عروض وحجز الفلل و الشقق

السيارات شركات تأجير السيارات

تقارير سياحية

الاستفسارات سؤال و جواب


تقرير سفرتنا إلى المغرب 2011 (( اللمّبي & العربي باطمة & مصطي & بوقوس))..3000 صورة!!!

موضوع مغلق
النجم الأول

الـلـمـبــي

المشاركات: 2,032
تاريخ التسجيل: Jul 2010
النجم الأول غير متواجد حالياً  
قديم 2011-07-01, 11:59 PM
  المشاركه #1
تقرير سفرتنا إلى المغرب 2011 (( اللمّبي & العربي باطمة & مصطي & بوقوس))..3000 صورة!!!

السلام عليكم ورحمة الله وبركاته




ملاحظة : التقرير أغلبة راح يكون سرد لاحداث وقصص وسوالف حدثت هناك,,,وأيضاً راح أسرد أماكن سياحية ومطاعم ومقاهي ان شاء الله تعود على القارىء بالفائدة ,,,والتقرير راح يكون ذو طابع فكاهي وكوميدي: (778):,,,واتمنى من الجميع مايزعلون مني و يتقبلونة بالصدر الرحب وبروح الدعابة: (113):,,,وسبب كتابتي للتقرير كله رد جميل لأعضاء المنتدى اللي كانو معي هناك واللي تواصلو معي,,,وأتمنى بأن يحوز على رضائهم,,,

وأنا أقف في صف الادارة وفي توجهها الجديد وأويدها على ذلك,,,للحد من الاسائات والتجاوزات عن المغرب الحبيب,,,وان شاء الله من هالتقرير راح اعكس صورة جميلة تليق بمزاعيط المغرب وعشاقهم,,, وساأحاول قدر الامكان التقيد بذلك,,,فان اصبت فمن الله وان اخطأت فمن نفسي,,,

سبق وقدمت لكم تقرير بالعام الماضي على هذا الرابط








انا ورفيق الدرب شعبولا كيماوي: (512):,,,ونال على رضا الاغلبية والمتابعة والثناء من الجميع,,,

وان شاء الله اعدكم بأن يكون هذا التقرير أفضل من سابقة,,,وراح يكون امتداد للمسيرة الناجحة,,,وراح تكون فيه اضافات ومعلومات مهمة للمسافر الى المغرب,,,وان شاء الله بدعواتكم وتشجيعكم ومتابعتكم راح يصل التقرير الى مراتب الابداع والنجومية,,,

وأحب أن أنوه أن التقرير يمثل رأي الاعضاء المسافرين وحدهم وسأقوم بكتابة فترة قضاء أيامي معهم نيابة عنهم,,وهم

((النجم الأول & العربي باطمة & مصطي & بوقوس ))

وفي الأخير,,,الاختلاف في الرأي لايفسد من الود قضية,,,

























* التقرير يشمل 3000 صورة و 70 مقطع فديو


* التقرير راح يكون عبارة عن حلقات متتالية...قد تصل الى 30 حلقة!!


* التصوير عن طريق كامير فوجي فيلم FujiFilm-FinePix-J38-Digital-Camera








كما أشكر الأخوان (( الصارم & SWWA7)) لمساعدتي ببعض الأمور الفنية














لابتوب اللمّبي



يالهذا الجهاز وعظمتة...جهاز جبار ومتكامل المواصفات...

اذا اردتة استخدام شخصي وتصفح فهو يفي بالغرض...

اذا اردتة للتحمل وللسنين الطويلة فهو كذلك...

واذا أردتة للطرب والدي جي والحفلات الليلة : (451):فهو فائق الجودة...وسابق ومتقدم

على الكل في هذي التقنية...يملك سماعات ليس لها مثيل في عالم اللابتوبات...

سماعات صارخة تهز اركان الشقة...ويغنيك عن اي سماعات اضافية...

بل هو سبب احراجات لمن كان معي من الشباب بلابتوباتهم السيئة...

لدرجة ان واحد منهم رمى اللابتوب ديالة بدولاب الغرفة طيلة السفرة!!

لابتوب ديل ...تستخدمة الحكومات الالكترونية : (757):كجهاز اساسي متقدم التقنية...

لاتتعجب اخي القارىء...فمع لابتوب اللمّبي مش حتقدر تسكر اذنيك: (743):...



* لابتوب اللمّبي : لابتوب ديل Dell Latitude D530







تنبيه:
لابتوب اللمّبي ليس للبيع ولا للإعارة















أبطال التقرير









1 – النجم الأول .... ((اللمّبي))






((مايحتاج...تعرفونة...حبيب الملايين:yess:...بطل التقرير السابق بعام 2010م...زعيم كازا الأول: (757):...بالنهار ولد حبوب وظريف...وبالليل يطلع لمَبي أخر شمكاري وبطلجي : (703):: (160):لا يمكن السيطرة عليه!!))



مدة الإقامة : (( 47 يوم)) ...مابين38 يوم بكازا الحب: (149):... ويوم أسود بفاس...سبعه أيام بالرباط....











2- العربي باطمة.... ((الزير سالم))




(( الرجل اول ماتشوفة تقول وش هالشبهه: (162):!! تقول رئيس عصابة!!...لكن بالواقع رجل قلبة ابيض..مرح وفكاهي: (741):...ذو ابتسامه بشوشة.. الغريبة انه شعبي ومن سكان الحي المحمدي لكن ستايلة ايطالي ويعشق الاماكن الكلاص!!))



مدة الإقامة : (( خمسة أيام ))...بكازا..طبعاً هو جلس أكثر من هذي الايام...لكن انا حددت خمسة أيام بحكم إقامتي معه بالشقة..












3- مصطي ... ((روميو الرومنسي))






(( شاب رومانسي وعاطفي: (465):...متيم وصاحب قلب كبير...وقت السهرات تلاحظ انه منسجم مع الاغنية لدرجة انه شوي وبيغني!! وانا أرشحة لمسلسل مهند التركي الجزء الثاني...واذا كان في زماننا هذا روميو...فهو مصطي!!))




