تقريري الكامل لمدة 17 يوم في ارجاء حبيبتنا المغرب

الحمدالله على السلامه منتظرينك يالغالي

المعذره ع التأخير
راح اكمل باللي وقفنا عنده وهو مراكش الحمراء مراكش القلب والروح
طبعاً السكن بالروز قاردن وذكرت انه فيه مشكلة مافيه نت ولو ينزلون من السعر شوي وغير كذا الممرات بدون اناره بصراحه غريبه تفوت عليهم هالاشياء
ولكن يعتبر الروز من افضل الاماكن اللي سكنت فيها من ناحية راحة البال وعدم مضايقتك واي شي تبيه تتصل بالرسيبشن يفرونه له طبعاً كل شي بحقه
طيعاً مراكش لازم كل مره اروح لازم ازور ساحة الفناء واللتي تعتبر من المعالم التاريخية الجميله مع اخذ بالاعتبار اني ما اكلم اي شخص خاصه من الناس اللي تعرض او تبيع لانهم لو بس وقفت راح تشوفهم كلهم عليك وكل واحد يعطيك سعر من خياله
فلذلك خليك واعي ومفتح وتتمشى بروقان وهدوء
طبعاً من ضمن مافريت بمراكش طحت لي بمجزره اسمها الزيتون على طريق فاس ومن بعدها وانا سردادي للمجزره هذي
طبعاً السهر بمراكش لا تعجبني الديسكوات او المراقص
احب تكون سهرتي رايقه بالفيلا حقتي
منها الدي جي ملك لي ههههههه
ومنها ارتب وضعي زي ما ابي
المهم قضيت فيها ايام حلوه ولا تنسى مع اعز الناس فيها حبيتهم وحبوني ولا راح اندم على كل لحظه قضيتها معهم.
————————-
جينا لليوم قبل الاخير واللي فكرت يكون اخر يوم لي بكازا وذلك لموعد طيران العوده بالصباح
مشيت من مراكش الساعه 6 مساء ووصلت كازا الساعه 8 ونص مساء
طبعاً كنت حاجز فيلا في حي بركون قريب من مروكو مول
طبعاً تعتبر هذي الليله من اسوأ الليالي لي بالمغرب
حيث ان الرتم والنظام وكل شي يختلف عن باقي المناطق
طبعاً فيلا كبيره من 5 غرف واربع صالات ومسبح وحي راقي جداً ولكن ما ارتحت والله ابد من اول دقيقه دخلت فيها كازا
ماصدقت انام الين الصباح واتجه للمطار اودع محبوبتي المغرب الى لقاء قريب بحول الله
—————
ليست النهايه ولكن زي ماوعدتكم راح اذكر المواقف اللي صارت لي هناك لتعم الفائدة للجميع.

شكراً لكم من القلب لكرم دخولكم موضوعي وردكم المشجع لتعطيني حافز التكملة للنهايه.

لي عودة بحول الله

الموقف الاول
كان فيه طنجه وكنت بالسياره متوقف ومشغل اشارات التنبيه لانتظار احد الاصدقاء
فجأه جاني عسكري وطلب الاوراق وبكل احترام عطيته الاوراق وتأسفت منه لأني على غلط
ورد علي بالكلمه هذي : انت من ضيوفنا والدار دارك
بعد الموقف هذا بصراحه كبر بعيني الشخص لاحترامه ولطافة كلامه
————-
الموقف الثاني
كان في طريق شفشاون حيث كنت اسير بسرعة 130 كم
وقفني النقطه اللي عند دوار البستان وطلب مني الاوراق ونزلت له وقلت انا فعلاً كنت مسرع ولا انتبهت للطبلون واذا تبي تعطيني مخالفه تراني من ضيوفكم وبدل المخالفه ورده
ابتسم وقال سير اخويا وانتبه
————-
الموقف الثالث
كان في مراكش وكنت ماشي بطريق فرعي وفيه لوحة قف وبصراحه مانتبهت للوحة مع اني حريص بالنظام
المهم وقفني العسكري وطلب الاوراق وحتى اسلوبه استغفر الله يكلمني من طرف خشمه
قلت له وبدون جدال عطني مخالفه قال باعطيك واسحب رخصتك قلت له النظام اللي عندك طبقه ماعندي مشكله
قام وجاب دفتر المخالفات وجلس اكثر من 5 دقايق ماكتب المخالفه وانا كنت حاس انه ينتظر اقوله اعطيك وامشي بس قلت ماراح اتنازل لو المخالفه بالفين درهم ادفعها بس مايذلني.
سجل المخالفه وانا والله العظيم مبتسم لأنه النظام مايزعل.
————-
الموقف الرابع
كان بمراكش وكنت عند بنك وفا كاش بجليز وقفت السياره موقف عادي كل الناس موقفه وراي المهم ما امداني انزل من السياره الا وجاء العسكري وطلب اوراقي عطيته الاوراق قال انت واقف بموقف الباصات قلت خلاص ماعرفت انا انه موقف باص ولا فيه لوحات ارشاديه تدل على هاللشي
قال انه لون الرصيف واضح ومن هالكلام المهم قلت مخالفه عطني ولا يكثر قال لا حجز السياره وسحب الرخصه قلت عشان موقف غلط تحجز السيارة
قال باللفظ هذا: عطني 1200 وافكك
المهم رحت لعسكري ثاني كان واقف بوسط الشارع وتكلمت معه عن المخالفه قال عادي اخويا ادفع المخالفه وسير قلت طيب وصاحبك ليه بيحجز السيارة
المهم بالاخير صارت الدعوه عناد الله لا يوفقه وسجل المخالفه ودفعتها.
—————


