اقتباس:
المشاركة الأصلية كتبت بواسطة عمر الفاسي
ممتاز بارك الله فيك وكل كلمة كتبتها كانت مفيدة جدا جدا وراح اساعدك واسألك شوي اسأله واعتقد عندك اجابه لاغلبها
أنت توقيت سفرك كان خلال فترة توتر داخلي بسبب الانتخابات الرئاسية فكيف كان الامن بشكل عام ؟
وهل تنصح بالسفر للجزائر عموماً ؟ كيف البلد بالليل ؟ المواصلات كيف سويت فيها ؟ اوبر مثلا او تاكسي
أو ايجار سيارة ؟ بما أنك ذكرت موضوع الدولار فهل يوجد تعقيدات بدخول وخروج الكاش ؟ وهل الريال
السعودي مطلوب على اعتبار اهميته بالعمرة والحج ؟ الاكل مو مهم عندي بالتالي ما راح اسالك عنه واللي قلته
كفاية لكن القهوة اولويه وخصوصا الصباح وبعدها المعسل هل عندك فكرة عنهم والشباب اكيد محتاجين الخطوط اللي سافرت عليها. وسلامتك
هلا هلا أخوي عمر.
فترة سفري كانت من الأحد الى الخميس، المظاهرات عندهم عادة يوم الجمعة (يعني انحشت قبل المظاهرات) ، مع العلم أن بوتفليقة أعلن الاستقالة وأنا هناك وطلعوا مظاهرات احتفال، وعموماً مكان المظاهرات قريب من فندق الجزاير والمنطقة الدبلوماسية، وبعيد عن السوفتيل، ما شفت بعيني مظاهرات لكن سيارات الشرطة المدرعة الي زي الباصات في كل مكان، يعني تحس الوضع متكهرب شوي.
لا أنصح للسفر للجزائر الا لرحلة عمل فقط، وممكن يومين كترانزيت فقط لا غير.
الموصلات كانوا حاطين لي سيارة بسواق فولكس واجن جيتا أتوقع موديل 2013، فما استخدمت التكاسي، مع العلم أنه عندهم تطبقين اثنين للتكاسي، تكاسيهم من طقة تكاسي اكادير بس لونها سماوي، تطبيق اسمه COURSA CHAUFF وتطبيق اسمه Yassir Chauffeur والدفع كاش طبعاً.
بالتالي انصح باستخدام التطبيق وعدم ايجار سيارة، لان شوارعهم اصغر من شوارع المغرب، وصح ان عندهم طريق سيار يربط بين الجزائر ووهران وغيرها لكن هم نفسهم ما ينصحوا بالسفر فيه بالليل بسبب دواعي أمنية.
بالنسبة لخروجي في الليل طلعت ورجعت من السائق لعشاء عمل مرة في الشيرتون ومرة في فندق الجزاير، وأغلب الوقت في الليل جالس اتنقل في مرافق السوفتيل.
لا يوجد أي تعقيدات بدخول وخروج الكاش ولا أحد راح يسألك في المطار، اللهم لو بقى معك دينار جزائري فما راح تقدر تغييره بأي عملة أجنبية سواء من صراف أو من سوق سوداء، بالتالي اصرف يوم بيومه، العملة المفضلة كسعر صرف الدولار ثم الدولار ثم الدولار ، وبعدها اليورو وبعدها الريال السعودي لكن مو نفس صرف الدولار أبداً.
على طاري القهوة، تصدق أنهم مو مثل المغاربة مع الأتاي، يعني ممكن يشربوا اتاي مرة وحدة في اليوم او ما يشربوه، لكن ضروري يومياً من القهوة الكحلة، ومقاهي الشيشة واللونجات منتشرة وبقوة، بس ما رحت الصراحة.
بالنسبة للطيران من الرياض لا يوجد مباشر (سمعت أنه من جدة فيه)، عندك المصرية والتركية والأردنية، ومع الأسف الشديد حجزوا لي على الأردنية الي جربتها لأول مرة بحياتي ولا ظني اجربها بعد كذا، رياض عمان 2:30 ساعة، وانتظار في عمان 2 ساعة، عمان جزائر 4:30 ساعة، طيارات قديمة جداً وضيقة وفلل!! والوجبة عبارة عن ساندويش بارد!
ولا يوجد في مطار الجزائر الا عدد 2 لونج، واحد لطيران الجزائر والأخر للطيران الأجنبي، وحرام فيهم كلمة لونج، ممكن أقول بوفيه في منفوحة.
وأي سؤال أخر أنا حاضر