اقتباس:
المشاركة الأصلية كتبت بواسطة bader757
مرحبا يا اخوان ... راح اسرد لكم قصص ومواقف حصلت لي في بلاد المغريب الجميل والقصد هو اخذ العبر والدروس منها اضافه الي المتعه.... ونبدا بأول موقف باسم الله
بداية لم اكن من محبي السفر للمغرب لعدة اسباب من اهمها ان المغرب وخاصة قبل الثورات لم يكن بهذا الحضور وربما بسبب السياحه في الشام وتايلند صحيح كان هناك سياح يعشقون المغرب لكن ربما كان ينقصه الدعايه واعداد المزاعيط بذاك الوقت لم يكن مثله الان علي الاقل عندنا بالكويت
وش لكم بالطويله صادفت احد الاصدقاء واقنعني بأن نغير الوجهه هذه السنه الي اغادير ... لحظه لحظه ... تقصد المغرب .. قال نعم قلت لا الحين موسم صيف وهذي اجواء تايلند ... قال وكله ثقه - نسافر اغادير واذا ما اعجبتك راح اردلك اللي دفعته وفوقها بوسة خشم... من صجك ... نعم: يقول صاحبي... لا وقال بعد اذا ماتحسفت علي كل سفره لتايلند وغيرها ... لاحول ولاقوة الا بالله ياولد فكني من شرك ... قال طالبك قلت تم...حجزنا للمغرب ووصلنا كازا وبتنا ليله وماكان لها داعي مادام ناوين اغادير لكن قلنالكم بالبدايه القصد من سرد القصص اخذ العبر والدروس... المهم رحنا للمطار عشان الطيران الداخلي لاغادير وهنيه تبدا الحكايه الجد ... استعدوا .. نكمل .. يلا
في مطار كازا وحنا رايحين لصالة المغادره شاهدنا ملاك يمشي علي الارض ... من غير مبالغه اجمل مارأيت في حياتي ... فتاه مغربيه في عمر الزهور ابهرت الجميع بشدة جمالها وحسنها الاخاذ ... وتكاد تخطفها الابصار .. وكل هذا الجمال يسير بجانبنا ولان صاحبي ملعون الجدف وسيم جدا فقد بادلته هو اطراف الحديث ... وانا اقول بقلبي اهب ياكبر حظه ... سألت بغنج عن بوابة اغادير قلنا حنا رايحين معاكي هلمي معنا ... قالت واخا ... مافهمت شنو قالت واخا ... اول كلمه اسمعها بالمغرب ... ركبنا الطياره طبعا صاحبنا طايحله سوالف ال.. وانا اهز راسي معاهم ... ووصلنا مطار اغادير فجأه اختفت حسناء المغرب ... وصاحبي يحوس قلت حنا برا الحين خلنا ناخذ تكسي ونروح للفندق وقبل مانركب التكسي بثواني حدثت المفاجأه ... شنهي يامزاعيط ... انا اقولكم... البنت تكلمنا من الجهه الاخري للشارع وتقول تعالوا اوصلكم معاي ... ماصدقنا خبر وهبا طرنا يمها ... وقالت اتفضلوا معانا بالسياره وهذي اختي راح توصلكم وكانت اختها اجمل منها ... ول ول ... حلم ولاعلم...طبعا الحين انا وصاحبي كل واحد يسولف مع وحده والجو ولا اجمل وقبل ما نحرك بالسياره جتنا الصدمه الغير متوقعه ابدا... عشرات من الشرطه يحاوطون السياره ومختلف الرتب ... للامانه المنظر كان مرعب ومن شدة خوف البنات قاموا يصيحون ويقولوه انتم اكيد ارهابيين ... سلم علي الطبيشي ... رحنا فيها اقوله انا... ابك ياصالح هذي المغرب اللي تقولها... صالح مصدوم وانا اسب والعن والبنات يبكون.... وفي لحظه قررت انزل واتفاهم مع الضابط ... ورحت وقلتله تري هذي اول زياره للمغرب وما ااعتقد اني سويت جريمه عشان تحاصرونا بالسياره... قال خل البنات ينزلوا وانت ماعليك شي وارجع للسياره ... احترمت نفسي ورجعت وقلت للبنات المشكله فيكم روحوا شوفوا الضابط وراحت صاحبة السياره ورجعت منهاره قالت راح يحولنا للمركز ولازم يجي زوجي لاني متزوجه واذا جا وعرف الموضوع راح يقتلني وانهارت من البكي... وانا وصاحبي انهرنا من الموقف الزفت هذا
