مختصر تجربتي في المغرب ٣٥ يوم 2019

طنجه مدينه رايقه للناس الراقيه

تااابع

في الطريق الى اكادير كنت أشيك على فندق الخليج من موقع بوكينق وتفاجأت ان جميع الغرف محجوزه بالكامل لمدة شهر قدام !!! استغربت صراحه لانه مو موسم وكان هدفي السكن في هذا الفندق ...
حاولت اطلع رقمهم واتصلت على الفندق وقالي الفندق عامر حاليا ولا يوجد غرف شاغره موجود عندهم فقط جناح رئاسي بسعر 9 آلاف درهم لليله !!

اتصلت على فندق مارينا Bianca Beach ومعروف الفندق هذا دايم أسكن فيه لكن في اخر سفره كانت في مشكلتين خلتني أتردد اسكن فيه اول شي في ريحه غريبه في الشقه ماقدرت استحملها والأثاث تحسه قديم شوي مفروض يتجدد لكن مهملينه والمشكله الثانيه الريسبشن بعيد عن العماره وسلامه فهمكم.

المهم اتصلت عليهم وطلبت منهم شقه محدده انا اعرفها بالرقم وقالي موجوده فيها غرفه وحده وصاله كبيره ومطبخ دورتين مياه ب١٤٠٠ درهم لليوم
حاولت أتفاوض معاه وانزل السعر نزلته الين ١٢٠٠ درهم كان هدفي انزله الى ١٠٠٠ لكن فشلت
قلت عموما خير انا قدامي ساعه وواصل اكادير اذا وصلت راح اجيكم ..

اتصلت على فندق سوفتيل ورويال اطلس أشيك عليهم كلهم أسعارهم جدا ممتازه لكن ماكانو واضحين معي في مسالة دخول الضيوف ..

المهم رضيت بالأمر الواقع حاليا مافي قدامي الا مارينا .. وانا في الطريق كنت اصور سناب للمناظر الا ويدخل ويكلمني صاحبي .. صاحبي هذا من المحاربين القدامى في اكادير .. ومنقطع عن المغرب من ثلاث سنوات قالي قلبت المواجع الطريق هذا حافظه حفظ هههههه

المهم قعدنا نسولف وقلتله وضعي حاليا مع الفنادق واني انجبرت اسكن بمارينا قالي بكلم لك وحده اعرفها ما اسكن الا عندها في المارينا انت روح شوف الشقة اذا عجبتك ممتاز وهذا اصلا اذا كانت موجوده ولا غيرت رقمها لان اخر تواصل معها كان ٢٠١٦ .... قلت ممتاز
ماتقصر انا كذا ولا كذا رايح المارينا اصلا

وانا هنا وصلت مطعم sovidias عند مدخل اكادير

وينزلك احلى وربع كيلو كفته وقليل من النقانق ولحم مبخر وفريت وخبز تفرنوت وسلطه مغربيه واختمها بالاتاي ياسلام .... المكان واسع ورحب والأكل لذيذ تقيمي له ٨ من١٠
الحساب ١١٠ درهم


بعد الغداء الطيب قالي صاحبي كلمها خلاص ضبطتك دقيت عليها والله وترد قلتلها انا أعطاني رقمك فلان قالت ايه معروف الشقه موجوده قلت حلو بجي أشوفها

وصلت المارينا ... قابلت صاحبت الشقة عند البوابه وطلعت اشوف الشقه الا والله شقه نظيفه مرتبه تلق كل شي فيها حتى الواي فاي عجبتني الشقه كان عندها شرط واحد فقط هو صوت الموسيقى مايكون عالي ... قلت لا تشيلين هم انا اصلا منيب راعي صخب وإزعاج

أخذت الشقه بسعر ٧٠٠ درهم بعد المكاسر دفعتلها حق يومين وقلت اذا ارتحت راح امدد .. وفعلا بعد اليومين مددت ٥ ايام

الحمدلله ع سلامتك وتقرير جدا راااائع وانا مثلك من عشاق السفر بالسيارة والاستمتاع بالطريق

كثر علووم طنجة وسياحتها محتاج اعرف اكثر عنها للحين غامضه بالنسبة لي

جزء جميل ومبروك على الشقه. في المارينا بهذا السعر لقطه !

