انا توني راجع يوم 22 رحله شبابيه
جلسنا اسبوعين فيها ممتعه جدا
مدينه خلابه بطبيعه وبحر
والجو لطيف ويبرد مساء بعض الليالي
تحتاج جاكيت خفيف ويمكن ما تستخدمه
مرنا يومين رياح بارده شديده
وهواءها لطيف نسمة المحيط والمتوسط
تحتاج سياره اذا انت نازل في كازا خذها منه ارخص
بالنسبه للسكن ما اعرف بس للامانه مريت فندق فرح شفت
قروبات من اليابان وغرف مرتبه وفلل راقيه
وعلى البحر تطل
بالنسبه اصيله وانت جاي من كازا قبل طنجه 60 كم
تفرجت فيها روعه ومناظر يكفيك مرورها
وفيك تطلع باالاماكن بطنجه مغريه وطبيعيه تسحر عيونك
عندي صور بس للاسف ما تنزل
بالنسبه للاماكن كل كافيهاتهم مليانه جنس ناعم
وطبيعتهم راقين مثل كل مدن المغرب
ناس لطيفه بالتعامل
بالنسبه للمطاعم وهذي لا تفوتك لابد تمرها
مطعم العشاب بالبلد القديمه بتلقى اروربيين معك
نظام اطباق ينزلها لك كلها من الاعشاب مع الاكل البحري الطازج
يفتح 1-4 ظهر ومن 7-11 مساء زحمه عنده وصغير بس لذيذ جدا
كل شخص 200 درهم ولا يفوتك عصيرهم جونان
مطعم دار الناجي تراث مغربي تصميم متخصص بالطواجن المغربيه
كل شي طازج يعمل لك واذا حاب تاكل الكسكس يكون يوم الجمعه
واسعاره رخيصه وعاديه
عين الحصن تقريبا 35 كم بطريق تطوان اول ما تدخل ادخل اول مطعم يمينك
ذبائح معلقه وانت تختار ويشوون لك راقي وافضل الموجود بعد سوالي عنه رحت له
ما جربت الباقي
منطقة اشقار في على البحر شوي وجلسات حليوه وبعدها زر مغارة هرقل
بالنسبه لي لقيت ناس تسب الحمام المغربي بس جربته بصراحه قمة بالعمل
صحيح بدائي لكن النتيجه هي المطلوب وسعره زهيد تعطي من يقوم بخدمتك
تروح له باغراضك او تشتريها من عندهم رخيصه صابون منشفه ليفه وشورت
فيه قسم نسائي الحمام اسمه بوغاز جربته واخبرت الشباب اللي قابلتهم كلن يمدحه
وفرق عن حقين الفنادق مساج ومياعه
انتبه من المرور فيه كمرات وحافظ على القياده بحزام الامان وعدم استخدام الجوال
الكافيهات كثير ومن الخارج تعرف المضمون فيه جلسات على البحر مثل بانوراما
النت والخرائط شغاله واي مكان تبيه بس تحط اسمه يوصلك له
المدينه ابعد مشوار فيها عشر دقائق ومرتبه منظمه
محلات صرف العمله بكل مكان
ولا تنسى تاخذ من الحلويات المغربيه عدة محلات انا اخذت من محل حاتم الطي
حلويات مغربيه اصيله ومن مواد غير محفوظه وطازه
اتمنى اكون افدتك
واي استفسار حاضر