الفزعة يالنشامى

السلام عليكم ورحمة الله وبركاته


اول شي كل عام وانتم بمليون صحة وسلامة وعاد عيدكم بعد الزحمه


بدخل معكم في الموضوع دغري انا يالربع استخرجت تصريح زواج من المغرب وعشمان فيكم خير يالوجيه الطيبه خاصة اللي سبق لهم الزواج من المغرب انه يساعدني في انه يدلني على احد ويساعدني في موضوع البحث عن زوجة لان هاذا هو مربط الفرس وهو اصعب مرحلة لان هاذا زواج مهوب لعب والا التصريح موضوعه سهل بختصار انا سافرت لواحد في المغرب عن طريق معرفه والرجال صراحه ما قصر سوا كل اللي يقدر عليه لاكن للاسف ما لقيت مطلوبي مع انه كان معي وقت كثير والامور طيبه ولي رجعه مره ثانيه بس ما ودي اعود الا وانا موصى على احد يقدر يساعدني لان الموضوع بدون معرفه صعب جدا .


واللي حاب يستفسر عن موضوع التصريح بعطيه الزبده :


1. صورة من البطاقة


2.صورة من الجواز


3.برنت من الاحوال وتاخذه في وقته


4.تعريف من العمل


5.مشهد سكن موقع من اثنين شهود وتوديه للشرطه وتصدقه من العمده وتختمه من الشرطه وتاخذه في وقته


6.برنت من خلو سوابق من البصمات وياخذ ثلاث ايام واذا تعرف احد تاخذه في وقته


7.تقرير طبي للزواج وهاذا لازم من الشميسي وياخذ حوالي اسبوع واذا لك معرفه ثاني يوم تاخذه ملاحظه الفحص مسائي واذا خلصت تروح لمستشفى الامراض الصدريه يفحصونك ويختمون عليه بعدين ترجع للشميسي وتوقعه وتختمه من مدير التقارير الطبيه وبعدين المدير العام التنفيذي


8.صور شخصيه حاول تصور عشرين صوره


9.فيه تعهد خاص للزواج من المغرب توقعه وهاذا يوجع شوي لاكن ما دام النية طيبة بييسر الله كل امر


طبعا قبل كل هالشروط اهم شي لازم يكون العمر فوق 30 وغير موظف عسكري ولا في مكان حساس في الدولة وهاذي الشروط للعزوبي واذا عمرك اقل من 30 لا تتعب نفسك واذا هي مطابقه تروح لامارة المنطقة المتواجد فيها وهم يعطونك جميع الخطابات لكل جهه بعد ما تخلص ترجع لهم وتقدمها وتجيب معك ملف ويعطيك الاوراق تروح تفهرسها عند المكاتب الموجودة عند الامارة ولاتنسى الصور طبعا فيه اوراق ثانيه تعبيها وتخلي الشهود يعبونها ويوقعون وما يحتاج الشهود يجون وبعدين تروح للصادر تصدر الاوراق ويعطونك رقم المعاملة والله يستر عليك.


ملاحظة يجب عليك انك تحتفظ في كل رقم صادر ووارد


1.المعاملة جلست في الامارة 10 ايام من تاريخ تقديمها بعدين صدرت لوزارة الداخلية


2.المعاملة جلست في الداخلية 43 يوم من وصولها من الامارة بعدين صدرت لوزارة الخارجية


3.في حال انها صدرت من الداخلية للخارجية تعتبر موافقة وتنتظر حول اسبوعين وتوصل السفارة في الرباط


طبعا في حال صدرت لك الموافقة النهائية نقول مبروك والله يعينك تجيب جميع الاوراق مره ثانيه بحيث انك ترجع للامارة وتاخذ خطابات مره ثانيه وتجيب الاوراق مره ثانيه وتحتفظ فيها معك وتصورها كم صوره وتصدقها من الخارجيه لانها مطلوبه في السفاره لان الاوراق السابقه تحفظ في الحقوق الخاصة فاسهل طريقة ترجع للامارة وتسوي نفس الطريقة السابقة.





طبعا المعاملة مشت بدون اي واسطة نهائيا لا في الامارة ولا الداخلية مع انه لي معرفه فيهم كلهم بس كانوا ضد السالفه وخل عنك وكالة يقولون الصامل يتبع الاجراءات في حال الشروط مطابقة ما عدا البصمات اعرف واحد وطلع لي البصمات في نفس اليوم مع انه ما ياخذ ثلاث ايام والمستشفى طلعه لي ثاني يوم مع انه ياخذ حول اسبوع بس تخبرون الواحد عجل وعفاكم





بعد ما تنهي جميع الاجراءات وعزمت السفر تاخذ جميع الاوراق معك وتصورها كذا صوره وتصادقها من وزارة الخارجية وتاخذ صور شخصية ورقم القيد حق وزارة الخارجية وبالتوفيق


نصائح:


1. انتبه تتزوج بدون تصريح نهائيا لان فيه مرمطه ما بعدها مرمطه لان فيها سجن وغرامة ولا يستقبلون اوراقك الا بعد خمس سنين من زواجك شوف عيني من مراجعين قدامي في الامارة رفضو يستقبلون اوراقهم .


