قصيدة بعنوان / من ذاق لحم الريم عاف البعارين
ياسامع مني نصيحة وبرهان *** لشبابهــا وشيبانهــا والبخيليــن
خسران ياللي تجمع المال خسران *** ماتنفعك دنياك والعمر سبـــــعين
ولـــدك مـــرتاح بهـا وانت شقيـــان *** عندك عجوز وجامع لك مــــــلايين
تجي من اعمالك إلى البيت زهقان *** تبي قدوع وقهوة وشاهـــــي زين
تطلب غداك من الفجر وانت جوعان *** قطعة دجاج مثلج ورز بصـــــحين
زوجتك عجوز كالهزيلة من الضــأن *** تلج وتخاصم تقل تطلبــــك ديــــن
تشكي ضهرها والمفاصل وسيقان *** والضغط والسكر مع منطق شين
وعيال بنتك عندها تقــل فيـــــران *** تخرب كما خرب سد مأرب شياطين
تكســـــر فناجيل ودرايـش وبيبان *** صجــة ولجـــة عنــد وجهك وبزارين
قم واستعذ بالله من كل شيطــان *** اظهــر وخــل البيت وانــص الديايين
تلقى سماط وكبسه ولحم خرفان *** من رأس مالك يخصمونه من الدين
متع حياتــك قبـــل يارثك قطــعان *** لاشاف جثمانك على القبر بكفيــن
يأخذ بناتك والمــــهر منه طفــران *** يتهنى بمالك وأملاكك والملاييـــــن
ويفرش له فراشك وبيتك له اسكان *** يتنعم بثروتك وحلالك يامسيكين
تزوج الأبكـار مادمـــــت شبـــعان *** وأم العيــال في بيتــــها والبــزارين
اغنم وخذلك بنت بكر على شــأن *** تلقى بساتين ثمرها فيتــــــــــامين
وكل ما اقبلت تفز ولو انت تعبان *** تعطف عليك وتهمزك بملس اليدين
وإن جاء عجوزه نام عند ام عثمان *** من ذاق لحم الريم عاف البعارين
تمتع بدنياك حيد ال عمـــــر فان *** اكرم عيالك والرحم والمســـــاكين
لابد من يوم تحزم بالأكفــــــــــان *** وتحط في قبر على عمق مترين
اموالك جمعتها بمساهمات وبنيان *** وتراك مسئول عن الزين والشين
ينعم بها الوارث بنات وصبيـــــــان *** وعيال بنتك يوم الأحزان فرحــين
مالك سوى ما أكلت وأبليت وإحسان *** على الفقير وطعت ربك على الدين
وصلوا عدد ماعلت السحب وديان *** على النبي اللي هدانا إلى الدين. .
__________________
ما دامت الدنيا تدور // خلك على الشدة صبور
اصبر وقول الله كريم // يتبدل الحزن بسرور