رد: رساله الى شيخ المزاعيط وكل من يهوى الشمال
اقتباس:
المشاركة الأصلية كتبت بواسطة تاعبني المغرب
هلا اخوي , شوف ردي بالازرق على كلامك وبرنامج واعذرني على القصور .
- التحرك من كازا الى الرباط البقاء 3 ايام
بداية حلوة وراحة ثلاث ايام ويتخللها زيارة التالي بالرباط :
قلعة شاله - صومعة حسان - الوداية . تقدر تمرها في كم ساعه عندك والودايه حلوة تكيتها بالعصريه في المقهى المطل على البحر وشالة حصن تاريخي روماني اسلامي بيعجبك 30-40 دقيقه جولة سياحيه مع مرشد من عند الباب بعد دفع التذاكر المخصصه تعطي المرشد ان طار طيره بالسعر 50 درهم .
عندك الرباط فيها شارع فال ولد عمير وميقا راما . وتقدر تروح تمارة قريبه وصغنونه لابعد حد تعجبني قبل مغيب الشمس في مقاهيها المتواضعه ابو نص ساعه ولغابت الشمس ترجع لدارك . فيها مرقصين ولا انصح بها لانها بالليل وتروح وترجع اخر الليل وقروشه مالها داعي .
كذلك تقدر تطلع بعد تروح لكازا اذا حاب بالقطار وترجع بنفس اليوم او المحمديه اذا حاب تروح لها العصريه من 5 الي المغرب جنبك بحوالي 30 درهم بالقطارحسب ما ااذكر .
2- التحرك من الرباط الى طنجة والبقاء يومين.
3- التحرك من طنجة الى تطوان والبقاء يومين.
انصح بدمج الايام وجعلها في طنجة 3 ايام اقامه مع يوم قابل للتمديد اذا اعجبتك .
كورنيش طنجة هو اللاعب والمحرك الرئيسي خلال اقامتك فيها فهو يحتوي على :
1- الفنادق من عند الميناء حتى موفنبيك نهاية مالابطا مقابله للبحر بكافه نجومها والاسعار من 120 درهم الي ماتتخيل وهذا بعد رؤية بالعين ودخول كم فندق فيها اللي مايدخل ضيوف وفيها اللي يدخل وفيها اللي حسب الموظف وحسب تعاملك واسلوبك .
2- على طرف كل مبنى بشارع داخلي على الكورنيش توجد محلبات ( بوفيات ) غالبا تجدها بحوالي 10-15 متر تفطر فيها اذا حاب تفطر مسمن الخ الخ .
3- المطاعم كثيره بكورنيش طنجة واختر وشوف الاسعار بالقائمه واللي يعجبك جربه .
4- المقاهي على الكورنيش من فينيسا ايس حسب ما مدح لي على الرغم اني ماشفته بعيني ومدري ويش حظي فيها ونسيت اسئل عنه لكن عندك Larche Coffe بوسط الكورنيش قريب من البولفار . وغيرها وغيرها وفيه ناحية مالابطا على الطريق وانت رايح لطارق وموفنبيك على اليسار يجيك كادونسكي على اليسار والعماره الكبيره المقابله على اليمين بعدها فيه دخله يمين ناحية محطة القطار فيه مقهى ومطعم حلو واسعاره حلوة ( المطعم سندوتشات :smoke1:) وخيارات اخرى بتشوفها بعينك .
.
وفي طنجة عندك المناره اقصى الكورنيش ع اليمين اذا البحر قدامك بعد موفنبيك طريقها المختصر وعندها ملاهي نسيت اسمها :bigsmile: ابو نص ساعه فيها .
فيه مقهى الحافه حلوة التكيه فيها ومشهور اقرب تكسي يوديك لها .
عندك كاب سبارطيل ومغاره هرقل تروح تدخل مغاره هرقل وتشوفها ابو 15 دقيقه وترجع لكاب سبارطيل تتقهوى بالمطعم حقه احيانا فيه ناس رايقه تكحل عيونك بها .
طنجة اهلها عسل ورايقين مثل اهل الشمال عندنا يرقدون متاخرين ويصحون متاخرين يحبون التمشيه ع الشوارع المشهوره مثل البولفارد وشارع المكسيك .. ولايهون سور المعجازين بوسط المدينه جنب الخطوط المغربيه ومقهى فرنسا مطل على البحر ولايفوتك هذا السور .
بعد كذا تطلع ناحية تطون وتاخذ الطريق الساحلى المار بسبته ( قبل سبته بتجيك القصر الصغير انتبه ترا بعده بحوالي 10-15 كيلو متر تفتيش جمركي هذولا يدورون الخير مني اقول قول لهم ماعندي شي او اشتر لهم حبتين موز وعطهم اياها :yess: ) بعد التفتيش بشويات توصل على منفذ سبته يسارك .. خذ يمين واتجه ناحية المضيق والفنيدق اذا حاب تنزل تشوف الفناديق مارينا سمير وغيرها سوي اللي تبي .. اذا مو حاب كمل واتجه لكابو نيقرو ( الراس الاسود ) تجيك الاشاره حقتها ولوحة تقول يسار خذ يسار ودوس للنهايه لين ماتلقى محل يمشي الطريق لبق سيارتك وانزل وشوف بعيونك الخلق ع البحر لين تمل .
