مدري الحسبة طبيعية .. ولا انا خبل ؟

السلام عليكم أصدقائي المزاعيط ..

أخذت الورقة والقلم وجلست أحسب تكاليف الرحلة لشخص واحد رايح اقادير لمدة ١٠ ليالي.. والحقيقة ان النتيجة النهائية طلعت مبلغ كبير جدا .. مدري أنا ساري ليل ولا الوضع كذا .. احسبوا معاي وصححوا لي يا جماعة الربع .. أنا صرت اكتب الحسبة حتى على جدار بيتنا أقول يمكن تقل التكاليف وكل مرة نفس الناتج ..

التذاكر بيزنس ٨ آلاف ع الاتحاد .. لأني طويل وتتكسر رجولي في المقعد العادي ..
سكن رويال أطلس ٧٥٠ الليلة x عشر ليالي = ٧٥٠٠
وبما أني كريم واعزم على الضيوف فغرفة للضيف = ٧٥٠٠
المصروف اليومي شامل الضيوف والمواصلات وكل شي ٢٠٠٠ x ١٠ ايّام = ٢٠ الف


الناتج طلع = ٤٣ الف ريال !!!!

طيب ولو قلت يا رجل بلاش البيزنس ومشيها عادي ، تطلع التكاليف اقل ب ٥ آلاف .. يعني ٣٨ الف ريال ..



أنا جلست في لندن ١٠ ايّام ما صرفت كذا ????

ضبطوا لي الحسبة يا شباب .. أنا اشعر بالحزن الشديد المتشدد الذي لا شدة بعده ..

طريقة حسابك غلط , أولاً الطيران سعودية اتحاد او اماراتية انت واللي تبي حسب راحتك ومصروفك اليومي راجع لك

ممكن تصرف الف ريال وممكن تصرف 5000 والمفروض يكون عند كنترول وضبط للمصروفات اليومية

وأكادير ما تستاهل تصرف فيها 2000 ريال باليوم كثيرة بصراحة إلا إذا أنت النوع اللي يخرج ومعه اكثر من وحده ههههههه

والغلط عند بالسكن , تواصل مع مكتب المؤيد للسياحة وهو يرتب لك السكن برويال اطلس عن طريقة ولا تحتاج وقتها لفتح غرفة

__________________

ماشاء الله طلعت الخبرات

خبل شوي

الناس تحسب ٢٠٠٠ ريال شامله السكن او احسب ١٠٠٠ ريال (شاملة الاكل والمواصلات ووو) + تكلفة السكن ..

يعني اذا ذبحت نفسك المفروض ما تتعدى الالفين وتراها كثير ..

في عشر ليالي يطلع المبلغ ٢٠ الف وانت مبسوط

__________________
وتستمر الحيااااااه

لا عآد تحسب لآن راح تجيب العيد ..

انا ماقد سافرت المغرب والله لكن من ضمن الخطط ، مآعلينا

اللي اشوفه دآيم مكتوب من اول مآسجلت بذا المنتدى

يوميتك 2000 ريال .. يعني 10 ايآم .. تطلع 20 الف

اتصل بالمؤيد اللي يقولون وشف كم عندهم الفندق اللي ودك تسكن فيهَ ..
بعدهـآ باقي الامور ، تسعيرتهآ موجودة ومليون تنبيه انكتب بخصوص هالموضوع
خذ لك فرة على المواضيع صدقني بتلقى اللي تبي ، وترى بعض المواضيع
كل شيء موضح فيه ، لكن الاغلب يتفق على 2000 وذا اللي المفروض تحسب حسابه
ومو لازم تصرف 2000 كل يوم ، عموماً صدقني في مواضيع بتفيدك بس فرفر شوي
بقسم الاستفسارات وركز على اللي بعنوانه اغادير وكلمة ميزانية ..

أهلًا أخي عمر ..

حللتَ أهلًا ووطأت سهلًا .. كتبت؛ فلحنتَ المُلحن، وغنيتَ المُغنى ؛ فما زدت على أن قلتَ قولًا يؤلم صاحبك ويزيده على الثقل ثقلين .. فما كان جوابك شافيًا، ولا ردّك وافيًا .. مع أنك صاحب خبرةٍ وحكمةٍ ودراية لن أجدها عند غيرك .. فما كان أحسنك وأزهى كلامك وأعذبه لو استمطرت منه ما ينفعني وتشير به علي .. فإن أخوك جاهلٌ بالشيء وقد علمتُ شيئًا وغابت عني أشياءُ.. وما هذه الخطبة العصماء؛ إلا بريدُ عتبٍ ومحبة لك يا أخانا؛ فلعلها تجري في قلبك شيئًا من الحزن على أخيك فتصب عليه من كثير خبرتك قليلا مما ينفعه في رحلته .. وليكن الله في عونك يا صديقي ..

أخوك / أبو الزبرقان الحائر الولهان ..

الا خبل وخبل طوييييل مثل طولك ياوطويل هههههاااااااا وش ذا الحسبه هذه حقة سفريتين اسافر بها وافلها بعد

اَي خبرات الله يوفقك .. الرجال قال بكيفك وفكني ومشى هههههه

والله مدري وانا اخوك .. عاد جيت أقلبها يمين ويسار ما طاعت تزين .. جبت البنغالي الي في البقالة الي جنبنا يحسب معاي .. واشغلته .. مره يحط الطاقية ومرة يلبسها وفِي الاخر تطلع الحسبة متقاربة ..

قريت وانا اخوك معظم الموضوعات .. ما خليت شي .. حتى موضوع عن افطار رمضان في اقادير تقول اني بروح أسوي مشروع افطار صايم .. لكن ماااش مدري انا الي فهمي على قدي ولا هي المعلومات الي ما هي وافية .. انا تراني شاره على نفسي وانا أقول ٢٠٠٠ في الْيَوْمَ .. لكن عاد القوة لله ما طلع معي الا ذي الحسبة .. لو يحطوني احسب رواتب الموظفين قسم ان تطنخون في ذي الديرة .. بوزع الرواتب في اكياس وعاد كل واحد وحظه وبلاش حساب وخرابيط ..