراميات للدخول باي شكل من الاشكال واكدو لي على هذا لكن عكرو جوي ليلة البارح ، كذلك تاخر ريموت الباركنق ولحد الان ادفع رسوم باركنق الشارع ، ايضا اعطوني شقة اخرى اول ليلة غير الصور بسبب تمديد صاحب الشقة التي كنت حاجزها لكن من يوم الغد نقلوني للشقة المطلوبة . الشي الايجابي يمكن تعامل الاخ انس لطيف ومهذب .

الياسمين : طلبت بعد السهرة اخراج كولا وسبرايت مع العصير وعند السيارة بعد اعطاء اكرامية ٢٠ ترك الكولا مفتوح وسحب السبرايت معه وهذا ماتسبب في ان سيارتي كلها تبللت بالكولا .

النرجس : جميل جدا لولا طلب الاكراميات من العاملين رغم دفع سعر الطاولة كاملة يعني من المفترض اكون مخدوم من دون الاحراجات والطلبات الزايدة اذا بدفع اكرامية بدفع من طيب خاطر وليس من طلب .

الدرك : مخالفة اولوية الدوار رغم ان اللي في الدوار كان مهدي كثير يعني لو بجلس انتظره يمر بقعد سنة . عطيته مية وخمسين ومشاني .

ساحة بلازا قيليز : وقاحة الشحاذين تزداد يوما بعد يوم واستغلال الاطفال بحيث يرسلونهم عليك لانك ببساطة خليجي وبطريقة وقحة يتمسك برجلك او يسحب يدك ويقعد يبكي ويحطك بموقف محرج قدام الله وخلقه مما دفعني لدفعهم بعيدا في كل مرة بشدة .


عموماً كل هالاشياء مجتمعة تنفرني من مراكش ع الرغم انه باقي لي فيها كم يوم وبطلع اقادير باذن الله لعل وعسى يضبط الجو وتتعدل الاحوال ، مراكش لن اكرر زيارتها .

على السلامة اخويا اولا وتانيا انت كن صارم فيما يخص الشقة او انتقل الى اماكن اخرى هو مراكش لا ينفع فيها سوى للمنتجعات فقط ورغم دلك ضروري من اكرامية العساس . حاول تنسى اللي وقع وابدا بداية اخرى ربما حظك كان سيء لانك وين مارحت تلقى مشاكل.

هلا محمد ، انا ذكرت فقط المشاكل والا الايجابيات موجودة طبعا ، تعامل الشعب المغربي الطيب وسهرات الديوان الحلوة والجو الجميل حاليا هنا .. ذكري لهذه المشاكل لا يعني ان السفرة كلها سيئة لكن القصد انها تنفر السائح ،

نسيت نقطة :

الشمري كار : ماقصرو ابدا الاخ ابو سيرين و عبدو تعامل راقي وطيب وفي الموعد وبلا تاخير او مشاكل ، اوجه لهم شكري الجزيل من هنا .

الحمد لله ان شا الله تتعوض وتنبسط وتنسى اللي وقع. والشحادين طنشهم .
سفرة سعيدة اخي

ياكرهي لتعكير الجو بالاسباب هذي ... مثل هذا اللي جا يطفي الكهرب .. المفروض اخوي توصل شكواك لوكالة بداية بما انهم هم اللي ضمنو لك عدم المضايقات

بالنسبه لما حصل معاك في الياسمين ماعاد تملا عيونهم أقل من ١٠٠ درهم أنا آخر مره كنت سهران بالنرجس وجاني اتصال من السعوديه وضروري أرد فاضطريت أطلع برا ولما رقيت ووصلت الباب جاني سكيورتي وعطاني جاكيته لأني مخلي جاكيتي عالكرسي ولاحظ اني ماطلبته هو اللي جاني فلما خلصت من المكالمه رجعت له الجاكيت وعطيته من طيب نفس ٥٠ درهم جلس يناظرني مو عاجبته سحبتها منه وكملت طريقي وسحبت عليه وكملت السهرة

حتى الفنانين الحين ماعاد يفيد فيهم ٢٠٠ ولا ٣٠٠ لازم ترش عليهم وبعدها يتفاهم معك

كل سفريه تعلمك شغله جديده

اخر مره كنت فيها بالمغرب قبل جوج اسبوع
موقف جديد راح اخذه بالحسبان في السفريات
القادمه مهما كانت اغراءات العروض التزم بطلبك

طلبت داسيا سمبل وتفاجأت من المؤجر يشوّقني للهديه المقدمه وهي اكسنت اتوماتك ديزل للأسف قبلت السياره ودفعت اكراميات بسببها للبوليس والدرك لاسباب في السياره وليست في القياده ولله الحمد وهي مثلث السلامه غير موجود والاضاءه الاماميه غير متطابقه شمعه جديده وشمعه قديمه هذا غير ان الاكسنت بالقوه شالت الشنط في العوده

قبل تستأجر السياره شيّك على السياره من كل النواحي .

بكم استاجرتها وبمصاريفها بكم طلعت عليك في اليوم

ب٣٠٠ اليوم لمدة ١٠ ايام وتأمين ٢٠٠٠ درهم

المفروض اقل لكن مع تعب السفر كنت
مضطر عشان امشي على مراكش

تم تعبئة الديزل خلال ال١٠ ايام ب٤٠٠ درهم فقط