مشاكلنا بمراكش من الالف الي الياء .. يادافع البلاءء

بسم الله الرحمن الرحيم
السلام عليكم يالمزاعيط
مدري اكيف ابدا بسس الاكيد راح اكون صريح معكم
كانت مدة الرحله 14 يوم
العدد ثلاثه اول خمس ايام وبعدها صرنا 6
وصلنا كازا طلعنا شرايح وخذنا سياره صغيره ايجارها ب 350 درهم باليوم كان السعر مبالغ بشكل وهذا الي مايححز من قبل يلعب عليه بعدها قابلنا الادرك قبل ندخل مراكش قالو عندكم مخالفتين مسرع وخويك ماربط الحزام كويس قلنا نبي مخالفه يبي الفين درهم جلطني والي معي يقولون نبي نعطيك الف ونبي نمشي ويقول لا ابي الفين وانا قلت ولادرهم عطني مخالفه شافني اتهاوش مع اخوياي قال خلاص عطوني الف وصافي بعدها توجهنا للنخيل درقاوي كنا حاجزين من عندهم لطعونا من عشر الصبح لين 1 الظهر يقولون لين نفضي الفله لكم خذناه باليوم4000 ثلاث غرف بعدها اخوياي حطو فلوس القطه بالخزانه لان الخزانه بغرفتي يعد اليوم الاول اذا شغلنا اغاني علطول يدق الباب يقول قصر او عطني بخشيش غير الضيوف فوق الساعه 4 مافي دخول الا بمبلغ 200 درهم وفوق وقبل الساعه 4 الفجر 100 درهم ، المهم بعد ثالث يوم جو اخوياي يحسبون كم صرفنا ولقو الفلوس ناقصه فوق 5000 الف درهم تخيلو مااتهموني بالسرقه ولاتجرا احد يقولها بسس الي جلطنا البوكس ماحد يعرف رقمه الي حنا الثلاثه والخزانه بغرفتي انا دايركت قلت ياعيال والله ماقربتها ولاتوقعنا ابد الشغالات هم الحراميه ابد بعد ثالث يوم مسك البوابه وااحد شايب قال مافي دخول اي ضيوف نهائيا خذنا عفشنا وطلعنا لقيت عطري وساعتي مسروقه ، ورحنا لمجمع اتوقع اسمه قاردن ستي بالنخيل خذنا ثلاث غرف ب 3500 درهم باليوم كان مجمع لدرجه لو يدخل عندك ضيف طبو عليها ههههههههه والصاله صغيره جلسنا يومين لان جو ثلاثه من اخويانا جلسنا يوم كامل ندور فله كويسه مالقينا بعد تعب لقينا فله ست غرف ب 6000 الاف درهم ادري والله يتقولون غاليه بسس تعبنا من استغلال الحراس حقين المجمعات نبي فله خاصه ومانبي ازعاج وماصدقنا لقيتا المهم طحنا بشغاله نصابه وحارس سراق كل يوم ينقص غرض مره جوال ومرره كريمات ومره ملابس انا ماحد قريني عارفين لساني طويل ، اقول للعيال مشينا طلعنا ويردون يقولون لاتقروشنا قلت بكيفكم ودي اقولكم رحنا وطلعنا لكن للاسف من شارع محمد لين سهرات بالكلوبات الي الفله ههههههههههه

اخر شي يوم جينا نرجع السياره قالو الاستماره مو موجوده ادفع الفين درهم حتى وانت رايح يمصونك ..

تدرون وش استفدت من الرحله هذي :
وثق حجزك من سياره من فله قبل سفرتك بمده واسال عن كل شي وخل حجزك يومين جرب عشان ماتاكل خبور ...

ياليت دخلت هالموقع الجميل اكتشفت منكم ان نصكم مسروق فلوسه من البوكس.
لاتطلع مع ناس تدفع للرايح والجاي بخشيش ..
لاتثق بالشغاله ابد ابد ابد ابد ابد ...
اكشتفت السفر لحالي اجمل بكثيرر ...
لاتسكن بمجمعات خذو فله خاصه وريحو راسكم
اذا كنت لحالك اسكن باانجليز
يارب يقرا موضوعي واحد بيسافر وينتبه ..

واخيرا وليس اخرا ان المغرب جميله وفيها الطيب والخبيث وللاسف ماطحت الا بالوسخين بالسفره الاولى ..

سفرتي الجايه راح اعوضها ان شاء الله

الحياة دروس و ان شالله تعرضها السفره الجايه و تنبسط الدروقاي وضعه صار مو مثل قبل صار كله استغلال و خرابيط بس يالله الجايات احسن و افضل ان شالله

صدقت الحياه دروسس ...
ومشكور حبيب قلبي على المرور

معوض خير ان شاءالله
السفر توافيق من الله
لكنكم ابتليتم في سفركم والله المستعان

كل دقه بتعليمه
ومعوض خير إن شاء الله

الحمدلله على سلامتكم
و زي ما اتفضلوا الاخوان كل دقة بتعليمه و كل اللي سافروا للمغرب او اغلبهم ( و طبعا قلت المغرب لان الحديث هنا عن المغرب ولا هذه الامور تحدث في معظم البلدان ) قد مروا بتجارب و مشاكل مشابهه
و اهم شي انكم سالمين و واللي راح يتعوض
تحياتي لك و للجميع

__________________
لا تأسـفن لغـدر الـزمان لـطالمـا
رقـصـت عـلـى جـثـث الأســود كـلاب
لا تحسبن الكلاب تعلو برقصها
تظل الأسود أسود و الكلاب كلاب

الله يعوضك والجايات احسن

ايه والله بلوه عين واحد ماطلع معنا عسكري ههههههههه

انشهد كل دقه بتعليمه

عرفت المغرب من الدروس ومن المزاعيط الي هنا للامانه

حمدلله على السلامه جت بالفلوس ولاجت فيكم
المشكله ماهي منك ولاهي من اخوياك نقصكم الترتيب والتوفيق
انا حاس بشعورك ان لو رحت الحالك بتكون رحلتك اجمل لان اغلب تجاربك مرينا فيها لكن هي درس وحاول تكتشف الاخطاء اللي مريت فيها وتعلمها
وعلى فكره نقطة التفتيش اللي بمدخل مراكش الجميع مر عليه موقف السرعه وحزام الامان لو دخلت في عينه وقلت معي ١٠٠ درهم والا عطني مخالفه صدقني بيقبلها