رد: لا تجرب تروح المغرب ....
ابدأ بذا البيت الرباعي من تأليفي
ساقتني الاقدار لم المغرب الواعر = اثنّي الركب والقلب متذلل وصاغر
يا المغرب المزيان لا تكسّر الشاطر =شطارته ولّت مع اجواء هالديره
بداية القصة كانت في رمضان هالسنه
كنت امر بظروف نفسية عصيبه بسبب امور الحياة العمليه والشخصيه
واكره السفر كرهي للعمى
نعم لا تستغربون اكره السفر
لكن وقفت مع نفسي وقلت ليه ما اسافر لازم اطلع نفسي من الجو الكئيب الي انا فيه
والتغيير عن الروتين مطلوب حتى لو كنت مرتاح في روتينك
واتوكل على الله وابدأ ابحث عن ديره
وبعد البحث اكتشفت ان المغرب انسب خيار لي لضيق الوقت
وقرب بدء الاجازه وعدم استخراج فيزا
حجزت على الخطوط الاماراتيه في آخر رمضان والعوده في منتصف سبتمبر
تذكره على الدرجه السياحية وخط السير الدمام-دبي- كازا والعوده بالعكس
قيمة التذكرة 3200 ريال
وبديت في البحث والاستقصاء من الاصدقاء وكذلك هذا المنتدى
ومنتديات اخرى بشكل عام
ومن خلال كلام الزملاء قالوا المصروف اليومي للشخص 1500 ريال سعودي
عملت حسابي على هالكلام وشحنت فيزتي بمبلغ 27 الف ريال لغرض السفر لمدة 20 يوم
وثلاث الاف خليتها معي كاش
ما قصروا الاصدقاء عطوني رقم سواق يستقبلني في المطار ويوديني لمراكش
وتم الاتفاق معه على مبلغ 600 درهم في اليوم
قال اول ماتركب الطياره من دبي عيط لي قلت واخا < نصاب وقتها مااعرف واخا
وجهزت ملابسي وتقضيت بحول 5000 ريال ملابس وجزم وانتم بكرامه
ومستلزمات شخصيه ...الخ
اغلبكم لما يقرب موعد سفره يتحمس ويعد الايام
انا كنت اعاني من فوبيا وارهاب المغرب
والدعايات المغرضه الي يبثونها الناس وهم ماراحوا !
كنت خايف مرتبك
وكلما للموعد ويقرب
وخوفي وتوتري يزيد
الى ان جاء الموعد المرتقب واحزم قشّي
وازبط اموري وادعي يالله التوفيق من عندك
افطرت اليوم ما قبل الاخير في رمضان
وجلست ودخنت زقارة الفطور وريحت شوي
وازهم على خويي قلت قريب قال قريب قلت تعال اجدعني في المطار
قال صار واركب وبسم الله الساعه ثمان ونص وانا في مطار الملك فهد
امسك سرا على الدخول للمنطقه حقت شركات *****ان الاجنبيه
وتدخل شنطتك في هذاك الشي الي يفتش القشّ
وبعدها امسك سرا على مكتب الامارات ودخل قشّك وخذ البوردنقين
واحد لدبي والثاني لكازا
خلصنا من القش والبوردينق باقي الجوازات
وامتطي صهوة رجليني واروح لم الجوازات
ولا يوم تبزّرت عيوني سرا لو يمسكه الكافر اسلم
اعووووذ بالله وخمسين دقيقه ماسك السرا
لين جا دوري وقال موظف الجوازات بكل برود
ليه ما رحت مع سرا الدبلوماسيين هذا سرا للاجانب
وانا اشوف مكتوب فوق دول مجلس التعاون وفيه اجانب صراحه
بس ليه ما فيه توضيح ياخي !
تفتت ركبي لين وصلت لذا الموظف
ختمنا الجواز وقلنا بسم الله سرينا لبوابة دبي
وانتظرت برهه من الوقت لين اعلنوا عن فتح البوابه
ركبنا الطياره ويعطونا هاك الفوط المربصه بمويه دافيه يالله من فضلك
قلت هذا اول خير وتاليه يلحق وتفاءلت من عقب تشاؤم الجوازات
بسم الله اقلعت الطائره وكلها فسوة وحنا واصلين لدبي
( فسوة احمد حلمي في فيلم مطب صناعي ) لا يروح بالكم بعيد
وهذا المقطع ديالها عشان الي ما مرت عليه يشوف ويضحك الدقيقه 2:20
المهم كانت الرحله لكازا الساعة 7ونص صباح جلست اتصرمح
في مطار دبي الي كنه مصير ما يطيع يخلص رايح جاي رايح جاي
وغرفة التدخين انواع قلة الحيا كأنك معتقل مدهونه ببويه حمراء
وصغيره كبر اذني وفيها امه صراحه قمة الاهانه وين حقوق الانسان عنهم
والتهويه ولا حتى تحلم بيها يعني يكفيك بس تدخل الغرفه
تاخذ لك موشين استنشاق بدون لا تولع زقاره وفالك طيب
وانا كل شوي اشيك على لوحة الرحلات وانتظر متى يفتحون بوابة رحلتي
المهم قلت خل اتلهى واطق مشوار لغرفة التدخين وبعدها رحت للحمام
طلعت من الحمام واطالع في الشاشه الا مكتوب النداء الاخير لرحلة كازا !!!
ابوكم يا الجحلّط متى بس فتحتوا الباب عشان تطقون النداء الاخير
وانا اللي امغط سيقاني وركض للبوابه واركب اخر باص متوجه للطياره
وامسك تلفوني بدق على السواق وكانت المفاجأة << يلعن ابو من علمك اسلوب التشويق
الصدق اني قصّرت من الكتابه ويقال لي ابسوي تشويق فترقبوا السواليف الجايه لانها مجرد سوالف
ماهيب شي في بحر خبرتكم بس الواحد يحب يشارك ولو بشي بسيط ويرد الجميل لذا الناس الكويسين في المنتدى
برب خن نشوف تفاعلكم ترى الواحد يستانس بالتفاعل ويتحمس وكذا
يعني افهموها وكذا ( وجه يغمز وكذا )