مدة الإقامة : (( 12 يوم)) ... بكازا..













4- بوقوس ... (( ديكولاص ))






(( ولد قروي ومشفوح: (181):...ديكولاص على قولة اهل المغرب...شمكاري ولبسة لبس حونش...لدرجة انه يلبس فنيلة برشلونة ويتمشى فيها!!...يعشق الاماكن الشعبية والسكن من فئة ابو كلب...والمطاعم حقت المجرمين!! وهو العدو اللدود للزعيم اللمّبي: (161):))




مدة الإقامة : (( 8 ايام ))...يوم أسود بفاس وبقية الايام بالرباط...وهذي فقط تعبر عن عدد الايام اللي أقامها معي..
















الأدوار الثانوية











وهناك أعضاء تشرفت باللقاء بهم بالمغرب...وصار لنا جلسات وطلعات حلوة...وراح اسرد عن لحظاتي ومواقفي معهم... واعتبرهم لهم ادوار ثانوية بالتقرير..وهم :












1- شير طلوى ... ((الفاهي))





(( رجل من فئات الوزن الثقيلة: (514): ...ماشاء الله مدرعة مصفحه تمشي...صاحب قلب حنين وعسل... فاهي وبالة مو معه أبداً: (502):...وللمعلومية الولد فنان وعزيف عود: (146):...ووعدني شخصياً بأنه بينزل مقاطع عزف على العود بالمنتدى...))












2- إقلاع ... ((الولد الكول وجه النحس ))






(( صحيح انه في بعض المواقف كان وجه نحس...لكن للامانة الولد من شباب الكول حقين جدة: (499):...لبس وذوق وستايبل: (610):...وغير كذا يجيد الرقص الغربي والشعبي: (700):))











3- شويكر ... ((المطفوق))





(( حسّاوي أهبل ومطفوق: (186):...مادري هو جاي للمغرب والا شرق أسيا...عليه طلعات وشطحات لاتناسب المغرب أبدا!!!))













4- مجروح وخوية أبو عبدالله...




((شباب مرحين...وراعين فله ووناسة))















5- وليد من ليبيا...








((قمة في الاخلاق والاخوة...وعكس صورة حسنة عن الاخوان الليبيين))













6- محمد المنصوري...






(( كان احد الاخوان اللي التقيت فية سابقاً العام بتقرير 2010م...ومن شباب دولة الامارات اللي تحطهم على يمناك))














7- TXA ... ((مزعوط سيدي رحال ))





(( الولد من شباب الكول حقين امريكا...هادئء ومحترم وطيب...لكن يبقى سر سكنه بسيدي رحال أمر محير!!))














8- بعكوك... ((عنتر البلاك))





(( مرعب البلاك الأول: (94):...الولد جاي للمغرب علشان يتضارب ويبقس الكل: (161):...مأدري هو مسافر للراحة والا للمصارعة!!...جسم وهرش بنفس الوقت: (510):...وياويلة وياسواد ليلة اللي يغلط عليه او يزعلة!!))














9- محمد الصومالي...





10- خوية البحريني...




(( لسى جديدين على المغرب...واول مرة يجون...ومن خيرة الشباب اللي تعرفنا عليهم))














11- الأخت عايدة... ((بنكي قلوز))




((صحيح انها سحبت علينا يوم تجمعنا أنا والأعضاء بالبلاك...لكن وعدها خير!! : (703):...بصراحه اخت خدومة وحبوبة وماقصرت معنا ولا مع الاعضاء بامور السكن والسيارات...))















سردت لكم أبطال التقرير...ومن رافقونا هناك والتقينا بهم...وان شاء الله روح الفكاهة والتعبير ماثقلت عليهم ولا زعلتهم: (113):...


دعونا نبداء تقريرنا الى المغرب 2011...الكل يطق خميتة...وحي الله الجميع...واللي يبي يشيش يجيب شيشتة...واللي يدخن يولع زقارتة: (723):...والبساط أحمدي:smi:...



بسم الله نبداء...وعليه نتوكل...
__________________
تابعونا: (456):...


تقرير سفرتنا الى المغرب 2011 (( اللمّبي & العربي باطمة & مصطي & بوقوس ))...3000 صورة !!!

تم انزال الحلقة الثالثة : الصفحة 22
النجم الأول

الـلـمـبــي

المشاركات: 2,032
تاريخ التسجيل: Jul 2010
النجم الأول غير متواجد حالياً  
قديم 2011-07-02, 12:00 AM
  المشاركه #2
رد: تقرير سفرتنا إلى المغرب 2011 (( اللمّبي & العربي باطمة & مصطي & بوقوس))..3000 صور

(( الحلقة الأولى : دقّــة ســاعــة الــســفــر!!! ))

















فكرة الذهاب








الفكرة كانت من قبل رجوع العضو البرنس طلبة ((شفاط النمل )) من امريكا تقريباً قبل اجازة الحج الماضية,,,






واتفقنا في ذيك الايام لما يرجع نروح على شهر ابريل,,,رجع الاخ اللطيف شفاط النمل

: (74):من أمريكا,,, وكانت هناك جلسات اجتماعات بخصوص السفرة انا وياه,,,واتفقنا يكون

السفر بنهاية شهر اربعة ميلادي والمخطط لمدة 25 يوم مبدئياً,,,وسوينا توزيع للمدن

وخلافة,,,وتم رفع الاجازة على ان تكون تاريخ الانفكاك ب 28 شهر خمسة

هجري
,,,بعدها بفترة لاحظت عدم جدية الاخ البرنس طلبة بالسفر,,,وكان متردد كثيراً

لظروفة الخاصة,,,وبالاخير حدث له ضغط بالعمل وتم رفض اجازتة لأسباب المرابطة

على الوضع الراهن بالبحرين وايران,,,واخبرني بذلك شخصيا بعدم مقدرتة للخروج بالوقت

الحالي,,,





المهم انا اجازتي راحت وتحددت بتاريخ 28 شهر خمسة,,,بعدها جتنا اخبار بحدوث مرابطة

وخلافة بالرياض,,,وجلست افكر وافكر: (608):

وعلى طاري التفكير نهديكم اغنية ابو بكر سالم







كانت الفكرة يوم الاحد الموافق 14/5/1432هـ,,,كانت التخطيط خطافي سريع سريع

وذلك بسبب ظروف العمل المقبلة,,,قلت اطلع قبل ما نرابط ويربطني بالدوام واكلها ولا

ولا أقدر,,,

طلعت من الدوام ,,,وانا كلي هواجيس وتفكير,,,وكان العربي باطمة وقتها بكازا ,,,قلت

خلني ادق عليه: (503): ...






