يالطلح

قال الشاعر

يالطلح مامرك مع الصبح صافي

طير غدا لي امس والشمس حيه

اتلى العهد به راح يطرد مقافي

خبري به اوما في جناحه هنيه


ورد الطلح


لاوالله الا مرنا العصر وافي

كنه غلام مستغير بهيه

اقبل علينا ثم اخذ بانحرافي

يوم الحباري وقعن له سويه


قال الشاعر


يالطلح قل لي عل مابه خلافي

البارحه برد وشمال قويه

كانه تعشى قلت عله عوافي

والحي يجمعه الولي مع خويه


ورد الطلح

لاوالله الا صاد خرب متعافي

واخذ عليه من الثنادي شويه

لامفلس مره ولاقال كافي

يوم اخلفنه عن عشاه حقبيه


قال الشاعر


خابره والله قاطع مايخافي

دايم على الصيده تجي له حميه

انشدك باللي منبتك بالسوافي

عساه في خير ولافيه سيه


رد الطلح

خبري به اقرش في سبوقه خلافي

مابه بلا وامرح على هالحصيه

والفجر شخص بالنواظر وشافي

طلعه بعيد ويمته ساحليه


قال الشاعر


يالطلح ذا حبه ولاهو بخافي

متعادل حبه بحب البنيه

بعض الطيور ان راح قلنا عوافي

لاشك هذا وين ابلقى حليه


رد الطلح

اتعب عليه وعادت الحر يافي

اضرب سهلها والوعر والشقيه

يجيبه اللي رازق هالعجافي

بهايم تمشي على غير نيه


قال الشاعر

يالطلح لك مني يابو غصن ضافي

لاجابه الله وكل نيه مطيه

لاجيك انا في موتر القش هافي

واسقيك هاللي باقي بتانكيه

وآطا على رملة سوافيك حافي

وكل على ماقيل يذكر خويه


الشاعر / حمد السعيد

شكرا لك على الاختيار الشاعر حمد السعيد غني عن التعريف , قصيده معروفه ولها مكانتها عند القوانيص بصفه خاصه والشعراء بصفه عامه , وهي من أروع ماقيل في ضياع الطير ... تقبل مروري

__________________