تقرير جميل بجمال روح صاحبه
كمل يا بطل ولا تبطي علينا

اعتذر عن التأخير والسبب الانشغال في هالشهر الفضيل ..


نكمل التقرير

اكادير

مدينة احبها كثير ولازم في كل زيارة للمغرب ضروري ازورها
مدينة روقان صغيرة تحس كل شي حولك جوها مميز معتدل طول السنه ملمومه تحس جوها يختلف عن اجواء اي مدينه ثانيه في المغرب ..

نزلت أغراضي من السياره وفتحت شناطي وعلقت ملابسي في الدولاب كان ضروري أخذ قسط من الراحه بعد مشوار ٩ ساعات فعلا أخذت دش ونمت حول الساعتين .. صحيت ع الساعه ٩ المساء
رحت لشيك حجزت طاوله
أسعار شيك الطاولات تبدا من 2000 درهم الى 3500 درهم لطاولات البست

بعد ماحجزت رحت مقهى تفرنوت في شارع الحسن الثاني ( مقهى جميل وجلسته حلوه )
الجو جميل ونسناس

قعدت ساعتين وبعدين رجعت للسكن وتجهزت سهرت في شيك صراحه مكان مرتب وتعامل ممتاز وديجي جميل عجبني جدا شيك ... الساعه ٥ قفل وبعدها رحت للفتر في كاش مقابله مباشره نزلت شيشة بس ب ١٠٠ درهم والافتر بارتي كان برضو واعر في كاش ...

اليوم الثاني في اكادير رحت تغديت في اورير مطعم البركه وأحلى طاجين مع تفرنوت سلطة مغربيه وسيدي علي واتاي ب ٩٠ درهم

وبعدها رحت للمليونير طبعا في الليل دسكو تحت لكن في النهار يصير شيشه وكوفي ... جلسته حلوه شيشتهم ممتازه خدمه ممتازه أسعار مبالغ فيها شوي .

جلست فيه وكانت في مباراه للهلال والشاشات عندهم حلوه مغطية كل الكوفي تقريبا ... بعد الجلسه مريت كاش وحجزت فيه طاوله أسعاره طاولات بيست ٢٥٠٠ جميع الطاولات ب ٢٠٠٠ ...

طلعت رحت المارينا وقفت سيارتي واخذتلي لفة ع المارينا الجو كان ممتاز جدا واستغربت ان اكادير مليانه فل رغم انه مو موسم يعني نهاية شهر مارس والشوارع فل الفنادق فل محلات السهر فل ..

تعشيت في احد كوفيهات مارينا مارغريتا بيتزا ورجعت للسكن الراحه والتجهيز للسهره

سهرت في كاش تقيمي له الديجي كان ممتاز الخدمه ممتازه لكن عيبه واشوفه انه عيب كبير جدا ديكوراته وجلسته .. ديكور جدران بيضاء أبداً ماتصلح الشي الثاني كراسيه مو مريحه ابد وقديمه وحاشرينك مابين الطاولات تعاني كثير اذا جيت تقوم وتتحرك



أوقف هنا وبرجع اكمل قريب ان شاء الله قصة التسمم اللي صارت لي في اكادير

نهاية مارس وزحمه؟!

سلامات يادارك مون عارف معاناتك لاني تسممت في اماديل وجلست ثلاث ايام تعبان... هات الحكايه

في دول فالخليج عندهم اجازة فنهاية مارس .. والاجانب عندهم اجازة عيد الفصح بنهاية مارس .. اتوقع هذا سبب الزحمة

بحكم اني فاضي حاليا خلوني اكمل لكم


طبعا بعد سهرت كاش رجعت السكن ونمت


اليوم الثالث في اكادير صحيت ع الساعه ١٢ الظهر

وكنت احتاج اسوي حمام ومساج بعد السؤال والبحث لقيت هذا السبا الناس تمدحه natea دقيت عليهم وحجزت ع الساعه ٢ السبا كان قريب من سوق الاحد .. فقلت خلني استغل الفرصه وأروح أتمشى في السوق شوي ... فعلا تمشيت الى ما قبل موعدي بربع ساعه ..