>>>>>>>>>> : (( الو... ))


>>>>>>>>>> : (( هلا باللمّبي...))


>>>>>>>>>> : (( هلابك يالزير...كي داير الزين؟ واخبار المغرب وكازا؟))



>>>>>>>>>> : (( بخير والامور تمام وكول شي هاني...انت اخبارك؟))


>>>>>>>>>> : (( والله تمام...اسمع انا ممكن انزل قريب للمغرب....بقدم انفكاكي من العمل ممكن اسبوعين...كيف الاجواء هناك تنصح أجي والا لا؟ ))


>>>>>>>>>> : (( أبد تعال حياك الله...الامور بكازا عسل وحلوة...))


>>>>>>>>>> : (( حلو حلو... لاني افكر ممكن انزل الرباط يومين,,وبعدها على كازا,,, وبعدين انا مضطر كالعاده اطلع على خطوط ترانزيت وش رايك؟))


>>>>>>>>>> : ((شوف حبيبي..عندك الخطوط القطرية خلاص ماعاد توقف بطرابلس زي اول...من عقب الاهبل القذافي والاقلاع من الدوحة دايركت بدون توقف))


>>>>>>>>>> : (( ياسلام...مصائب قوم عند قوم فوائد...شكلي بشوف الخطوط السعودية اول وحجوزاتها وان ماضبطت نجي على القطرية والشكوى لله))


>>>>>>>>>> : (( ابد خذ راحتك...ومتى ماجيت كازا حياك الله عندي وتعال اسكن معي...تراني وحداني والشقة وسيعه))


>>>>>>>>>> : (( تسلم لي ياغالي... واهم شي نتقابل هناك...خلني اشوف الحجوزات والاوضاع مع الدوام بكرة وارد لك خبر))


>>>>>>>>>> : (( اوكة وهو كذلك))


>>>>>>>>>> : (( يله يالزير...ماطول عليك..مع السلامة))


>>>>>>>>>> : ((مع السلامة))





سكرت السماعة ,,,وقلت خلني ارقد واشوف الدوام بكرة وش بنرسي عليه: (119):,,,









يوم الإثنين 18/4/2011م







داومت الاثنين,,,ونسقت مع دوامي,,,وسبقت انفكاكي بالاجازة وخليتها على السبت

الجاي,,, وتعذرت بعذر الله يسامحني ويغفر لي لان عذري كان زي وجهي والله لايقولة

ان شاء الله,,, لكن وش السواة للضرورة احكام,,

جلست اقلب بالحجوزات بالنت,,,الخطوط السعودية فل,,,مافيه الا يوم الاربعاء

الثاني,,,وانا انسان مستعجل وابي اطير الويكند هذا قبل ماتجينا اوامر ولا نروح,,,وكان

معي على المسنجير العضو ولد حرب: (757):,,,وبصراحة بيض الله وجه وماقصر,,,وجاب لي كذا

عرض لكذا خطوط,,,وبالاخير استقريت على الخطوط القطرية لانها اقرب رحلة لي

وانسب طلعة,,,وقصيت التذكرة من موقع الخطوط القطرية,,,وكان خط السير بصراحة

قلت حياء!!! خط السير :



*يوم الخميس الموافق 21 إبريل 2011 الاقلاع الساعة 6 وربع المغرب من
(( الرياض – الدوحة)) وتوصل الدوحة الساعة 7 وربع مساءً .

*ثم المبيت بالدوحة بفندق على حساب الخطوط من ضمن التذكرة

*ثم الاقلاع صباح يوم الجمعه الساعة 8 ونص من ((الدوحة – قرطاج (تونس) توقف ساعة ))

*ثم الاقلاع الى الدار البيضاء والوصول الساعة الرابعة عصرا من يوم الجمعة بالتوقيت المحلي لمدينة الدار البيضاء!!








*بإستطاعتكم عمل الحجز وقص التذكرة عن طريق موقع الخطوط القطرية بالرابط التالي





*موقع سهل الاستخدام وسلس جدا,,,وطريقة الدفع عن طريق البطاقة الائتمانية





صورة للتذكرة من الموقع







قيمة التذكرة ب 1825 ريال,,,طبعا التذكرة ذهاب فقط,,,وحسبي الله عليك يالزير!! أجل

دعسة وحدة دايركت من الدوحة لكازا!!! دايركت مين والناس نايمين!!!

والعودة ماقصيت تذكرة بس معي تذاكر حكومية مفتوحة متى ماجات الحاجة حجزت

ورجعت,,,

واطلع من الدوام يوم الاثنين,,,وأشيك على جوالي,,,وألقى miss call من اخوي مصطي

وادق علية: (214):,,,






>>>>>>>>>> : (( كيداير ياروميو؟...ازيك ياحلو..))


>>>>>>>>>> : (( أيوة يالمّبي...بخير ياحبيبي...وانت اخبارك؟ ووين الناس غايب! لاحس ولاخبر!))


>>>>>>>>>> : (( تمام حبيبي...أبد والله قرف هالدوام ومشاغلة..اسمع انا طالع يوم الخميس للدوحة ثم للمغرب))


>>>>>>>>>> : ((يؤ! وش هالرحلة المفاجئة!))


>>>>>>>>>> : (( هذا انت قلتها مفاجئة!!ظروف العمل تحتم علي هالشي حسبي الله عليه من دوام...قلت اضبطها سريع سريع...واروح وانبسط ومتى مادقو علي الدوام رجعت...))