لي عودة بحول الله

يا ماجد المخالفات محد يسلم منها لكن بعض العسكر يبغى فلوس اذا شافك سعودي واذا مادفعت بيعطيك مخالفة
ولو ماانت مخالف أيضاً بعضهم يبغى فلوس بغير وجه حق
انا مااعطيتهم ولا درهم ولا أخذت ولا مخالفه توفيق من الله ما شافوني رغم أني اخالف احيانا بالوقوف او التجاوز او السرعة شويه أنسى
ولكن في مراكش لحقني ضابط على سيارة الحكومة وقال وقف على جنب ونزل وطلب أوراق السيارة وقال انت مخالف لم تعطي حق الافضلية بالطريق وقلت طيب والمطلوب قال تعطيني الف درهم او حجز السيارة وقلت له تبطئ عظم تأخذ الف درهم وتركني وراح ركب سيارة الأمن
ويجي زميله من الباب المرافق ويقولي عطه وخلص نفسك قلت لله معصي ماياخذها المهم صديقي نزل له وقال له خذ ميتين درهم وفكنا ورفض العسكري وزاده مئه درهم يعني 300 درهم تخيل بعدها قام بتقبيل صديقي وقال الله يخليكم لنا يـ أهل السعوديه وهو يعطينا أوراقنا ونمشي وانا زعلت من صديقي قلت والله ماياخذ درهم مني لكن انت عطيته

بعدها قلت لصديقي مالك شغل ولا تدخل في العسكر والمخالفات ولا تتكلم
وأبشرك لم اخذ ولَم ادفع اَي مخالفه او رشوة والحمدلله

__________________
أنا الرَّجُلُ الجَعْدُ الذي تَعْرِفُونَهُ
خَشاشٌ كَرَأْسِ الحيَّةِ المُتَوَقِّدِ

الحمد الله عالسلامه

انا اتكلم وانا اخوك عن استغلال السلطه وليست المخالفه
انا قلت باول كلامي انا احب النظام ولا همني ادفع مخالفه ولكن ليش الاستغلال فقط من البعض.

الموقف اللي حصلي بالروز عند الخروج قالوا فيه ضريبه ومدري من هالكلام
وانا وياهم شد وجذب وبالاخير طلع لي فواتير الضرائب مع العلم انه عند الحجز قالي شامل الضريبه للشخص الواحد ب 50 درهم.
ولكن يبقى بذمتهم
———
صار لي موقف عند ماوصلت كازا كلمت اختي الغاليه سلوى وذلك لمعاينة الفيلا وارتحت والله فيها مع العلم اني واصل لكازا بدري ولكن ماتوقعت ان كازا بالشكل هذا
انا اعطي كازا 2 من 10
اللهم اني رحت لمروكو مول تمشيت ورجعت حتى ياخي تحس انك بقرية وليست مدينة گ كازا
_______
الموقف الاخير وانا متجه للمطار وكان معي واحد قدام والثاني راكب بالخلف وعند ماوصلت نقطة التفتيش قبل المطار استوقفني العسكري وطلب الاوراق وكل شي تمام مع العلم اني انا واللي قدام رابطين حزام الامان
قام العسكري وفتش السياره وأخرنا على غير سبب ولكن يبقى هذا حق للنظام ولا نختلف عليه.
بالاخير مالقى شي قال اللي ورا ليه ماربط حزام الامان والنظام يربطه خارج المدينة
قلت طيب المطلوب قال مخالفه قلت اوك عطني مخالفه وعصب وجلس يتحلطم مع خويه قلت ياخي عندك نظام طبقه وخلني امشي
قام عطاني مخالفه 300 درهم وبعد ما اخذت المخالفه قلت له بذمتك الى يوم الدين مع العلم اني وريته اكثر من سياره مرت مع النقطه واللي بالخلف مو رابطين حزام الامان.



اخيراً وليس آخراً
تبقى المغرب البلد الوحيد اللي ازوره بالعالم وكأنك ياخي عايش ببلدك.
شكراً لكل شخص التقيت به وشكراً لادارة المنتدى وشكراً لاخي يوسف صاحب مكتب صفوي كار وشكراً لاختي نور الهدى طنجه
شكراً للجميع
شكراً للمغرب حكومتاً وشعباً

اخوكم/ ماجد ابراهيم
اتمنى

العفو ياماجد وشكرا على التقرير الرائع

__________________
أنا الرَّجُلُ الجَعْدُ الذي تَعْرِفُونَهُ
خَشاشٌ كَرَأْسِ الحيَّةِ المُتَوَقِّدِ

شكرا اخ ماجد تقرير روعه ، لو تكرمت كم اسعار الشقق في طنجة وهل تستحق الزيارة مثل مراكش ؟
انا في سفرتي الاخيرة اتصلت على الاخت نور الهدى وقالتلي سعر الشقة يبدا من ٩٠٠ درهم ، وانا كنت لوحدي رايح ، حسبتها براسي قلت ماراح تفرق كثير عن مراكش ، ورحت مراكش وكان بخاطري اروح طنجة للتجربة

طنجه اعتبرها روح مني
بلد هادي وبعيد عن الصخب والازعاج
بالنسبه للشقق فيه كثير هناك ولكن عجزت اثق بغير نور الهدى لأن بصراحه شققها بمواقع حلوه وقريبه مع انه السعر مرتفع شي بسيط.
باللنسبه للسهر بطنجه افضل الموجود موفنبيك واسعاره من 1800 للطاوله وانت طالع
———
اكثر من هذا كله انا بنيت لي اصحاب بطنجه وكل يوم وانا وياهم بديره مثل شفشاون وافران وتطوان وغيرها.

اي استفسار انا حاضر