تقرير رحلتي لــ مراكش من 11 مارس حتى 24 مارس

السلام عليكم ورحمة الله وبركاته
مساء الخير لأ حلى اعضاء و زوار المنتدى

اعرض عليكم تقرير رحلتي كامله من الرياض لــ مراكش

وهذا الموضوع معم مهم مهم للأشخاص اللي حابين يرحون مراكش اول مره وبالاضافه اللي متعودين على مراكش ضروري ينتبهون

وراح اسرد لكم التقرير كامل

وفي نهايه التقرير تحت امركم في اي سؤال او استفسار

في البداية
كانت الرحله من الرياض للقاهرة
فجر 11 مارس وبعد تعب الرحله والانتظار
وصلنا الظهر كازا والتعب على وعلى الزملاء
والارهاق ماخذ حقه بقوه منا

اول موقف حصل لنا تعقيد في مطار كازا من قبل موظفين المطار عند الدخول
حصل التأخير عند اجراء الدخول الموظف يحاول يفتح معك موضوع عشان تكرمه حاولنا ما نتكلم معهم لكن بالاخير استقعد لنا الموظف وقال حط شي بالجواز حطينا المقسوم وطلعنا. ناخذ الحقائب والاغراض

تأخرت تقريبا ساعه كامله
وبعد ما استلمناها اكتشفنا كارثه حصلناها مفتوحه السحابات

وسرق منها 6 ساعات 4 منها ماركه قيمتها الاجماليه 21 الف ريال

رحت للمسئول وقدمت شكوى وطلبت الرجوع لــ كاميرا المراقبه لكن رد المسئول انها متعطله وبعد الشد و الجذب قال صاحبي العوض من الله

طلعنا عشان نحول العمله من سعودي لمغربي حولناها وانتهينا
طلعنا حق مكتب وفا كش فتحنا الحساب
وحطيتا الفلوس في الحساب
وصار لنا موقف مع موظفه وفا كاش وراح اذكره لكم في الردود القادمه ان شاء الله

بعد الخروج من المطار
استأجرات سياره من مكتب وطلعت خربان المكيف قاعدين ساعه ونص تأخير خارج المطار عشان يوفرون سياره ثانيه لنا ما اعجبنا الوضع

كلمت صاحبي في الرياض واعطاني رقم يوسف او ابو يوسف والله ناسي بظبط

لكن والله يستاهل قبله على جبينه
وفر السياره في 5 دقائق وجابها لنا واحد اسمه طارق رجل محترم وتعامل راقي

وهذا رقم جواله
يوسف
00 212 6 14 65 65 65‬

استأجرت اكسنت ب 250 درهم

وسواقي كان معي رجل محترم وخلوق جدا
وله مواقف كثيره معي راح اذكرها لكم في الردود القادمه

بعد الخروج من المطار
مسكنا طريق مراكش بعد هذا التعب والارهاق نبي فقط نروح للفله عشان ننام
ونرتاح بعد المشاكل اللي حصلت لنا