>>>>>>>>>> : ((كان الله بعونك...ورحلة سعيدة..اجل وين ناوي تنزل بالمغرب؟))


>>>>>>>>>> : (( يسعد ايامك ...بنزل بكازا ومفكر اطلع للرباط على طول اجلس فيها يومين واشوف الاوضاع كان جازت لي والا رحت لكازا...واذا حصل لك فرصة تجي حياك الله))


>>>>>>>>>> : ((والله حتى انا ودي اروح...بس مثلك عارف عندي اجرائات نقل ودي اخلصها ونفس الوقت ودي أنزل للمغرب انبسط واغير جو...بشوف الوضع ...ويكون بيننا اتصال...))


>>>>>>>>>> : ((أوكة ياملك الرومنسية... يله انا مستعجل الحق ماتلحق باقي لي يومين على الرحلة...بجهز اموري...مع السلامة))


>>>>>>>>>> : (( الله يعينك...مع السلامة ))





سكرت السماعه,,,ورجعت البيت,,,وبديت اجهز للسفر واشوف اموري وش اللي ناقص

واللي احتاجة,,,وكنت أهوجس وافكر هل أروح للرباط على طول اول مأصول او لا؟: (186):,,,لكن غيرت قراري بالاخير وشفت خط السير سيكل ومتعب قلت اخليها

بعدين ,,,واستقر القرار على كازا,,,ونسقت مع كذا جهة بخصوص الشقة وكلمتهم

يشوفون لي شقة لشخص واحد,,,وبعدها دقيت على العربي باطمة,,,: (503):







>>>>>>>>>> : (( هلا بالزير!!: (102):))


>>>>>>>>>> : (( هلا والله ...هاه وش صار عليك؟))


>>>>>>>>>> : ((جايك يالمغرب جايك: (153):...بس مالقيت الا على الخطوط القطرية...وخط سير أبو كلب: (437):...ويابو الشباب فيها توقيفة بقرطاج!!))


>>>>>>>>>> : (( أفاا!!!..والله غريبة ياخي اخبرهم كنسلو الترانزيت من بعد احداث ليبيا))


>>>>>>>>>> : (( كنسلو مين والناس نايميين!!! الا خط سير متعب...لكن الشكوى لله مالنا الا هي))


>>>>>>>>>> : (( يارجال وسع صدرك...اهم شي تجي للمغرب وتنبسط...وترى سهرتك يوم الجمعه عندي بالشقة..لاتنسى))


>>>>>>>>>> : (( يارجال بوصل تعبان من هالرحلة...كني جايك على سيكل مو طيارة!! علشان كذا كنسلت الرباط...و خلها بعدين لما اوصل نتفاهم))


>>>>>>>>>> : (( ماعلي منك...بجهز السهره يوم الجمعه وحياك))


>>>>>>>>>> : (( مو مشكلة يالزير لما أوصل بيننا اتصال...مع السلامة ))


>>>>>>>>>> : ((مع السلامة))








سكرت السماعة,,,وطلعت من البيت ووديت ملابس للمغسلة للغسيل والكوي استعداد

للسفر,,,ورحت أشتري بعض الاغراض والمستلزمات اللي احتاجها ومن ضمنها شنطة
جديدة,,,













والميزة في هالشنطة,,,ان لها رقم سري وقفل خاص,,غير الاقفال على أطراف

الشنطة ولها مفاتيح ,,,وغير كذا انها بلاستيك مقوى,,,يعني اللي يبي يسرق منها لازم

يكسرها,,,وفيها ميزه بعد انها خفيفة جدا,,,بعد ماشريتها,,,رحت شفت لي بعض

الملابس والجزم,,,وشوي كذا ويجيني اتصال من مصطي الرومنسي,,,: (214):








>>>>>>>>>> : (( مساء الخير لمّبي ))


>>>>>>>>>> : (( مساء الانوار ياروميو...أمر ياحبوب))


>>>>>>>>>> : (( اسمع...ياولد شيكت على الحجوزات والخطوط السعودية...وشفت وضعي يسمح اقدر اجي 10 ايام الى 12 يوم...وحصلت على يوم الاربعاء الثاني يعني بعد 10 ايام...وش رايك؟))


>>>>>>>>>> : (( : (95):...اجل الشوق ذابحك ياسي روميو...أبد اذا ضروفك تسمح...تعال حياك الله...))


>>>>>>>>>> : (( ايه والله مشتاق للمغرب...طيب ...انا ممكن انزل بكازا ...أنت وش وضعك؟))


>>>>>>>>>> : ((ابد ياغالي...انا شلت فكرة الرباط من رأسي وخليتها بعدين بسبة خط السير المخيس...بريح بكازا وبعدين بشوف الوضع))


>>>>>>>>>> : (( طيب ووضع السكن هناك كيف...بتسكن لحالك والا معك احد؟))


>>>>>>>>>> : (( انا حالياً جالس ابحث عن شقة لشخص واحد...بسكن فيها...واذا جيت انت نشوف لنا شقة مناسبة لإثنين...وربك يفرجها))


>>>>>>>>>> : (( (( خلاص...تم...بقص التذكرة أجل وبيكون بيننا تواصل...يله مع السلامة))


>>>>>>>>>> : (( اوكة...وهو كذلك..مع السلامة))







سكرت السماعة,,,وخلصت اشغالي من السوق,,,وقلت اروح اريح بالبيت واكمل

الاغراض بكرة,,,وصلت البيت ونزلت الاغراض,,,وعلى الفراش على طول وانعس: (119):,,,











يوم الثلاثاء 19/4/2011م








صحيت الصباح,,,ورحت للدوام,,,وبعدها طلعت للبيت وجلست اضبط الاغراض,,,وجبت

الملابس من المغسلة وحطيتها بالشنطة,,,شوي كذا وجوالي يرن,,,وألقط الجوال وأرد

على عجالة من دون ماشوف الرقم,,,: (503):







>>>>>>>>>> : (( الو... ))



............ : (( شششششششششش<<<<وشوشة وازعاج!!))


