رد: لا تجرب تروح المغرب ....
وقفنا عند النومه الهانيه
صحاني خويي من النوم على الساعة 7 المساء قال اصحى انا حجزت
مع الهوتيل على علي بالفلاح قوم البس واتجهز
قمت خذت لي دش ولبست وصليت وننزل في اللوبي ننتظر الباص
ويجي الباص ويشيلنا ويمر له كم هوتيل يشيل منها سياح والاغلبيه اوربيين
وصلنا لعلي بالفلاح واستقبلونا بأنغام الدفوف والزغاريد وناخذ لنا طاوله
وكانت الاجواء عائليه وحميميه بحته وجابوا لنا حريره ونقنقنا عليها
وجابوا لحمه مشويه بالفرن وندبغ فيها انا وخويي لين طق ضلعي
خبركم توني صاحي وتفطر لحم صعبه شوي فأنسدت نفسي
عقبها جابوا كسكسي والله ما ذقته خلاص بطني معاد يحتمل
خويي ماشاء الله مايكل شوماخر في الاكل ويدبغ من الكسكسي
لين طق ضلعه يوم خلص خويي من الكسكسي
جابوا لنا صحن فواكه جميل خوخ ومشمش وبردقان وبرقوق وجراوه :D
عقبها صارت الفرق الشعبيه تمر على الطاولات ويقومونك ترقص غصب
موب غصب غصب يعني شبه غصب وغصب تعطيهم قروش s:
وطولوا على ذا الحاله لين مصخت السالفه وبغيت اطرش
يوم خلصت سالفة الطراره الي على شكل رقص
بدت العروض في الساحه وكانت مثل مسرحية الفنتازيا
وفيها عروض وحركات بهلوانيه بالخيل ورقص شرقي
واستمتع الحضور وبعد ما خلصوا ولعوا نار في شي
ومكتوب بالنار مع السلامه وتقريبا كان الوقت على 12
طلعنا للباص رحنا للهوتيل وخويي رقد وانا سهرت ع النت
لين جا الصباح طلعت للوبي طفشان وجوعان وأسأل البنيّه الي في الرسبشن
ابي افطر وين اروح له وصفت لي كوفي جنب كنتاكي قليز وبسم الله
وامغط كعوبك يا شيخ طفش وخمس دقايق وانا في الكوفي
واحلى بيض وقهوه سوداء وزقاره وسيدي علي وتكيت شوي في الكوفي
همن قلت لروحي مشينا لساحة الفناء رديت على روحي قدام
وامغط رجيلاتك يبو الطفش لساحة الفناء واحلى تمشيه
والاحظ عروض ورق العنب في ساحة الفناء كثيره من الحوش الي هناك
عموما استمتعت بالجوله وجيتك راجع باتجاه الهوتيل وقبل اوصل الهوتيل
لمحت لاكوست قلت خل ادخله اشوف اسعاره نفس اسعارنا ولا تختلف
لقيتها نفسها بالضبط واشوف زارا قلت خل اخش اشوف العرض فيه كيف
لقيت الي في السعوديه افضل بمرااااااااااااااحل من الي في مراكش
العرض والخيارات في السعوديه كثيره طبعا اتكلم عن القسم الرجالي
ولا سويت مقارنات في الاسعار بحكم ان زارا اسعاره متفاوته فما تقدر تقارن
الوكاد هذا الكلام قبل الظهر بشوي وقد نال مني التعب ما نال
قلت لروحي يالله مشينا الهوتيل وأطرقت برأسي موافقاً :D
رحت الهوتيل واحلى نومه وترقبوا اخر يوم في مراكش المره الاولى في الردود القادمه
الحين اباخذ لي استراحة لترتيب افكاري والردود على الزملاء :)