ملابسك في السفر [emoji848]

السلام عليكم
كلنا نحب السفر وكلنا نحتاس قبل السفر
اي مول اروح واي سوق اروح اشتري
واذا دخلت السوق تجيك الاستفهامات الكثيرة
وش اشتري وش اصلا ابغى ويناسبني

..
كل واحد يعطينا تجاربه بالملابس
واعطنا اسم السوق
وبدون مثالية وشغل الماركات الباذخة
عطونا الصدق عشان نستفيد

واذا صرت مسافر وش تشوف اللبس المناسب
والشوز المناسب لرحلة الذهاب ..
.
.
بالنسبة لي
احب بناطيل cat لسبب ان عندها مخابي كثيرة
ويكون قماش مو جنز
وكمان اخذ التي شيرت من cat
وماركة اسعارها عادية وفي متناول الجميع
وبكل مول تلاقونها
والشوز اغلب السفريات صندل مفتوح
.
.
وسلامتكم

انا من سنوات اثنا الرحله البس لبس رياضي مريح جداً
اطقم سنتر بوينت ممتازه وتناسب الاوزان الكبيره
وعندي جزمه رياضيه اعزكم الله من لوتو عمرها 7 سنوات ومالبسها إلا في المطارات لاني جربت ارهاق المطارات ومع الجزمه الطبيه المريحه فرق معي كثير

اما بالنسبه للتسوق
فقبل السفر بشهرين او ثلاثه واحياناً اكثر اذا اعجبني شي اخذه وارميه بالشنطه
والتغيير بسيط جداً
ما اروح مشوار خاص عشان اقضي
يعني كل سفره ازيد طقمين او ثلاثه بالكثير والقديم موجود لاني اصلاً مالبسها إلا في السفريات وتبقى في شنطتها للسفره التاليه
وفيه شي مهم شنطة اليد العلاقي ريحتني كثير في المطارات
تحط فيها الجوال والدخان والولاعه والمفاتيح والجواز والشاحن والبطاريه الاضافيه واي اوراق معك وتريح راسك

يعطيك العافيه
كنت اشوف الشباب بالمطار
واشوف الشنطة العلاقية اللي عالجنب او الصدر
كنت انقد عليهم واقول وش هالناس
ولما جربتها لقيتها فعلا مريحة جدا
وتشيل كل اغراضك المهمه واللي تحتاجها بااستمرار
حتى القلم مايطلع منها

كنت أخذ شي غالي معي الا بعد أحد السفرات
خلاص كنسلت الفكرة وديت المصبغه تيشرتات غالية نوعاً ما وجيت اخذها الا وطالعه بلون ثاني مدري وش زينو غاسلينها مع غوامق والثاني تقول ضاربته شمس وباهت وكني شاريه من الهرم

للفائدة العامه واللي قاعد انا اسويه

أشتر من المجمعات سنتر و hm و شاكلتها يفضل على عدد ايامك ولاتحتاج مغاسل بالسفر ورخيصه وعن نفسي نهاية السفر ما اخذها الشنطه الجزم والشغلات المهمه والباقي فرصه سعيده

السر كله في الجسم لو كل لبسك من تومي وديزل وجسمك غلط الموضوع كله غلط

ولو جسمك زين والله لو من الهرم ليجي زين والموضوع يحتاج ذوق

بس فكونا تكفون من قميص الكاروهات صار ماركه مسجله لنا

قبل شوي شريت من "فوت لوكر" عندهم عروض حلوه تيشرتات اديداس ونايك ونيوبالانس مكانهم الرياض

العرض 2 تيشرتات ب 136 من الماركات اعلاه

الجينز شف جيوردانو عندهم شي جديد وقماشه بطل

شوف عندي كم قميص
هذي ماادري ناشبة بحلقي
كل سفريه اشوفها بالشنطة
وكل سفرية ازيد قطعه او قطعتين
واغلب لبسي يكون خفايف وفوق الركبة
واذا بااخرج برى الشقة او السوق
احتشم شوي وينزل تحت الركبة
الا بالسهرات الخارجية النادرة
يكون اللبس شوي مرتب


وسالفة الجسم اتفق معك وبقوة

بس الكاروهات هههههههههه
تحسسني انه مدرس تقويه مصري

لا بعد وزد عليها يصير عندك لبس عشرين شكل ولون وتعلق على لبسه معينه كل السفره تطلع اطلق شي فيهم

أما في هاذي صدقت هههههههههههه

انصحكم بأميركن ايقل
اللي بالعليا العام بالرياض اغلب الايام عندهم عروض حلوه تيشرتات وقمصان وبناطيل ،، لأنه اكبر محل لهم. وهو الاساس
اما السبورات فسنتر بوينت واتش ام تفي بالغرض
شي وحيد لاتنساه معك بشنطتك اليدويه بالسفر بندول نايت ارقد يامال الشحم توصل مروق ومبسوط

اخذتها من طرف لساني
السر في الجسم ماهو في الملابس

الله يسعدك على طرحك

ماني بعيد عن الاخ /فهد احيانا بس الوزن معقول
بالسفر ملابسي رياضيه وبوت خفيف لطول ساعات السفر

استعين طبعاً بالقبعه
ملابس السهر بنطلوناتي اخذها من محل cilon احب البقي الياقيه تشكيله منوعه ماتكون غاليه جداً لاني البسها بالسفر غالباً فتكون بالشنطه عدا ملابس الرياضه للممارسه القليله
اسافر بشنطتين احب اغراضي كامله وخوفاً من فقدان الامتعه

اما سالفة الجسم من الاخر جبتها
الشنطه الصغيره موجوده معي ومهمه
بس تكون طارفه بشنطة صعود الطائره