>>>>>>>>>> : (( الو مين!!! تكلم!!!: (103):... ))


>>>>>>>>>> : (( هلا والله باللمبي ...سمعنا انك رايح للمغرب يوم الخميس...شفت موضوع منزلة لك مصطي يقول انك بتروح...ياخوي كلكم بتروحون ماعاد باقي احد بالمزاعيط...يعني كل المزاعيط هجرة جماعية...ياخوي وش السالفة))

>>>>>>>>>> : (( لعنة!!! 600 ألف كلمة في الثانية!!! بربار أنت!! بالع رادو يابو الشباب!! خل عنك الطفاقة يالقروي..وش تبي!!))


>>>>>>>>>> : (( ياخوك وش فيك شايف نفسك علينا...علشانك بتروح قبلنا يعني!!...حتى انا بروح بعد ...بطلع على الخطوط السعودية بعد 10 ايام...وراكم وراكم : (702):))

>>>>>>>>>> : (( أجل جاي ياوجه الفقر!! ياليل أبو لمبة!!))


>>>>>>>>>> : (( اية جاي ...حتى انا ابي اتونس ياخوك...شف اسمع انا بنزل بكازا يومين وبعدها بروح للشمال...انت وش وضعك!!))

>>>>>>>>>> : ((والله ياديكولاص...بنزل كازا لحالي اول الايام...وبعدها بيجيني روميو الرومنسي...وبنجلس بكازا اذا حصلنا سكن والا رحنا لمراكش او الرباط))


>>>>>>>>>> : ((مافيك شدة للشمال...فاس او مكناس...لاني باخذ سيارة من المطار تعجبك ومتكتكة وناوي ادز فيها للشمال ))

>>>>>>>>>> : (( لا ياديكو قريح...من شفت خشتك وعارف ماوراك الا الفقر!!...أنا بجلس بكازا كان جاز لي الوضع...والا غيرت للرباط او مراكش))


>>>>>>>>>> : (( انت الخسران يالمّبي...طيب...ماتخبر شقة لشخص واحد معها شغالة بكازا تكون كلاص وتناسبني...اجلس عندهم يومين قبل ماروح للشمال...))

>>>>>>>>>> : (( فيه شقة تصلح لشخص واحد فيها شغالة وزوجها وكلاص وفوق مستواك يالقروي..شقة ماتحلم فيها انت وخشتك...بس خلني افضى وارسل لك الرقم...الحين انا مشغول على شوشتي))


>>>>>>>>>> : ((حلو...بإنتظارك...يله اجل ماطول عليك...))

>>>>>>>>>> : ((يله ... مع السلامة ))


>>>>>>>>>> : ((مع السلامة ))






بعدها سكرت السماعة ,,,وانشغلت بالتحضير والتجهيز للسفر,,,حتى جاء وقت النوم,,,

وكبرت الوسادة ونعست: (119):,,,












يوم الاربعاء 20/4/2011م










صحيت الصباح كالعادة,,,رحت للدوام,,,واخذت اوراق الاجازة وودعتهم,,,بعدها رحت

للبيت,,,وكملت التجهيزات للسفر تقريباً صرفت لايقل عن 2500 ريال للأغراض,,,وبصراحة كان يوم الاربعاء 20/4/2011 م يوم وجه

سعد على جماهير الملكي البيضاء: (171):,,,ويوم تاريخي لاينسى بفوز ريال مدريد بكأس أسبانيا

واحد صفر على غريمة التقليدي برشلونة,,, هدف رائع وارتقاء ذهبي وعملاق,,,عن

طريق هذا اللاعب الاسطوري ((كريستيانو رونالدو)) : (757):قاهر الكتالونيين,,,

















وكان يوم حزن وصدمة قوية لجماهير برثلونة المساكين,,,وفي النهاية لا يصح الا

الصحيح,,, والتاج لا يلبسة الا الملوك: (757):,,,وكان سهرة الاربعاء بالرياض عامرة بالسعادة

والافراح,,,حتى اتى وقت النوم ورقدت: (716):,,,




















يوم الخميس 21/4/2011م











صحيت من النوم على الساعة 11 صباحاً,,,اجهز بعض الشنط والاغراض اللي

ماجهزت ,,,صليت الظهر,,, واطلع لحلاق تركي قريب من البيت,,,

دخلت الحلاق وأجلس على الكرسي حق الحلاقة,,,وأقولة




>>>>>>>>>> : (( شف ياعم...أبغى تحلقني اليوم: (123): كأنك تحلق لعريس بيتزوج الليله: (169):))


>>>>>>>>>> : ((الف الف مبروك...وزواج سعيد ))


>>>>>>>>>> : (( زواج مين والناس نايمين!!...وانت مصدق!!: (704): اعتبرني عريس وضبطنا وخلاص))


>>>>>>>>>> : ((وين بتروح شهر العسل ان شاء الله))


>>>>>>>>>> : ((أي شهر عسل الله يرجك!!...وأنت لازلت مصدق!!...لكن ولاتزعل...الديرة اللي بروح لها فيها أشكال وانواع من العسل الطبيعي: (201):...وبعتبري نفسي كل يوم عريس: (492):...بس انت ضبطني وشل وجه اللمبي وحط رشدي اباظة))


>>>>>>>>>> : ((تكرم عينك... اخليك وائل كفوري: (740): مو رشدي...ولايهمك))





واجلس بالحلاق 3 ساعات,,,صنفرة : (466):وغسيل وحلاقة شعر وحمام زيت وسكسوكة

وليزر,,,مافيه شي بالحلاق والا وحطيتة في خشتي,,,

اول ماخلصت من الحلاقة وقمت من الكرسي ,,,واطالع وجهي بالمراية,,,تصدقون

انصدمت!!! : (436):ماعرفت نفسي,,,

اطالع بالمراية اشوف توم كروز مو لمّبي<<<< لايكثر: (137):

والتفت على الحلاق ,,,واقوله






>>>>>>>>>> : (( اقول حبيبي رجع وجه اللمّبي يرحم والديك...كذا اهانة لي راح اواجه تحرشات وكلام جارح: (89):...وانا انسان بطلجي: (161): والوجة هذا مايناسبني))


