الشوام عاد اهل الامثال كل هرجهم امثال عندهم ذكاء بالربط عجيب
من طنجه لتطوان لاي مدينه حولها الطرق جبليه واعره واعره بالمعنى حقنا هههه والمعنى حقهم واعره من الوعوره وواعره من الزين انا افضل اسوق قير عادي بهالمناطق والسياره اس يو في معامل النيسان الاكس تريل اسمه الظاهر كذا رهيب بس مب دايم متوفر عند الكراء او هيونداي السنتافي او الجيب مع كرهي للسيارات الامريكيه بس دامها كم اسبوع ماتفرق بس لا تقرب الداسيا حتى العايلي عزمه ضعيف ويطلع اصوات مكينه وشكمان هههه واهم شي بهالطرق تمسك الدركسون صح وتنتبه للطريق مب تطقها رقبه بهالمناظر الساحره ماتدري الا انت قالب بسم الله عليكم هههه متعودين نخاف من البعارين ههه

اصيله واعره بالزاف عن طنجه حول ساعه جنوب والمزاعيط مايعترفون فيها هههه اجيها احيانا امرح احيانا لا وامرح باللبناني ههه قصدي بالقصيمي يعني انام مره جيتها بالصيف ومصادف مهرجان الفن الدولي مهرجان ديال الرسامين والفنانيين وانا ما اعرف امسك قلم والله اني انجح ممتاز والاول على المدرسه وارسب بالفنيه ايام المتوسطه والله اني فرحت يوم رحت الثانوي عشان افتك من الفنيه ههه الله لا يوفق من اضافها ماده حطها نشاط للمهتمين لابوكم وش دخلنا حنا

المهم مره رحت للمهرجان صادفته والا ما دريت عنه المهم انا وواحد صديقي ولد اختي مزعوط قبلي هههه ندور وانا قامط اخاف واحد يعطين ريشه والا يختبرن للحين متعقد وخويي مسوي فاهم ويقدر الفن يدور عليهم ويصورهم مهرجان رسم وموسيقى بس اغلبه رسومات وجداريات شي ما لنا فيه ابد ههه المهم ندور ونطيح بهولنديه ويدردش معها الزميل وتنشب لنا تقول ما اعرف احد هنا جايه للمهرجان ومدري ايش ونسكن باصيله عشانها لقينا شاليه شقه صغيوره على البحر لو اقولكم سعرها ما تصدقون والله انه ب 300 درهم يصحيك صوت البحر تفتح على الشاطي مباشره بس صراحه خليناها تستاجرها كلمناهم وهي تقولهم حدكم 30 يورو مهب سهله الشقرا شديده هههه وهذي من افكار الزميل انها تكلمهم والا انا طقها والحقها زي عبدالعزيز الجنوبي ظهير النصر الله يذكره بالخير الهولنديه نشبت للولد تبي تاخذه معها لامستردام ههه هي من مدينه باقصى الشمال هاوزن او هوازن مب القبيله ههه تعرف اللغه الهولنديه dutch صعيبه بالزاف نسيت بس عزمتنا فيذاك وبيني وبينك عزمتن مجامله والا ماتبين معكر الجو مثلما يقول المثل الامريكي الغبي الفيل في الغرفه كان بالجو غيم بوجودي مع طيور الحب قلت امشي بكرامتي هههه رحت لحبيبتي طنجه راح لها لهولندا قلت والله ما اروح والله اني كارهها عشانها رسامه متعقد والا هي احليله اقولها وش تشتغلين تقول لي خمس سنين امارس التأمل بالرسم قلت ماشاء الله عظيمه هالشغله كم يخصمون التامينات هههههههه

طلعنا عن الموضوع وشو الموضوع اصلا هههه ايه اصيله اصيله صغيره مره قريه صراحه شاطي نظيف مافيها ذيك المطاعم اغلبها مطاعم اسبانيه بس اكرم الله النعمه يحطون شي على اكلهم مدري وشو ماعلينا فيها المدينه العتيقه ههه من كبرها المهم بيوتهم على الطراز الاندلسي والجدران البيضاء الزرقاء ورسمات على الجدران يسمونها فن الجداريات وبيني وبينك اسميه ازعاج الجدران هههه كلام فاضي
اصيله تصلح للي ياخذ شاليه على الشاطي ويعيش كم يوم بعيد عن المدنيه والحداثه والصخب بس اعلمك بالليل ظلام احلف ههه اكيد بالليل ظلام ههه ظلام دامس مخيف وهدوء مزعج ههه انا ما اخاف بس اللي معي كانوا خايفين علاش ما بعرف انا اهم شي حولي دخان وصافي منت ميت قبل يومك ولا مهرب ولا مفر من الموت خلك رجل وواجه الناس والعالم وان مت مات اللي اطيب من ومنك الموت سنة الحياة واللي يقول توي صغير والله لو تعيش لين 70 تبي تنبسط اكثر الدنيا مثل ماء البحر مالح ولا يروي مهما شربت طلعت عن الموضوع مره خامسه ههه واضح فاضي

مدينتي والله ما اقولها هههه ترى مافيها زود بس وما حب الديار شغفن قلبي ولكن حب من سكن الديارا ايييه يا ليلى العامرية

طولت اسف اي سؤال عن اصيله هههه مافيها شي والله بحر نظيف وشاطي هادي وشخبطة جدران وذكريات هولنديه وصافي