المهم رجعتله مره ثانيه وقلت ليش الفضايح واكيد فيه حل ثاني .. قال الحل موجود اتفضل معاي انت وصاحبك ومعاكم كل اغراضكم ... وداخل الباص الصغير قالنا اما تدفعوا او راح احولكم كلكم للمركز ... لحظه يالطيب ... ليش كل هذا كم تبي وفكنا... والكلام لي لان صاحبي كان في مرحلة انهيار نفسي وعاطفي... قال كل اللي معاكم ... انتوا شايفين عدد الشرطه كبير ... ولازم اخذ كل اللي معاكم ... وبعد شد وجذب وبعد ماقلتله اني يتيم وكن فلم هندي مع شوية ندم واسف
وافق انه ياخذ عشرين الف ... طبعا مبلغ كبير لكن لوشفتوا اعداد الشرطه والناس كنتم دفعتوا اكثر حتي نخلص... دفعنا واخذنا جوازاتنا ... وارتاح صاحبي وقال ... ممكن نرجع للبنات قلت ليش بلا... قال ابي اخذ رقمهم ... قلت امشي اولا
الله يعوضكم خير وسالفتك عجيبة غريبة لكن كل دقة بتعليمة .
اتذكر موقف حصل لنا قبل18 او 19سنة في مراكش كنا متجهين الى مراكش ومواعدين اخو مغربي يعمل عندنا في الرياض يستقبلنا ويجهز سكن لنا .
والمغربي اللي كان يشتغل معنا كان يحرص اخوه يستقبلنا ويستضيفنا ولاياخذ منا ريال واحد ..وصلنا محطة قطار مراكش اللي بكليز واستقبلنا الرجل بحفاوة وطلعنا من المواقف الا قدامنا شرطيين يوقفون من استقبلنا !
وش علاقتك بالسياح وهل معك رخصة وخذ اسئلة للضعيف وشوي يركبونه بيودونه للقسم جاء عندنا قال لاتدفعوا لهم شي انا بخلص نفسي بس انتم انتظروني هنا .. من الشيمة والمروءة اننا مانتركه رحنا كلمنا الشرطي وقلت له بالحرف الواحد احنا اخوة وعيب اللي يصير والله لو كنت سائح فرنسي ماوقفتنا واخذت صاحبنا بهذه الطريقة قال الشرطي احنا نعمل كذا حماية للسياح من النصابين وهذا ممكن ينصب عليكم واوراقه ناقصه الخ .. حاولت افهمه انه هذا اخو صديقنا اللي يشتغل بالسعودية واحنا جايين زيارة له لكن الشرطي ماخذ وضعية العبيط مابغيت اطول كلام معه طلعت 200 درهم وحطيته في يده شوي وصاحبنا راجع وسلموه اوراقه وعطانا ابتسامة الرضا ومشينا طبعا الموقف كله مايجي 10 دقايق لكن كان فيها شد عصبي وتوتر للرجل اللي اكرمنا بحسن استقباله وحفاوته فكيف لو كانت من استقبلتنا امرأه حسناء ؟
في المغرب لاتستغرب ودائما وابدا اقول القانون شي وتطبيقه شي اخر في المغرب حتى في المحاكم تنهي امورك بالمال واعرف قصص لناس دفعت لقضاة من اجل احكام معينة فلا تراهن على النظام والقانون كثير في المغرب فلست في لندن او برلين !
((قبل الختام لو ركبت انت وبنت في السيارة مافيه شيء.. الا اذا ارتكبتوا فعل فاضح ))
لكن هم يستغلون ثغرة بسيطة حتى يحلبوا جيب السائح وحتى المواطن .
2018-04-18, 02:19 AM
المواضيع المتشابهه للموضوع: حكايات كويتي ... في بلاد الزعطه
العرض العادي
الدرهم المغربي مقابل عملات الخليج