2. يفضل انك تسافر للبلد اللي حاب انك تتزوج منه وتعاشرهم وتاخذ انطباع عام عن البلد واهله قبل تقدم على التصريح مع انه يحق للواحد تغيير بلد الزوجة بحيث يجيب خطاب من السفارة الموجه له المعامله بعدم الاستفادة من التصريح .


3. وهو الاهم والاصعب من التصريح وهو موضوع البحث عن زوجة لأنك بدون معرفه بتتعب جدا حاول انك تبحث عن احد سبق له الزواج او احد يقدر يساعدك وبالاخر هي توافيق من رب العالمين.





واخراً يا اخواني وليس اخيراً اتمنى من الجميع عدم الخروج عن الموضوع وعدم التدخل في الحرية الشخصية للاخرين اللي عنده مساعده او خدمه او كلمة طيبة يقدمها واي استفسار حاضرين للطيبين ولا تهونون .

وٍعَلْيّكَمُ ٱلْسَلآمّ وٍرٍحَمُةٌ اللَّــْـْہ ۆبُركَاتة

و انت بخير و صحه و سعاده

صدقت اصعب مرحله هي البحث عن زوجه و هذا انا من اخذت التصريح سافرت اكثر من مره و لا زال البحث جاري ..

تأكد دام نيتك حلال ما راح الله يضيعك ابد و بتفرج بدون ما تحس

نصيحه ممكن تكون صحيحه او لا
اذا لقيت بنت الحلال اللي تخاف الله و تراعيك لا تطول فترة الخطوبه

بشوف ايش اقدر عليه و ارجع لك
و ربي يسهلها لك و لي

ولا اصعب مرحله ولا شي
انا تزوجت من 3 سنوات
ولكن في الاول بحثت عن الزوجه وبعدين طلعت التصريح

بعدين ترى التصريح من سن 35 فما فوق
هذا اللي صار معي
حتى وقتها كان باقي 3 اشهر ويكتمل عمري 35
وعقدوها شوي والحمدلله تسهلت

الله يوفقك لما يحب ويرضى

__________________
الشجر يموت واقف

و افرض ان تاخر التصريح او ما طلع?

انت كنت محظوظ و توفقت و الله سهل لك و لا ابد مو سهل الموضوع

و اذا مو صعب اتمنى تفيده و تفيدني و تفيد غيرنا

موفقين جميعا

__________________
كلآم الناس بالنسبة لي ،، مكآلمة لم يتم الرد عليهآ ..!!!

الله يحفظكم

__________________

ما تقصر يالذيب والله يوفقنا وياك
بس حبيت اسألك وين بحثت فيه في أي المدن او القرى ممكن افيدك وتفيدني لأني مريت ديار واجد وأخذت تقريبا انطباع عام

الله يوفقكم بالزوجات الصالحات والذرية الصالحة

اول شي اتمنى لك حياة سعيدة وموفقة في حياتك
وبعدين وانا اخوك انا اشوف ان الواحد يستخرج التصريح قبل لا يسوي شي افضل طبعا بعد اخذ فكره عن بلاد الزوجة مع انه بالامكان تغيير الدولة بشرط انا الواحد يجيب خطاب من سفارة الدولة الاولة اللي صدرت لها الموافقة بعدم الاستفادة عشان ما يروح ويدور ويتعب واذا حصل شي واتفق وتعشم وفي الاخير طلع بدون فايدة وهو راس ماله تصريح واوراق روتينية ما اتوقع انها صعبة او راح تضر الواحد اذا جابها سواء تزوج خير وبركة وان ما حصل عوافي .
اما على التصريح انا مالي علم عنه قبل ثلاث سنوات ممكن كان من ضمن شروطهم ان العمر فوق 35 لاكن ان اكلمك عن شي قريب تقريبا قبل رمضان بكم شهر من شروطهم ان العمر لا يقل عن 30 وهاذا اللي حصل معي لانه اقل من 30 ما يستقبلون اوراق اصلا ويمكن قبل نظام والحين نظام وازيدك من الشعر بيت من يوم ما قدمت اوراقي عن طريق الامارة لين جتني الموافقة ما راجعت اي دائرة حكومية كل شي يجيك برسالة عن طريق الجوال بخط سير المعاملة ورقم الصادر والجهة الصادر اليها
وعلى طاري ان الموضوع سهل على قولتك ياليت تدلني على طريقة سليمة في البحث واكون لك من الشاكرين

وياك انشاء الله