لا تجرب تروح المغرب ....

وقفنا عند وكانت المفاجأه << مصرّ على التشويق :)

اتصلت رد الرجال الو هاه كيفك انا الحين راكب الطياره

الوعد المطار ؟

قال والله انا ما اقدر اجي انت تعال لحالك والوعد مراكش

قلت شلون اجي قال بالقطار قلت زين

واضمرت في نفسي اني اسحب عليه اذا وصلت مراكش

زي ما سحب علي وانا كنت مأمل اني القى احد يفكني من

(بعض )الوجيه الودره الي بالمطار لكن صارت خيره

ومافي احد يتعلم ببلاش لا بد مهما استقيت من تجارب الاخرين

لازم تعيش تجربتك وتلمس الشي بيديك

وعلى راي المثل لا يصدق ال....رى حتى يرى :)

مالكم بالطويله ركبت الطياره ادور كرسيي يوم لقيته لقيت فيه خال

جالس محلي ما بغيت اقومه فرحت للمظيفه قالت اوكي راحت لمه

قالت وين كرسيك عشان يجلس الرجال محلك عطاها البوردنيق وقريت

محل الكرسي يوم مشيت ابروح لم الكرسي حقه الا الخال يناديني تعال تعال

محلك محلك انا بروح هناك ! انا استغربت كيف يسحب على صديقه

السالفه فيها انّا وانا ارجع مكاني جنب الخال الثاني سلام عليكم

رد وأليكم سلام ولينه دب ونص ذنبه في كرسيي ورافع التكايه الي بيني

وبينه وريحته صنان يفجر الراس ويعور العيون يا الهي وش ابزين بذا واقول

في نفسي صبر جميل والله المستعان وتطير الطياره ويعطونا الاوراق حقت الدخول

وانلحس فيها في سؤال تاريخ ومكان الازدياد :( المهم عبيتها بالعربي مش حالك

ويرقد الخال وقال اذا جت العيشه صحني الله قلت زين وانا اتقلب على جمر الغضا لين قال استعدوا

للهبوط وبسم الله هبطنا وانزل للمطار ويبدا المخ يشتغل يسجل الاختلافات

الحمامات مكتوب مراحيض وانا امشي لين جا حق التختيم واطق فوق راسي علامة الاستغباء

ويسألني ليه معبي ورقة الدخول بالعربي قلت مو دوله عربيه يا الطيب ؟؟؟والاسئلة مكتوبه بالعربي

