نكمل رحلتنا
وانا في الطريق مغادر اكادير تحسفت على الثلاث ايام اللي راحت من وقتي في هالمدينة وانا تعبان على الفراش كان في بالي خطط كثيره وأماكن ابي ازورها على سبيل المثال تاغازوت و sol house لكن قلت الحمدالله على كل حال ...
تغديت في المطعم سوديفايس مشاوي ولحم مبخر وسلطه مغربيه واتاي
وتوكلنا على الله مسكنا الطريق السيار الى مراكش
كنت على تواصل قبلها بيومين مع منتجع منوار النخيل وذكرولي انه في ستديو متاح بسعر ١٨٠٠ درهم حاولت اكاسرهم نزلته الى ١٥٥٠ درهم وقلتهم خلاص راح اجيكم بعد بكره .. قالو اوك بس ماراح نضمن لك استمرار الحجز ممكن في اي وقت يجينا احد وياخذه.. قلت مو مشكله
طبعا عزيزي المزعوط لازم يكون عندك بلان B وD دائما في خيارات السكن خصوصا في المغرب
كان بلاني B الروز قاردن مع ان كانت لي تجربه سيئة معهم قبل سنتين بخصوص نظافة الفلل لكن سمعت انهم جددو اغلب الفلل وصارت نظيفة
توصلت معهم وقالو موجود استديو بسعر ١١٠٠
الطريق من اغادير الى مراكش ساعتين تقريبا وافتح ساوند كلاود على أغاني طلال مداح وعيش جوك على الخط ....
وصلت مراكش العصر تقريبا وكنت حاط وجهتي منوار النخيل ... وصلت منوار النخيل ودخلت
عندكم ستديو قالو لا ماكين كله عامر مافي الاستديو واحد تعال شوفه اللي عند الباب على اليسار( ستديو قديم ولا يليق بمكان منوار النخيل ) رفضت وطلعت من المنتجع للروز قاردن قريببن من بعض
اول مادخلت الروز وقفت سيارتي في الدوار اللي عند الريسبشن طبعا كل ربعنا تشوفهم في هذا المنتجع اللله يعطيهم العافيه هههه صراحه ما اللومهم منتجع موفر لك كل شي داخله مايحتاج تطلع مغسله حلاق بقاله صراف مساج ديسكو وجلسات ع المسبح يصير فيها دي جي منتجع دايم عامر وحي وفيه حركه يصلح لحقين الصخب اللي ماينامون الا ٢ الظهر هههه... المهم نزلت سالت عن استديو قالو مافي شي عامر الحين بس اصبر ساعتين في ناس بيسوون تشيك أوت ونجهز لك المكان قلت اوك خذ رقمي اذا في شي جاهز اتصل علي انا بروح اشيك ع منتجع ثاني.. قال اوك
وطلعت من الروز قاردن وجاني شي غريب قالي لا تسكن فيه.. ياخي احس مكانه غلط وطريقة صعب شوي وخطر خصوصا وانت راجع في الليل ووجود مقبره الجدار بالجدار اكبر غلط
المهم رحت لمنتجع سكرة بلان D عندي
اول ماوصلت المنتجع دخلت على مدير المنتجع الآخ عبدالاله .. قالي مافي الا سويت واحد اللي فاضي روح شوفه ..
رحت شفته كان سويت رقم ١ غرفه وصاله مطبخ صغير وحمام صراحه لابأس فيه لكن تحس من ديكوراته كنك في حمام مغربي ..
لكن نظيف للامانه ومنتجع هاااادي جدا هدو يخوف هههه ماتسمع ردح واستنزال زي الروز قاردن ..
سعره ١٤٠٠ بعد المكاسر ب ١٣٠٠ أخذته يومين
نزلت شناطي ورتبت أغراضي
خذيت شور سريع
وطلعت رحت دبليو بحجز بس قالي فل مافي الا فوق قلت لا وطلعت لجاره day one حجزت طاوله ب ٢٥٠٠ ودفعت المبلغ وأخذت الإيصال .. وطلعت لقليز وقفت سيارتي في مواقف كاري ادن وخذيت لفه ع السوق وبعدين طلعت للحلاق اللي مقابل ستارباكس في الشارع الثاني عند محلات الخياطين ... المهم حلقت ب ١٠٠ درهم
الساعه ١١ الليل قلت لازم ارجع للسكن ارتاح شوي وبعدين اتجهز للسهره
وانا ف الطريق للسكن وقفت عند اوسيس كافي أتعشى وخذت من عندهم ساندويتش كفته مع الفريت وسيدي علي ب ٥٠ درهم
رجعت للسكن خذيت دش وارتحت شوي وعلى الساعه ١ ونص رحت للدي ون
كان زحمه جدااً
دخلت وجلست ع الطاوله وجاني اللي يشرف على طاولتي اسمه علي صراحه خدمته جباااره مايمديك تلفت الا تحصله عندك ونعم الشخص ..