>>>>>>>>>> : ((أحمد ربك اننا قدرنا نغير من خلقتك انت وجهك اللي كان مطشر شعر!! قلبتك من لمّبي حونشي...الى واحد يفتح النفس شوي ))


>>>>>>>>>> : (( ((: (82): يله راح نتحمل هالشكل حتى اوصل كازا...وبعدها احلق لنفسي وأرجع لشكلي الاول))







وأحاسبة واطلع للبيت,,,واحلى ترويشة: (127):,,,,والبس البدلة وانادي اخوي علشان يوديني للمطار

لان الساعة كانت ثلاث ونص العصر والاقلاع 6 للدوحة,,,ركبنا الشنط بالسيارة,,,ونتجهة

الى مطار ملك خالد الدولي,,,






وصلت المطار على 4 ونص العصر,,, على بوابة الخطوط الاجنبية,,,

نزلت من السيارة وأخذت عفشي,,,وودعت اخوي بالاحضان,,,وادخل الصالة,,وكانت

السرى زحمة زحمة غير طبيعية على كاونترات العفش والتفتيش,,,وكان الغالبية اجانب

هنود وبنقال وبعض الدول العربية,,,واتلفت يمين ويسار وأشوف لي عامل هندي

حمالي
,,,واناديه,,,واقوله




>>>>>>>>>> : (( صديق شيل شنطة وودي قدام ودخل عفش...انا مافي انتظار))




ويلقط الشناط طير شلوى الهندي مو شير طلوى العضو,,,ويزر فيها بين العالم مساقط

ومزارق حتى وصلها لكاونتر التفتيش ودخلها حتى وصلني لكاونتر الخطوط القطرية في

أقل من دقيقة!!!

يعني بالعربي لو سويت نظامي وجلست بالانتظار كان فاتتني الرحلة بسبب هالتزنت

والاجراءات التعقيدية اللي مالها داعي!! سبحان الله حنا اردى ناس في الاجراءات

والتعقيد والسرى الطويل اللي مايمشي!!!

المهم وصلنا الكاونتر حق الخطوط القطرية واعطية الجواز والتذكرة,,,واحط الشنظ

للشحن,,,واحاسب ابو هنود الحمالي ((طير شلوى)) وراح,,,

شوي كذا والا يقول لي موظف الكاونتر ((هندي)) حق الخطوط القطرية





>>>>>>>>>> : (( مدير...ليش أنتا مافية تذكره عودة!!!))


>>>>>>>>>> : ((كيف مافية عودة؟ ازاي يعني؟))


>>>>>>>>>> : (( انتا حجز فيه روح رياض دوحة كازا...بس انتا مافي ارجع؟ ليش مدير؟!!))


>>>>>>>>>> : ((وانت وش دخلك!! إرجع ما إرجع مو شغلك!! : (102):بسرعة يله اشحن عفش وعطني البوردينق خلني امشي!!))


>>>>>>>>>> : ((مدير!!! انتا مافية روح!!!))


>>>>>>>>>> : (( كيف مافي روح!!!!: (786):))


>>>>>>>>>> : ((لازم فية عودة قطرية من الدوحة والا مافية روح!!))


>>>>>>>>>> : (( حمار انتا!!!: (76): وش دخلك امك انا ارجع والا لا!!! جيب تذاكر والبوردينق بسرعة!!))


>>>>>>>>>> : (( مافية سفر خلاص!!! أنا في كلم مدير انا الحين...يله شيل شنطة!!))




ويطلع الهندي جوالة ويدق على مدير الكاونترات أو المشرف علشان يجي,,,

وانا مأتحمل ويجن جنوني: (76): واطلع عن طوري!!! واقولة



>>>>>>>>>> : (( (( يالثور جيب تذكرة ياحيوان!!! مجنون انت كيف تقول لي هالكلام!!! على كيف امك ارجع عن طريق خطوطكم!!! ياخي انا برجع مثل ماحب مو شغلك!!!))


>>>>>>>>>> : (( صبر شويا مدير!!! انتا ليش في زعلان!!! : (104):شويا اجي مدير كبير في كلام انتا!!))






وانتظر شوي وانا معصب ومتنرفز: (76):,,,والناس تتطالع ومستغربة وماتدري وش فية,,,ويتأخر

المدير الكبير على قولتة,,,وارجع واتهاوش معهم مرة ثانية,,,ودقو علية مرة ثانية

وبالاخير جاء,,, وكان قطري سوبر فايزر بالخطوط القطرية دبدوب وطيب: (761):,,,وامسكة واقولة





>>>>>>>>>> : ((ياحبيبنا ياغالي....وش قلت الحياء هذي!!! وش هالمسخرة!! وين عايشين بابني ادم!!! انا دافع فلوس ابي اسافر!!! واخرتها ذا المريض يقول مافية عودة على القطرية ماتسافر!!! وش ذا الاهبل!!))





وكان كلامي بصوت مرتفع والناس تناظر,,,والرجال شكلة محترم وخجل من كلامي,,,



>>>>>>>>>> : (( ياخوي هد اعصابك وحقك علي...واللي تبي بيصير...بس تراني ماني فاهم وش السالفة...خلني اشوف الهندي علشان اعرف المشكلة))




راح المشرف وشاف الهندي,,,,ثم رجع لي وقال لي,,,




>>>>>>>>>> : (( يالغالي...انت معك تذكرة عودة من الدار البيضاء الى الرياض؟))

>>>>>>>>>> : ((لية وانت وش دخلك!!: (103):...لأتكونون مسئولين عنا وبنكون رعايا الخطوط القطرية وحنا ماندري!!!))


