قصايد مسلسل توق ...ابدآآآآع
قصائد بدر بن عبدالمحسن ابدآآآآآآآآآآآآآآآآآع
ما يروح الحب
كل ما قلت أدهر القلب من نبت الجروح
طاحت حروفٍ بصدري مثل وبل المطر
و انبتت عقب المحل عشب وأزهارٍ تفوح
بعطر من فارقتها عمر .. يفداها العمر
ما يروح الحب لو كان من يعشق يروح
كل ما زاد فـ غيابه عن الغالي حضر
تكتم الخدان مني ملامح او تبوح
ما تغيّر سقم حالي من هموم وسهر
* * *
هذا الزمان غبار
شمسٍ عليها شمسٍ
و جمره على جمره
ارضٍ مثل جره
مليانةٍ رمل
و قلوب مصفره
تكسرها كل خطوه
تكسرها كل لفته
هذا الزمان غبار
به لحظتين امطار
موت العطش مرات
اما الغرق..مره
* * *
القمر ظلك
يذكرني القمر ظلّك .. عجب ياللي ظلالك نور
انا اللي ماعرفت الليل , لولا عتمة أهدابك
حبستك في السما شمس وعلى وجه السحاب ****
ونخيلٍ باسقٍ يشرب رضاك ويعطش اعتابك
وجلست اناظرك مارفّ لي جفن تقل مسحور
اقول ان الجمال انتي .. وكل العشق بأسبابك
هقيت اني ملكتك ما دريت ان الأماني غرور
و انك في يدي لين انتحى بي الوقت و اقفا بك
سقى الله يوم كان أكبر همومك خاطري المكسور
وكنت الضي في عينك وكنت السقم في ثيابك
و سقى الله يوم كنتي الارض انهار و شجر و قصور
ديارٍ نورها من طاقتك , و احلامها بابك
عيوني !! يا شقى عيوني من الجذب الموات البور
اراضي ما بها الا ما ذوى و انهد فغيابك
احبك .. كان لي قلبٍ يجض من الجفا مقهور
و صار اليوم يفرح , لو لقى به عذر يشقى بك
* * *
شرايد نوم
على الوساده شرايد نوم
من ما ترك خلي الجافي
لعل تالي سهرك اليوم
يا عين و اللي مضى كافي
هجرت هم و طويت سقوم
و دخلت في المخدع الدافي
و ساعة غفى جفني المحروم
و رميت حملي على اكتافي
حلمت باللي هواه حلوم
يصب جمرٍ على اطرافي
و انا احترق يالله المقسوم
و اطفي النار بلحافي
يا زين للعاشقين سلوم
و غاديك تحكم بالانصافي
هو ينعدل لا شقى مظلوم
او يشكي السقم متعافي
ما شفت جرحٍ عليه هدوم؟
هذا انا البيٌن الخافي
* * *
الهجن
الهجن تضرب خدود البيد
بـ خفوفها لين تدميها
والطلح له فـ المضامي جيد
لامن فهقناه يلويها
وللجن بين العواسج عيد
ونيران في الليل تضويها
ارضٍ تلاشى و ارض تسيد
طال السفر منها فيها
* * *
لو ما رقيتك يا جبل
انا لو مارقيتك ياجبل ضاقت بي انفاسي
اشرف فيك وارد النفس وافرج الضيقه
بعد ماطالت الغربه رجعت لـ غربة احساسي
انا مالي وطن ما دام جمع الشمل تفريقه
حبيبي مثل سيفٍ لا تركني ولا قطع راسي
عروقي حار فيها الدم ليت الصارم يريقه
ذبحني قبل يذبحني غرام اللين القاسي
وصاله صعب لا شك التجافي كيف باطيقه
* * *
لو حبيبي حبيبي
من سألني حبيبي عن حبيبي لمحت
في ابتسامه شمات و في عيونه فضول
اكتم الهم لا افضح لوعتي لو شرحت
من غدر به حبيبه يا ترى وش يقول
يا عذولي جرحني صاحبي و انجرحت
و لو حبيبي حبيبي ، ما جرحني عذول
* * *
دخل العيون
دخل العيون اللي تسلّ الهنادي
لا تقتليني قبل لا اناظرك حيل
هذي عيونٍ مالها الرشد هادي
مغرورةٍ ما همّها العدل والميل
* * *
جيتك و انا عطشان
يا بنت جيتك و انا عطشان
بقول بالله تسقيني
مديت كفي و انا شفقان
لين التقت عينك بعيني
شربت في نظرتك غدران
لا يا بعد باقي سنيني
* * *
عللتهم
علَّلْتهم لين سهروني
وأسقيتهم من حديثي هيل
وركبوا على الهجن خلوني
وسط العتم كـنّي القنديل
* * *
اتداوا ياقلبي
اتداوا يا قلبي من طعونك
القى في غضبك الدوا
كثر ما يدميك يا قلبي
الحبيب اللي يخونك
كثر ما يشفيك من جرح الهوى
نصف شمسي غابت في ثياب الارامل
و نصفه الباقي رحل
و هذا عمري
عشق ذابل
و عرسي حنا من وهم و كحل
ودي اشقى فيك يا حبي لين يحرقني جنونك
بس لو عندي امل
اتداوا بك يا قلبي من طعونك
غصب و يرضيني الزعل
* * *
السجن
الناس..وش لي بغير الناس
عزي لمن يقعد لحاله
فـ السجن من دونه الحراس
ماله صديقٍ سوى ظلاله
يا طير سلم على فراس
اللي ورا الحبس و اقفاله
قله فداه الكدر و الياس
و يفداه عراك و رجاله
* * *