شباب وشابات هل عندكم فكرة عن العاصمة الجزائر؟
 

سلام يا مزاعيط
بحثت في المنتدى عن مواضيع عن الجزائر ولا حصلت إلا هذا الموضوع:
https://www.mza3et.com/morocco27597.html
ودورت في النت، ماش ما لقيت ما يبرد القلب.

الموضوع أن عندي رحلة عمل لمدة 3 أيام في العاصمة الجزائر.
رأيكم أخليها أسبوع أو ثمان ايام، ولا أخلص أعمل وأرجع على طول؟
ووين تقترحون أسكن؟ وكيف وضع السهر عندهم؟ هل عندهم فلة ولا لا؟



ملاحظة التذكرة من جهة العمل في الجزائر متقفلة، يعني ما ينفع اروح يمين ولا يسار سواء مصر او مغرب او غيرها، يمديني اطلبهم تمديد فقط في الجزائر.

الله يعينك ويسهل أمرك

روح والقلب داعيلك
تحتاج أحد ثقه في الجزائر
عن طريق معرفه لك ينقل لك العلم

لا تأخذ كلام النت بعض مرات يوهق
وأن شاءالله
تنقل لنا ما رأيت

أتمنى لك رحله موفقه.....

اخوي مهندس حاليا الأوضاع غير مستقرة بالعاصمة والمدن الكبرى

بسبب الانتخابات الرئاسية ورغم انسحاب بوتفليقة من الانتخابات إلا

أن الأمور باقي ما استقرت ومازالت العاصمة الجزائر على صفيح ساخن

عليكم السلام ياباشمهندس

والله البلد على صفيح ساخن وعسى الله يوفقك وييسر دربك
وماعندنا لك الا الدعاء

عني انا لو مكانك اروح وارجع بحود العمل والوقت المحدد للمهمه لان البلد ماتشجع ومتكهرب الجو فيها وارجع واقول لو بيدي .

رحله سعيده وامنه باذن الله

المهندس لو منك اعتذرت وانت ماشاءالله عليك واعي ومدرك الامور ترا الاوضاع هناك غير مطمئنه وانت ابخص تونس والجزائر لا تفكر فيها لانها على صفيح ساخن والله اعلم

انتبه يالغالي من الوضع هناك وفكر ألاف مررره قبل اي شي تسوي هناك في هذي الفترى والله يحميك

X-Ray
مسافر جديد
Slimanq8
عمر الفاسي
سهم المنايا

لا خلا ولا عدم، الله يطول في أعماركم ويحفظكم لعين ترجاكم.
والله ولا دريت إلا منكم، ودخلت تويتر وقريت

سفرة العمل ضرورية جداً ولا أقدر أعتذر منها لأن التمثيل فيها على مستوى عالي، شكلها روحة للعمل صد رد بدون أي التفاتة او حتى كوفي شوب والله الحافظ.

شاكر يا إخوان ومقدر.

الله يكون في عونك واذا الرحلة عمل خلك في العمل والفندق اوضاع البلد هالوقت فية جعجعة ههههههه
الله يسهل امرك

باش مهندس لن أزيد على ما ذكر أعلاه فالحذر واجب
لكن أيضاً خذها ببساطه تفائل خير عل و عسى يروق الجو
خذ ملابس أكثر إحتياط فقد تمشي الرياح بما تشتهيه السفن
حينها تقوم بتغيير حجز العوده فقط و تتمتّع بالفسحه في الجزائر

الحقيقة يامهندس ان الجزائر من حيث الاجواء والطبيعة والناس تملك مقومات السياحة.

ومرشحه انها تكون وجهة سياحية مميزة على مستوى افريقيا لكن الحكومة باختصار لاتريد ذالك والبلد شبه منغلق على نفسه في ذالك .

من ناحية الأمن والأمان تطمن من هالناحية ولاتشيل هم ابد زيها زي المغرب وربما افضل فهناك لن تجد عسكري او رجل جمارك يطلب منك دينار واحد اضافة الى الشعب كل في حالة ومحد يمك من الاخر .

بخصوص كم تقعد هذي يبيلها تفصيل اذا انتي جاي تمشية وحاب تستكشف البلد ربما شهر مايكفيك فيها عدة مدن واثار ومعالم سياحية تستاهل الزيارة .

اذا سياحة ليل فتعتمد على مزاجك لكن حقها مابين ٤ ايام الى اسبوع من وجهة نظري ..

مدن سياحية عندك بجاية وجيجل اضافة للعاصمة الجزائر وايضا وهران وتلمسان .

سكن عندك فندق الرياض بالعاصمة الجزائر فندق على البحر بناه الفرنسيين ايام الاستعمار وفيه غيره طبعا .

عندك منطقة سيدي يحي وفيها شارع سيدي يحي فيه عدة مقاهي ومطاعم ويعتبر الافضل على مستوى المدينة .

عندك مول باب الزوار وشارع ديدوش مراد(الشارع هذا يشهد الان من وقت الى اخر احتجاجات ضد بوتفليقة ويقع على الشارع هذا جامعة الجزائر)

السهر طبعا الجزائر مشهورة باغاني الراي وهي الاغلب هناك والسهر مستواه عادي لايرقى لمستوى مراكش او دبي مثلا لكن دامك رايح رايح لازم تقضي وقتك هناك عندك ديسكو شيراتون ولاروز بلو وسلطان وغيره .

عندي رقم سواق سبق تعاملنا معاه من فترة طويلة عام٢٠١٠ ولازلت على تواصل معه من فترة الى فترة اذا حبيت اعطيك رقمه تواصل معي خاص وتقدر تستفسر من السواق اللي تبي وهو رجل ثقة وكبير وبيكون معك مرشد سياحي لان معلوماتي عن الجزائر قديمة

كنا نعطيه يوميته معنا شامل سيارته وكل شي مايقارب ٣٠٠٠ دينار جزائري ويكون معنا طول اليوم طبعا وقتها 3000دينار تساوي 155 ريال سعودي ..الان ارتفع سعر صرف الريال مقابل الدينار الجزائري من 19الى31دينار يعني عملتهم انهارت شوي ..اتوقع يطلب منك 5000 تقريبا لكن انت تفاوض معه وقله من طرف ابو صلاح يعرفني اذا مانسى بعد.
ورحلة موفقة