دخلت المحل الا والله المحل كان زحمه فرنسيين وبريطانيين ... اسقبلتني المديرة السيدة لطيفة بالابتسامة وتعاونها مع الجميع صراحه محترمه جدا لطيفة الله يعطيها الصحه .. وطلبت مني الجلوس في الصالون .. فعلا جلست في صالون الانتظار وقدمولي اتاي مغربي .. وبعدها بربع ساعه جتني وحده وطلعت معها فوق الى غرفه تبديل الملابس اعطوني روب وبدلت ملابسي وبعدها رحلنا للحمام المغربي . تشيل الروب وتبدا تفرك بالصابون.. طبعا كنت موجود ومعي في نفس المكان ٥ اثنين فرنسيين وثلاثة بريطانيين وصراحه انا انزعج من الحمام اذا ماكان فيه خصوصيه وقلت هالكلام بعد ماخلصت للمديرة لطيفة وتفهمت كلامي وقالت اعذرني اليوم كان عندنا زحمه وضغط ولا المفروض يكون الحمام كل شخص بالحالة ..

للامانه التفريك والحمام كان مقبول الى جيد بس مو زي توب كابي كازا أقيمه ب ٧ من ١٠

بعدها ماتخلص حمام تروح تريح شوي على سرير ويعطونك ماء مغلي معاه عشبة اللويزة العشبه هذي ممتازه تريح الأعصاب وممتازه للبطن عجبني صراحه .. المهم بعدها بربع ساعه تروح غرفة المساج

المساج كان ابداع اعجبني اكثر من الحمام طقطقت عظامي مشاء الله مساج بمعنى كلمه مساج .. سبحان الله في توب كابي عجبني الحمام وماعجبني المساج وهنا اعجبني المساج وما اعجبني الحمام ههههه


خلصت المساج ونزلت تحت ودفعت الحساب كان على ما اذكر ٤٢٠ درهم ساعه مساج وساعه حمام

وبيبعون صوابين وليف وزيوت ... المهم انا خذيت منهم عشبه اللويزة لانها اعجبتني اخذتها ب ٤٠ درهم ممتازه جدا جدا جدا تأخذ شوي منها وتحطها في كاس مويه حاره وبعدين تشربه تريح جسمك بالزاااف


المهم بعد ماخلصت حمام ومساج .. كنت جوعان وابي اكل بس كني مليت من الأكل المغربي من اول ماوصلت وانا اضرب في هالطواجن والمشاوي قلت خلني أغير شوي ..

اتصلت على صديق اشيك اشوف تغدا ولا نتغدا مع بعض .. قال انا مفطر متاخر وماراح اكل الحين توعدنا نتقابل في فندق جمب مليونير نسيت اسمه يمكن اسمه فندق فاروق في جلسات شيشة ع المسبح وجوه واعر ...

وطلبت منه يرشحلي مطعم مو مغربي ..

قالي مطعم (شيش كباب ) ونصح لي المطعم وأنه افضل مطعم يسوي ساندوتشات في اكادير ومعروف عند الناس كلها ...

قلت على خير واتجهت للمطعم موجود في شارع الحسن الثاني .. ووقفت سيارتي ونزلت . قلت انا اول مره اجي عندكم وش افضل شي مشهورين فيه ؟ قالي شاورما .. قلت عطني شاورما..

بعد ما أكلت وشبعت حمدلله ..

طلعت للفندق اللي جمب مليونير علشان أقابل صاحبي ... وفعلا قابلته وجلسنا اجواء جميله خصوصا قبل الغروب ميوزك وشيشه ومكان مفتوح يعني انس شي اسمه صداع او كتمه وكنت مبسوط صراحه ومافيني شي .. تقيمي المكان ٨ من ١٠ السعر ممتاز والخدمه ممتازه

بعد ماغربت الشمس يعني ع الساعه ٩ تقريبا طلعنا ...

رحت احجز في شيك وفعلا حجزت وانا بطبعي في الحجز ما ادفع عربون .. ادفع المبلغ كامل علشان افتك ،،، وما ابلش أخذ معي بطاقات ولا كاش يطيح مني ولا يضيع.. اجيب معي مبلغ بسيط للبخشيش اللي يخدم ع الطاوله وبس ..
المهم بعد ماحجزت مريت بقاله وخذيت بعض الأغراض وبعدين للسكن للراحة..