خلص من كابو نيقرو وطالع شمال تشوف مارتيل عماير بيض مقابله البحر وفيها مقاهي بسيطه وسناكات دوس للنهايه وخلص واطلع متجه لتطوان ترا مابينك وبينها شي 5 دقايق .. اذا حاب تبيت بتطوان بيت ما اني مابعد دخلتها بس فكرتي لاباس عنها وهي فيها مدينه قديمه تقدر تبيت او تطلع ناحية شفشاون ساعه بالضبط من تطوان لاتسرع ثم لاتسرع الطريق جبلي صعود ولا انصح بالتهور ابدا واذا فيه لوحة تقول هدي السرعه هدي ترا لوحاتهم تقول الصدق واتبعها ماتقلق .
4- التحرك من تطوان الى شفشاون والبقاء فيها يوم واحد
الشاون فيها السكن في فندق باردود سعره حسب الموسم مره ب350 ومره 500 ولاتنسى سيارتك تخليها في مواقف الفندق هذا وتدخل باب المخزن جنبه ولاتطفش او تسوي زحمه اذا احد قال تبي تتن ترا عادي عندي السؤال قول لا وطنش :wink2: شفشاون بتأسرك بالحيل .
5- التحرك من شفشاون الى فاس والبقاء فيها 3 أيام وزيارة مولاي يعقوب وإفران ومكناس
6- التحرك من فاس والمرور فقط بالرباط.
انصح بالغاء فاس كمان للمبيت والسكن وخلك على مكناس . والسبب انواع السكن ومكناس اشرح واسهل للوصول واقرب لك لاشياء كثير وهي جنب فاس .
طبعا لاتنسى التحرك من شفشاون ناحية مكناس او فاس اللي حاب تتجه خارج ونازل جنوب ناحية مدينة وزان على الطريق رقم N13 وتنزل تحت متجه جنوب على نفس الطرق تجيك قريه صغيره اسمها نزالة بني عمار يدخل عليك طريق رقم N4 اذا حاب تروح فاس خذ يسار مع واذا حاب مكناس خذ يمين مع ثم بيجيك الـ N13من جديد عند دار بوكنفود او بو قنفوذ عندها تتجها ناحية مولاي زرهون ثم بعدها مكناس .
مكناس وفاس خيارات السكن فيها كثيره وحلوة تجربتي كانت متعمقه في مكناس اكثر من فاس حيث ان فاس كانت زيارات بالقطار انزل المدينه القديمه واتمشى فيها وارجع لمكناس مرورا بمولاي يعقوب بالحمام ولاتنسى مولاي يعقوب يوم الاثنين مقفل مافيه الا الحمام الشعبي واذا جيت مولاي يعقوب قول ابي الحمام المبني اللي تحت مو الشعبي اللي فوق . ترا خلف القريه هذي اذا انت جاي كمل مع دربك وتخلي المحلات يسارك ويمينك لين نهاية الطريق ينزل بك تحت مع منحدر نهاية الحمامات النظيفه وتقدر تطلع فوق مع درج لكن متعب بالحيل وما انصح من تعدى سنه 45 سنه الا اذا كان رياضي .
السكن في فاس كثير اشهرها ايبيس جنب محطة القطار اسعاره حوالي 500-600 درهم وقد يقل .
مكناس السكن فيها كثير وعلى ماتحب افضلها الزاكي وعلى جنب البلد بس البلد صغيره بالحيل 3 دقايق وانت وسطها اسعاره حوالي 950 درهم دبل . يجي بعده الريف اسعاره مابين 400-500 وقد يقل تاخذ غرفه سنقل واذا حاب تضيف يضيفو حوالي 150 واذا مافيه ضيوف على السعر السنقل تبقى .. ميزة الفندق هذا انه وسط الحمريه وسط مكناس الحديث محلات اسواق مطاعم مقاهي عد واغلط .
فندق عبر المحيط بالشارع النازل على المدينه القديمه وايبيس والماكدو نفس موال الريف والزاكي ولكن اقل فخامه ..
عندك بمكناس مهد العائله الملكيه الحاليه بالمغرب ساحة الهديم مثل ساحة الفناء بس اصغر فيها متاحف واسواق شعبيه مقابلها باب العلج منصور خلفه القصر الملكي وحبس قاره ورياض نسيت اسمه رااااااااااااااايق وع كيفك سعره الغرفه حوالي 700 .
مكناس بتعجبك بس اهلها ينامون بدري بالكثير 9 الليل كيقولو عليها الكازويين ( اهل مكناس كينعسو بكري بحال الدجاج :yess: مع احترامي للجميع ولكن اهل كازا يقولو كذا :)
7- التحرك من الرباط الى المحمدية والبقاء فيها يوم واحد
8- التحرك من المحمدية الى مراكش والبقاء فيها 3 أيام
9- العودة الى كازا من مراكش
الباقي هذا مناسب لك واي شي محتاج اسئل ونجيب باللي نقدر اعذرني ترا اكتب لك بسرعه تعرف الدوام ولكن وعدتك امس ومابي اخلف بوعدي .
ولا استغني عن توجيهاتك ياشيخنا في تعديل اي معلومات في البرنامج أو خط سير
أخي العزيز "تاعبني المغرب"
لا عدمناك يالغالي
والله ما خليتلي شي وعاجز عن الشكر
هل أحتاج رقم تلفونات وهل الشغالات نظاف في الطبخ ولا لا
ولك مني كل تحية وتقدير