المشاركة الأصلية كتبت بواسطة DarkMoon

نتابع

طبعا وصولي صادف اجواء مطريه على جميع ضواحي المغرب بعد جفاف طويل جدا هذه السنه فكنت محظوظ بالاجواء المطريه الجميله.

مراكش لم تتغير كثيرا عن السابق نفس زحمه الشوارع والدبابات والسياح الاجانب والشرطة الغثيثة

انا انسان نهاري فكنت كل يوما اصحى الظهر افطر فطور بلدي في كل يوم في مطعم مختلف ومن ثم اتوجه الى احد الكوفيهات في شارع محمد السادس اتقهوى واتابع مباريات كاس العالم وبعد المباراه كنت ارجع للسكن والا الخوي توه صاحي فنتغداء جميع ونطلع على وقت المغربية على الفره في وسط مراكش وكل يوم نروح نجلس في مكان.

صاحبي كان متعلق في مراكش حاولت اقنعه نقسم المده بينها وبين اكادير او طنجة لكن كل محاولاتي باءت بالفشل
وبيني وبينكم بعد ثالث يوم مليت من مراكش ودي انحاش.. اقنعني صاحبي ان المده الباقيه في سفرته ثلاث ايام وبعدها يرجع السعوديه فجلسنا ٧ ايام كامله في مراكش.

اخر يوم لنا في مراكش صحيت الظهر وافطرنا وعينا خير وقتها كان مباراه المغرب وكندا .. تابعنا المباراه في احد الكوفيهات بجانب فندق اوبرا بلازا محطة القطار واحتفلنا بفوز وتاهل المغرب الى دور ال16 بعدها ووصلت خويي الى محطة القطار لان رحلته كانت في المساء من كازا الى السعوديه.

اما انا ف اتجهت الى الطريق السيار بتجاه مدينة اكادير كانت الساعه تشير الى الخامسة في المساء كانت اجواء ممطره من اول ماطلعت من مراكش حتى وصلت اكادير الساعه الثامنه في المساء والمطر لم يتوقف وطبعا كالعاده في الليل والاجواء ممطره نقاط للدرك عند مدخل اكادير كانو متخبين بالسياره والطريق كان سالك ولله الحمد.

طبعا كنت متوجه الى احد الفنادق واول مادخلت اكادير الشوارع مقفله من قبل الشرطة والناس عالقين في الزحام والشعب يحتفل بالفوز على كندا ومن كثر الزحمه الناس تركو سياراتهم وصارو يمشون بالاعلام على الاقدام .. واخوكم في الله مشاعر مختلطه مابين فرحة الفوز للمغرب وتعب الطريق ابي بس اوصل للفندق حتى ارتاح واخطط لبقية اليوم قبل لا ينتهي.

كل ما مريت من عنده لفة الا سيارات الشرطة مقفله .. اخر شي وقفت عند سيارة الشرطة وشرحت له وضعي وماقصر فتح الطريق لي وخلاني ادخل والحمدلله دقيقتين وانا واصل فندقي.

الفندق نظيف وحليل ومايعرفه الكثير سعر الجناح 1000 درهم ويتطلب فتح غرفة للضيوف.

بعد التشك ان وترتيب الشنط وتعليق الملابس … طلعت الى مطعم اسماعيل ونزلك احلى مندي لحم مع السلطه المغربيه والكولا سعر 150 درهم تقريبا .
وبعدها الى مسبح مبروك المطر توقف والاجواء اصبحت عليله خصوصا مع معسل تفاحتين مع الاتاي 100%.

السهرات في اغادير مابين كاش وتايقر اسعار الطاولات طبعا شخص واحد ب 1500 قريبين من بعض في الاجواء .. لكن انا جازلي كاش بنسبه قليله تفوق على تايقر

افتر بارتي فندق صحارى الدسكو اللي في القبو رحتله مرتين ابد ماجازلي يفتح من الساعه 5 الى الساعه ٧ ونص على ما اذكر.. اشكال عجيبه غريبه

جلست في اكادير ١٢ يوم تقريبا تخللها زياره الى طنجة سريعه ومن ثم العوده مره اخرى الى اكادير

الاجواء كانت جميله امطار شبه يوميه والجو ممتاز جدا ماكانت ذاك البروده

قبل مباراه المغرب وفرنسا نصف النهائي كنا في جلسات مسبح مبروك والاجواء كانت مغيمه فجاء امطرت مطر ماقد شفته بحياتي كان السماء سبحان الله انشقت تصب صب مشاء الله .. دخلونا في المناطق اللي الداخليه وتابعنا المباراه.

طبعا ضروري زياره تغازوت فتحت فيها فنادق جديده .. لكن بالنسبه لي يظل سول هاوس مكان مميز صراحه جلسه مقابل البحر لابد من زيارته

وكذلك ايمي ودار ناخذ سمك فررريش من المينا وتروح توديه للشويات واضرب احلى سمك والاثمان مميزه

مطعم سوفيداس معروف بالاكل المغربي
دار الطاجين من المطاعم الجديده والممتازه في اغادير
ومطعم هاتي داوو من الذ المطاعم الي جربتها للاكل المغربي.
شواية النهضه طبعا مستواه قل بكثير عن السابق لكن لازم نسير عليه.

اذا مشتهي رفيسه مغربيه عليك بمطعم البلدي في حي السلام مميز صراحه.

قهاوي طبعا منطقة المارينا فتحت قهوه اسبريسو لاب مكان جميل وقهوه حلوه لكن يعيب المكان صغره.

كذلك منطقة جديده فتحت اسمها اكادير باي قهاوي ومحلات وممشى جميل يستحق الزياره.

اكادير قاعده تتطور صراحه والشغل اللي صاير فيها كبير جدا





…. يتبع