رد: لاهنتم يالربع انا مسافر 20 مارس ابي شوركم اول مرة للمغرب وشكلنا بنجيب العيد
مرحبا بك ايها المطيري الكويس
يخوي لا تجيب العيد ولا شي
اول شي شف موضوعي
https://www.mza3et.com/morocco9137.html (رحلتي الربوع والقلم مرفوع)
لاحظ اني كنت مرتبك وخايف اجيب العيد رايح لاول مره وفوق كذا صديق نفسي
بس صدقني بمجرد ما تطأ قدماك أرض مطار محمد الجزء الخامس مدري السادس سوف تشعر بالراحه حتماً لا محاله
لا ومعك اخوياك بعد وش تبي اكثر
المهم لا يجيك ما جاني خذ لفه بالمنتدى
من ناحية الامان الدنيا امن وامان بشكل عنيف جداً
بس لازم تكون عارف اسعار الاجارات كم
واسعار التكاسي من المكان الفلاني للمكان الفلاني كم
عشان لو احد شافك غشيم وصلخك بسعر مرتفع تكون عارف السعر وتكاسره
وفيه شغله مهمه اصرف دراهمك من هنا قبل تطلع
لو مثلا بحسابك 20 الف ريال اصرف 3000 بس والباقي خلها بالحساب
واذا عندك اكثر من حساب مثلا راجحي اكثر من حساب او في اكثر من بنك راجحي رياض سامبا وهكذا وزع دراهمك على الحسابات
ولا تخلي بطايق الصراف كلها في مكان واحد لاسمح الله لو ضاعت محفظتك ولا شي ماتتخربط امورك
وغير كذا لازم معك فلوس مغربيه زي ماقلت لك اصرف من هنا قبل تطلع
اذا وصلت المطار خلك مجهز دراهم من فئات خمسين درهم عشان تكرم الرياجيل بالجمارك والجوازات
خمسين درهم وفك نفسك من القروشه وتفتيح الشناط وينثر ام الملابس
واهم شي اهم شي اهم شي نصيحه اخويه
ضع بينك وبين الهياط خط أحمر
لا ترفع صوتك حتى لو تنرفزت من طاكسي ولا مطعم ولا اي شي خلك هادي والابتسامه على وجهك
والشعب المغربي شعب حبيب جدا جدا جدا جدا جدا احترمهم مره يحترمونك الف مره
واتمنى لك رحله سعيده واذا محتاج اي معلومات اضافيه الشباب بالمنتدى ماراح يقصرون معك انا عطيتك اللي عندي لاني جاي من اسبوع واعتبر مبتدئ وغشيم اول سغريه واكلت فيها مقالب لليل
تقبل تحيات شغل مخك افضل واحد في العالم