المهم عباها بالانجليزي وطق الختم وقال سير واسير واتوجه الى سير الشنط

واحتري واحتري واحتري واحتري لين الله فرجها وجا قشّي

والناس صايمين ما يمديك تشرب مويه ولا تدخن ولا تاكل

وامسك السرا حق الجمرك واشوف التفتيش البدائي

حسيت اني في فيلم عبدالودود على الحدود

ويجي دوري ويفتح شنطتي ويطالع لين فيه اربع كروز تتن

قال ممنوع تجيب اكثر من واحد قلت انا وش دراني

والله ويفتح الله على قلبه ويقول سير ! بدون بخشيش

وانا ما امداني طلعت لصالة القدوم الا ذا الي ينشب في ذنبي

طاكسي طاكسي طاكسي قلت اصبر اصبر خل اصرف قروش

واروح لم اقرب صراف واعطيه 2975 ريال قلت حولها لي درهم مغربي

خذ الدراهم وحسبها طلعت 2985 قال انت منقص 10 قلت زين جزاك الله خير

شوي ويصرف القروش ماش انا كني تشاويتها قلت موب معقول واطالع الايصال

الي عطاني اثر ابو الشباب صارف لي 2085 بدل 2985 !! قلت تعال وش الي 2085

اثر الكلب يقال له بيخمني بتزويد العشره عشان يزرف 900 قال اسمح ليا نسيت 900

اما نسيت 900 قويه قويه ما اقدر ارقعها ابد ابد اخذت القروش واقعد احسبها

وراعي التاكسي ناشب ومقروشني ولا خلاني احسب وكنت ما ابي احسب

بقدر ما اني ابي اطلع الي في بطن الصراف لو صار فيه خطأ بيجيني وفعلا

ما قدرت احسب بدقه من قروشة راعي التاكسي بس اني حسبت شغل مشي

حالك يعني تأكدت ان الفلوس تقريبا كامله والتفت على الطاكسي قلت هاه

كم تي توديني لمحطة القطار في كازا ؟ قال بثلاث ميه وخمسين قلت بميه تبي حياك الله

انا طبعا فاهم المكاسر غلط قال لا ثلاث ميه اوكي قلت طيب بيني وبينك ميه وخمسين

ماش أيس مني وفكني وجا على طول واحد نشب فيني ونفس الكلام اوصلك للمحطه

بثلاث ميه وينشب فيني قلت لبدن وانا امشي انا وياه الا يقابلني ذاك الشاب قال شريت شريحه ؟

قلت لا يبوي بعد شوي بشتري بس انا ابي احد يوصلني لمحطة القطار ع اساس اروح منها لمراكش

قال يبوي لا يلعبون عليك ذولي محطة القطار شفها هنا في المطار تقطع تذكرتك وتدعس

طبعا ذا المعلومه ما كانت عندي ان فيه محطه في المطار قلت حلو وينها قال جوا هناك

يالله خذ مني ذا الشريحه عشان تقدر تتصل قلت لا يبوي انا شايف مكتب اتصالات بشتري

منه شريحه وانا الي اسحب عليه السحبه العظمى وادخل الصاله وابو شريحه قافله معه

خرب على حقين التكاسي ولا استفاد شي قمت خذت لي شريحه وأسال عن القطار

قالوا تحت اقطع تذكره لكازا واقطع تذكره ثانيه لمراكش وكل التوتال ميتين درهم

وبن الهرمه التاكسي بيوصلني لمحطة كازا بثلاث ميه وخمسين وانزل تحت

واقطع التذاكر على الدرجة الاولى واركب والقى سعوديين واحد رايح كازا والثاني مراكش

سوالف شوي لين وصلنا محطة كازا فايوجوغ نزلنا وجلست انا وراعي مراكش لين جا قطارنا

وركبنا قطار مراكش ونركب في ذيك المقصوره معنا حرمتين ( محترمات ) سوالف معهم

وصراحه استفدت منهم كثير من ناحية ثقافة البلد او اللهجه واذن المغرب واحنا بالقطار قلت

فرجت واطلع ادخن عند الباب وانا فاتح باب القطار وجالس على الدرج ادخن

يوم بقى في زقارتي شوي قمت من على الباب والقى وراي شباب مغاربه

جذعان يعني ابو 17 الى 20 يدخنون وواحد منهم يلف ورق عنب قلت في نفسي

لا حول ولا قوة الا بالله اثر الوضع كذا علني ضاق صدري صراحه بس يالله وش نسوي

في اثناء ذا الرحله توطدت علاقتي مع السعودي وقررنا نسكن سوا بعد ما لمست فيه

الرزانه وفعلا يوم وصلنا لمراكش ركبنا الطاكسي وعلى اقرب فندق نزلنا عفشنا وريحنا

وصلينا ورحنا لماكدونالدز الي في جليز تعشينا وبعدها دعسنا لساحة الفنا وكانت عامره

عاااامره بالزاف ازفف شي يعني بحكم ان العيد بعد بكره عندهم واحنا عيدنا بكره طبعا

وجلسنا في حدا المقاهي وتقهوينا الاتاي وقعدنا نشوف الرايح والجاي لين خلاص طفيت

قلت لخويي مشينا قال مشينا وندزها كعابي للفندق واجلس اتقلب لين جا الفجر ماجاني نوم

واصلي الفجر واجلس على النت لين الساعه عشر واسحبها احلى نومه.....

انا قصّرت من الكتابه وفيه كماله للسواليف انتظرونا : (145):



ملاحظه ايجابيه /

*كانت خيره ان السواق ما جا عشان اتعلم ذا الاشياء الي تعلمتها وعسى ان تكرهوا شيئا وهو خير لكم وعسى ان تحبوا شيئا وهو شر لكم