اول ماوصلت للسكن حسيت فيه الم في بطني وحسيت جسمي كان فيه إعياء يعني في شي غريب قاعد يصير في جسمي لكن قلت يمكن من المشاوير اليوم والمساج ان شاء الله مافي شي ..

أخذت شور قلت خلني اصحصح شوي خذيت بنادول قلت ان شاء الله أصير احسن

سالفه التسمم

اعذروني ياشباب اذا شرحت بالتفاصيل اللي صارلي يمكن تكون مقززه ف اعذروني ...



المهم جلست الى الساعه ١٢ ونص لبست وطلعت للشيك .. جلست ع الطاوله ما امداني اكمل ربع ساعه الا زاد الالم في بطني وجاني غثيان شدييييد... حاولت اشرب مويه بس مافاد .. رحت الله يكرمكم لدورة المياه .. والله يكرمكم استفرغت بشدة .. وبعدها قلت ان شاء الله اني الحين بكون احسن

رجعت الطاوله قعدت نص ساعه الا و ارتفعت حرارتي وجاني الغثيان مره ثانيه وأروح الحمام ونفس الشي صار ..

(ترى الى الان ماشربت لاعصير ولا شي والبطل ما انفتح)

بعد اللي صار للمرة الثانيه حسيت اني خلاص لازم امشي للسكن حسيت اني تعبان ومرهق .. كلمت جمال مدير شيك وقلتله اللي صارلي .. ارسلي واحد يوصلني للسكن لأني كنت جاي بسيارتي .

قالي اوديك مستشفى او صيدليه قلت لا ابي السكن لأني بصراحه اكره المستشفيات وماا عرف ايش النظام في المغرب فقلت ان شاء الله بس ارتاح ويروح التعب ..



فعلا وصلت السكن بدلت ملابسي وجاني المره الثالثة الغثيان وأروح الله يكرمكم للحمام ونفس اللي صار في شيك..


حاولت انام حرارتي مرتفعه شوي تنخفض جسمي يرتعش كل أطرافي احس فيها الم...

المهم نمت وصحيت الظهر اليوم الرابع في اكادير قضيته كله ع سريري اصحى وأنام اصحى وأنام ماطلعت ولا أكلت ولا شي اللهم كنت اكل بسكوت بس واشرب مويه كثير ..
( غلط مني اني ماجبت علاج لحالات التسمم من السعوديه مع ان شنطتي كلها علاجات برد وحلق .. ضروري ياشباب أدويه للحالات التسمم اللي ممكن تتعرض لها)

اليوم الخامس دقت علي صاحبة الشقة تبي ادفعلها الاجار .. سمعت صوتي قالت شفيك قلتها اللي صارلي قالت انا شوي وجايتك..

فعلا بعد نص ساعه سمعت جرس الباب فتحت الا والله الشقردية جايبه معها اكل كبسة دجاج وحريره وسلطه مغربيه وحريره ثانيه وعلاجات .. قالت ليش ماكلمتني أول حسيت بالتعب ؟ ماقلت لك اذا احتجت اي شي كلمني في اي وقت وبعدين ليش تأكل من برى انا قايلك اذا تبي اكل بيت نظيف كلمني ... صراحه الاجوديه احرجتني ورفضت تأخذ اي درهم .. وجلست معي لين ما أخذت الدواء وقالت معليش اعذرني بكلمك مابين ساعه وساعه اشيك عليك ...

والحمدلله جسمي بدا يتعافى شوي شوي في نهاية اليوم السادس ..

مايستفاد
انتبو ياشباب من الشارما في السفر والله يا انها مرض مرض مرض .. حاول ماتغامر كل شي مضمون ويازين بعد اذا طبخت اكلك في البيت

أدويه التسمم لازم تكون معك في السفر

حي الله هالطله،

اعتقد تقصد فندق مبروك اللي فيه جلسات شيشة ع المسبح

وفعلاً اكادير مدينة ساحرة وبسهولة تقع في عشقها مدينة ملمومه وتغطي كل احتياجاتك النهارية والليلية.

من اهم مميزات السفر مع خوي طير شلوى هي بالمواقف ذي بتحصل لك سند، ولو من تالي فيه صعوبة تسافر معه سوا كان المانع أجازة او انه حط الدبله في اصبعه (:

ننتظر باقي أسترسالك