الدسكو واعر والدي جي جميل وعامر على الآخر كان جلساته مريحه وتاخذ راحتك ووسع مافي كتمه
سيكورتيه طيبين مايغثونك مثل بعض الديسكوات خصوصا الحبشي الله يعطيه الصحه
صراحه السهر في مراكش وديسكوتها والاجواء مستوى ااااخر غير موجود في بقية مدن المغرب مع احترامي ....
رجعت السكن .... السهره كانت سعيده وانبسطت مفيها جدا
وهاااتك نومه
اليوم الثاني في مراكش صحيت على الظهر
رحت لساحة جامع الفناء على العصر تقريبا اخذتلي جوله ومريت شربتلي عصير برتقال فررش ٤ دراهم وعصير ثاني عصير افوكادو + موز + شوي حليب + فروله ٨ دراهم .. جربوه نصيحه
من رقم ٣٥ انصح فيه وبقوة
وبعدها رحت المناره مول أخذت لفه فيه وكان زحمه اعتقد كان ويك اند او اجازه في المغرب ..
الجو كان ممطر جميل اجواء مراكش الماطره
تكيت في مقهى اليت عند المناره اخذتلي نص نص وحلا مكرون ب ٤٠ درهم الجو كان جميل وأخوكم في الله وحداني وبدل ما اقز انا الناس العالم صارت تقزني ههههه
بعدها طلعت رحت ديسكو K حجزت طاوله ب ١٨٠٠ درهم دفعت وأخذت الإيصال
رحت مطعم فضاء الزيتون شغل شعبي بس لذيذ مشاوي عندهم ممتازه
تعشيت الحساب ٦٠ درهم تقريبا مشكل مشاوي وخبز تفرنوت وفريت وسيدي علي واتاي
بعدها رجعت للسكن الراحه والاستعداد للسهره
المطر ماوقف مشاء الله من العصر والسماء تصب مطر
من اجمل الأوقات في مراكش والمغرب عموما عند نزول المطر ❤️❤️❤️
سهرت في كي
ديجي جميل خدمه مش ولابد علشان شما اظلمهم يمكن اللي كان عند طاولتي هو العيب فيه بس لأني اعرف خدمه كي ممتازه سابقا
من المواقف اللي صارت في كي .. اول مادخلت يعني ع الساعه ١ تقريبا كان في واحد واضح انه من ربعنا الظاهر انه داخل في الجو بدري او متعاطي شي المهم حركاته غير طبيعيه كان يقوم ويسوي حركات غريبه البيست فاضي توهم مابدو الا اخينا في الله
ويروح عند طاولات الناس ويسوي لهم حركات في النهايه سحبوه السكيورتيه برى الديسكو .
المهم سهرت في كي سهره جميله وبعدها للسكن
وللنوم ..
اليوم الثالث في مراكش صحيت الظهر
كنت ناوي اروح اوكيمدون لكن المطر ماوقف سبحان الله من امس ومطر شديد جدا وطريق اوكيمدون جبلي وخطير وغالبا يتسكر وقت المطر .. كنسلت الرحله
ورحت اخذت لي حمام ومساج من السبا التايلاندي اللي عند بيتزا هت ٦٠٠ درهم تقريبا ساعه حمام وساعه مساج .. الحمام عادي لكن المساج انصح فيه وبقوه
طاقم المساج تايلاندي محترفين صراحه مساج محترم ويفكفك عضامك فكفكه.
تغديت في اوييس كافي طنجية مراكشية لازلت عند رايي انه افضل مكان يصلح طنجية مراكشية في مراكش جازلي طعمها جدااا
رحت بعدها حجزت في دبليو طاوله ب ٢٥٠٠
سهرت في دبليو وكانت سهره واعره .. كل السهرات اللي سهرتها في مراكش كانت جميله
صحيت الصبح تيشك أوت من مراكش والاتجاه الى طنجة الحبيبة ...