>>>>>>>>>> : (( ياحبيبي الله يرضى عليك...الاجرائات عندنا ومن امن مطار الملك خالد الدولي...ان لازم تكون معك تذكرة عودة لبلدك سواء من عندنا والا من أي خطوط أخرى الا اذا انت مبتعث او دبلوماسي شغال بسفارة او ملحقية خارجية...لانك ياغالي تذكرتك ذهاب ولا فيها عودة...علشنا كذا نسئلك...طيب معك تذاكر عودة من خطوط ثانية؟))

>>>>>>>>>> : ((والله حبيبي معي تذاكرحكومية على الخطوط السعودية للعودة))


>>>>>>>>>> : (( بس ياغالي...خلاص انتهى الموضوع...عطني التذكرة السعودية حقت العودة))




راح المشرف و كلم الهندي الاهبل وخلاه يمشي الاغراض ويشحن العفش وعطاني

البوردينق,,,وجاني المشرف يتأسف ويعتذر,,,وقلت له






>>>>>>>>>> : (( حتى ولو ياغالي...كلام فاضي ذا اللي حاصل!!! وش ذا الاسلوب والتعامل السيء من موظفكم الهندي الدلخ!!! : (181):مادري الاخ شايفنا شحاذين والا طرارين يوم يقول لي مافية روح خلاص!!! اذا هو مايعرف يشرح للناس وش يبي ياخي لاتحطونة على كاونتر خلوة حمالي ويخب علية ذا الثور!!: (76):))


>>>>>>>>>> : (( امسحها في وجهي...والله اني داري انه ثور وكمخة بس وش نسوي ملزومين نوظفهم))

>>>>>>>>>> : (( حصل خير يالطيب...وتوبة ان جيت على القطرية مرة ثانية ))


>>>>>>>>>> : ((يارجال تعوذ من ابليس وهد اعصابك...تراك رايح لكازابلانكا حبيبي: (87):...المفروض تكون مبسوط ولابتكدر خاطرك..))






المهم ياشباب انا طلعت من عندهم بعد مارتفع ضغطي ووصل اعلى حرارة: (440):,,,وصار فعلا

اجرائات جديدة أمنية بالمطار ,,,أذا عندك رحلة خارجية ولامعك تذكرة عودة ماتطلع!! الا

اذا تكون مبتعث او تشتغل بالملحقيات او السفارة وتحضر معك مايثبت هالشي!!!


مشيت من عندهم,,,واخذت البوردينق حق الرحلتين,,,



الاولى : الرياض الى الدوحة












الثانية : الدوحة الى الدار البيضاء









واروح للجوازات للتختيم,,,واختم الجواز زي الحلاة وامشي داخل بصالة الانتظار,,,,

وأتوضى واصلي العصر بمسجد المطار,,,













بعد الصلاة طلعت من المسجد,,,وجلست التقط صور للمطار














مقهى ستار بوكس













مصرف الراجحي : (440): في كل مكان تلقاه!! عليه واسطه!!: (786):













المعّلم البارز في مطارنا...النافورة: (434):




















وهنا لو تلاحظون العمالة الوافدة على البلد:om1g:...ناقصين زحمة حنا!!






















































وكنت وقتها جوعان شوي,,,قلت انا دايم اكل بستار بوكس,,,لكن هالمرة خلنا نغير,,,

ورحت لكوستا كوفي ,,,واخذ من عندهم كروسان جبن وعصير برتقال




















وهذا العامل اللي سوى لي العصير: (708):



















وهذا اللي جاب لي الكروسان,,,مادري وش فية نفسة خايسة: (440):















أخذت طلبي,,,ورحت وشفت لي طاولة زينة وجلست فيها,,,














أكلت سريع سريع,,,وكان حساب المقهى 25 ريال,,,
















بعدها طلعت من المقهى,,,واتجهت لبوابة الصعود الى الطائرة وكان رقمها 13,,,



































جلست اصور الساحة حقت الطائرات






























واجلس بأقرب كرسي واطلع اللابتوب وأجلس اتفرج على مقاطع,,,شوي كذا ويجي

موظف الخطوط القطرية ويخبر المسافرين أن الطيارة بتتأخر نص ساعة عن موعدها

الاصلي!!!,,,ياليل الليل هذي اولها ينعاف تاليها,,,,مالنا الا ننتظر مو مشكلة,,,وفعلا تأخرت

نص ساعة ثم جت الطيارة,,,

















صفينا سرى للصعود الى الطائرة,,,وركبنا الطيارة وكان مقعدي رقم 37 على

النافذه,,,ويوم وصلت لمه والقى جنبي رفيق هندي: (185):,,,عموما الطيارة كلها هنود وشغالات

وعمالة شكل عندهم ترانزيت لبلدهم,,,











وهذي صور بداخل الطائرة



















































تحدث كابتن الرحلة,,,وكان مصري بربار وشكلة مو مصدق انه كابتن كل شوي وماسك

المايك وجالس يبربر,,,ازعج امنا ازعاج!!

اقلعت الطائرة,,,متجهة للدوحة,,,وكانت الرحلة خفيفة جدا ولاتذكر,,, الا أن الهندي اللي

جالس جنبي ازعجني كل شوي: (782): فاجر امها وكتمني بخياسة!!!
والهنود هذولي وراي

وراي بالسفرة!!!!


وصرفو لنا وجبة خفيفة عبارة عن ساندويش صغير مع عصير,,,انتهينا من الاكل,,,وقرب

موعود الهبوط لمطار الدوحة الدولي,,,








فاصل ونواصل...





يله محتاجين شوية تشجيع بالردود...واذا عندكم ملاحظات او اقتراحات اضيفها او اشيلها

بالحلقات القادمة...كلي إذن صاغية لكم...





محبكم اللمّبي: (708):























ترقبوا بالحلقة القادمة....


بعنوان : (( بابا ... ماما... ماكدو ))


الاحداث :

• حارة المصريين بالدوحة وفندق الخطوط القطرية أبو كلب!!!: (703):

• قرطاج (( لقد هرمنا...هرمنا...حتى هذي اللحظة التاريخية))!!

اللمَبي تخوبر بالشقق بكازا!!

• شقة الزير سالم : (708):والليالي الملاح...

الشحاذ البزر...يبي يطرح اللمّبي!!
__________________
تابعونا: (456):...


تقرير سفرتنا الى المغرب 2011 (( اللمّبي & العربي باطمة & مصطي & بوقوس ))...3000 صورة !!!