وصلنا مراكش الساعه 7 المساء

وطلعنا للمنتجع وراح اذكر لكم معلوماته كامله

المنتجع هو ملايا

عند الاخ كمال و الاخ عبد الجليل

حاجز الفله من المنتدى اغلانه موجود هنا

وصلت الفله واستقبلونا

والاخ كمال قال روح ارتاح انت واصحابك و الدفع لحق عليه رجل والله في قمه الاحترام

معلومات عن ملايا

السعر كان 3200 درهم وبعد الشد والجذب مع الاخ كمال اخذتها 2700 درهم

الفله حلوه ونظيفه واثاث راقي وراحه نفسيه

بختصار كنك في بيتك لك الحريه في كل شي وجميع المؤظفين يخدمونك بكل شي

الضيوف
اي وقت جيبهم محد يقدر يتكلم او يضايقك

الفله تتنظف كل يوم اي وقت تبيهم يجونك

وكل الشكر للاخت ربيعه و ياسمين هم اللي كانوا يخدمونا في الفله طبخ او تنظيف

المنتجع بنسبه لي فخم جو المنتجع ينسيك التعب والارهاق

واي سؤال عن المنتجع تحت امركم

مواقع ومطاعم ومقاهي ومول وغيرها الكثير زرتها


( مول )
ساحة جامع الفنا
أسواق المدينة التجارية
سوق المنار مول
سوق ساحه البلازا
سوق كاري ايدين
—————
( اثار ومتاحف )
متحف مراكش
حدائق ماجوريل
جامع الكتبية
مدرسة بن يوسف
قصر الباهية
القبة المرابطية
سور مراكش
حدائق المنارة
———————-
( شلالات )
شلالات وادي أوريكا
شلالات أوزود ( تنبيه/ تبعد 190 كيلو عن مراكش تستحق الزياره )
قريه ستي فاطمة
————-
( مقاهي )
مقهى اوليفيري ◀️ جنب ستار بكس بجليز
مقهى 16 ◀️جنب محل ايتام بالبلازا
مقهى ايليت ◀️جنب ازار بجليز
مقهى سوق المنار
————-

( مطاعم )
سنابي شورما
مطعم لي مراكشي في بجامع الفنا
مطعم بلادنا محطه بترومين طريق اوريكا
مطعم ازار لبناني بجليز تنبيه ضروري الحجز قبل
مطعم الفاسيه تنبيه ضروري الحجز
مطعم واحه تفرنوت بمحطه افريقيا
—————-
حلاق + حمام مغربي

افضل حلاق في مراكش فايف ستار

حمام اسكندر


هذي المواقع والمطاعم و المقاهي اللي جيتها

هذا التقرير كامل عن مراكش

نصيحه يا اخوان بنسبه لي افضل منتجع ملايا وراح يكون خياري الاول والاخير في السكن تعامل راقي وناس محترمه

————-
افضل تأجير سيارت يوسف في مطار كازا
تعامل راقي وشخص محترم
———————

تحذير تحذير انتبهو للجواز في وفا كاش اللي بالمطار المؤظفه تتعمد تنسيك الجواز في جهاز التصوير قبل ما تمشي تفقد اغراضك

صاحبي فقد الجواز بعد 4 ايام وحنا في مراكش واتصلوا علينا ودفعنا فيه 3000 درهم عشان يرجع والسياره اللي جابته ب 1200 درهم
الحذر الحذر الحذر تفقد اغراضك قدام تطلع من المطار

وصارت مع سعوديين ونفس الشي قابلتهم في وقالوا نفس السناريوا اللي صار لنا في وفا كاش

اي سؤال تحت امركم عن مراكش
كنت اتمنى اخذ حساب سناب مزاعيط لكن شايب الديمن ما قصر بتغطيته

وكان ودي ارفع لكم صور ومقاطع المنتجع وبعض الاماكن لكن انا اكتب عن طريق التطبيق ولا اعرف ارفع مقاطع الفديو

تقبلوا تحيات اخوكم
العم سام

وعليكم السلام ورحمة الله،
فعلاً مسألة السرق في مطار كازا من تالي صارت ملحوظة وصارت لي شخصياً في سفرتي الأخيرة.

اتمنى ان ليالي مراكش نستكم مواقف المطار ومشاكله.

ولك مني جزيل الشكر والتقدير ع نقلك لجميع الاماكن اللي زرتها لأخوانك المزاعيط.

فالأخير الموضوع راح يتثب لفترة لأخذ الحيطة والحذر لباقي المزاعيط

اجدد شكري وتقديري لك ي العم سام

الله يسعدك على ردك الطيب
وفعلاً انا كنت اسمع عن المطار لكن ما توقعت توصل كذا لكن الحمد الله. مراكش نستني كل التعب و الارهاق
واهم شي التعامل الطيب اللي حصلته في الكثير من الاماكن اللي زرتها
تحياتي لك وتقديري