تم انزال الحلقة الثالثة : الصفحة 22

التعديل الأخير تم بواسطة النجم الأول ; 2011-07-02 الساعة 12:19 AM
شفشاون
موقوف
المشاركات: 167
تاريخ التسجيل: Oct 2010
شفشاون غير متواجد حالياً  
قديم 2011-07-02, 12:45 AM
  المشاركه #3
رد: تقرير سفرتنا إلى المغرب 2011 (( اللمّبي & العربي باطمة & مصطي & بوقوس))..3000 صور

ماشاءالله عليك تقرير من بدايته بيجننا واصل ونحن معك

ولا عليك الى الامام الى الامام وانت قائد المسيره . . .
Nadosh
موقوف
المشاركات: 9,263
تاريخ التسجيل: Mar 2011
الدولة: بلاد الكفار
Nadosh غير متواجد حالياً  
قديم 2011-07-02, 01:15 AM
  المشاركه #4
رد: تقرير سفرتنا إلى المغرب 2011 (( اللمّبي & العربي باطمة & مصطي & بوقوس))..3000 صور

: (142):
اشوا لحقت الفلم من الاول
احسه ولا مسلسل سنوات الضياع
يالله شهر كامل كل يوم حلقة نلحق على رمضان
نخلص قبل الزحمة
عشق المغرب
مزعوط نشيط
المشاركات: 52
تاريخ التسجيل: Jun 2011
عشق المغرب غير متواجد حالياً  
قديم 2011-07-02, 01:22 AM
  المشاركه #5
رد: تقرير سفرتنا إلى المغرب 2011 (( اللمّبي & العربي باطمة & مصطي & بوقوس))..3000 صور

يا مرعب انت والله البداية تخوف , معاك إلا النهاية
pinkygloss4
مزعوط نشيط
المشاركات: 55
تاريخ التسجيل: Jul 2010
pinkygloss4 غير متواجد حالياً  
قديم 2011-07-02, 01:35 AM
  المشاركه #6
رد: تقرير سفرتنا إلى المغرب 2011 (( اللمّبي & العربي باطمة & مصطي & بوقوس))..3000 صور

تقرير شيق بس صورتي طلعت حلوة هههههه مشكور يا غالي
saadora
مزعوط خبير
المشاركات: 6,206
تاريخ التسجيل: Dec 2010
الدولة: الجبيل
saadora غير متواجد حالياً  
قديم 2011-07-02, 01:44 AM
  المشاركه #7
رد: تقرير سفرتنا إلى المغرب 2011 (( اللمّبي & العربي باطمة & مصطي & بوقوس))..3000 صور

واصل وبدون قيود من عندي وتقرير بيكون طعمة غير
صدى المزاعيط

زعــــيـــم الــعــــرب

المشاركات: 563
تاريخ التسجيل: Aug 2010
الدولة: الكويت
صدى المزاعيط غير متواجد حالياً  
قديم 2011-07-02, 02:32 AM
  المشاركه #8
رد: تقرير سفرتنا إلى المغرب 2011 (( اللمّبي & العربي باطمة & مصطي & بوقوس))..3000 صور

مساكم الله بالخير .... جميع ....
__________________
https://www.mza3et.com/up/uploads/images/mza3et.com-55e8bde919.jpg
بوقوس

تقرير سفرتنا إلى المغرب 2011 (( اللمّبي &amp; العربي باطمة &amp; مصطي &amp; بوقوس))..3000 صورة!!!

المشاركات: 1,146
تاريخ التسجيل: Aug 2010
الدولة: الرياض
بوقوس غير متواجد حالياً  
قديم 2011-07-02, 02:37 AM
  المشاركه #9
رد: تقرير سفرتنا إلى المغرب 2011 (( اللمّبي & العربي باطمة & مصطي & بوقوس))..3000 صور

تقرير في البدايه يعني نقول وفقت فيه
اجل تقولي الحلاق قلب وجهك توم كرواز هذي قويه قويه والله يبيلك ورقه اصلاح وورشه في الصناعيه ويالله يالله يطلع وشجهك مقبول .
بعدين 3000 صوره ومصورلي بنك الراجحي ونافوره المطار والكروسان الي ماكله والهندي الي عطاك مابقى الى تصور الصحن عقب ماكلت
حاول انك تقلل من هل صور
لاومصورلي شنطت الحوامل حقتك والله لو انك مبتعث كن كفتك
انت وشنطه المطلقه ....: (724):
هذي اقتراحاتي وملاحظاتي
واصل فشلك يافاشل .........: (435):
__________________


لا تيق لا تيق حتى تفرز لعدو من الصديق
صدى المزاعيط

زعــــيـــم الــعــــرب

المشاركات: 563
تاريخ التسجيل: Aug 2010
الدولة: الكويت
صدى المزاعيط غير متواجد حالياً  
قديم 2011-07-02, 03:16 AM
  المشاركه #10
رد: تقرير سفرتنا إلى المغرب 2011 (( اللمّبي & العربي باطمة & مصطي & بوقوس))..3000 صور

واصل ابداعك يابو حميد ....... وياك للنهاية
__________________
https://www.mza3et.com/up/uploads/images/mza3et.com-55e8bde919.jpg
موضوع مغلق


الذين يشاهدون محتوى الموضوع الآن : 1 ( الأعضاء 0 والزوار 1)
 
أدوات الموضوع
انواع عرض الموضوع

الانتقال السريع

المواضيع المتشابهه للموضوع: تقرير سفرتنا إلى المغرب 2011 (( اللمّبي & العربي باطمة & مصطي & بوقوس))..3000 صورة!!!
الموضوع آخر مشاركة
تقرير سفرتنا إلى المغرب ... 2013-10-04 09:33 PM
السكب في منعطف المغرب العربي 12-2011 2012-04-02 04:01 AM
اهداء للعضو الغالي العربي باطمة... 2011-05-27 03:40 PM
تم بحمد الله وصول بوقوس و مصطي للمغرب 2011-05-26 05:51 PM
أخونا العربي باطمة إلى المغرب 2010-10-09 09:41 AM


الساعة الآن 08:06 AM