عرض مشاركة واحدة
 الصورة الرمزية ابوسلمان الثاني
ابوسلمان الثاني
مزعوط مبتدء
المشاركات: 47
تاريخ التسجيل: Jun 2021
ابوسلمان الثاني غير متواجد حالياً  
قديم 2023-03-17, 07:32 AM
 
المستشفيــــات

اذا الله قدر عليك تعيش في المغرب ياصاحبي .. الحياة جميله .. لكن لاتخلو من المنغصات !!
وبما انك في المغرب فالمرض بيكون على حسب وضعك ! كيف يعني ؟
اذا عشت حياه صحيه مثل واحد محامي سعودي قابلته .. يقوم الساعه خمس الفجر .. يلبس لكن مايصلي هههه وياخذ شوز نايكي وكاب على راسه .. ومعاه كلب حقه .. جيرمن شيبرد .. عز الله انه انظف وارتب من اشكال تشوفها .. المهم وبعدين اضبط ساعتك معاه قبل ست صباح تلقاه طالع .. سواء صيف او شتاء ... لازم يمشي .. مالايقل عن ساعه الى ساعتين !! ولحاله !! احيان قليله الى نااادره يكون معاه الوجه الحسن ... يرجع الفيلا . ( اسم فيلا على اسم بنته في السعوديه هههه ) يلقى الفطور جاهز بيض بلدي عسل بلدي خبز بلدي زيت بلدي جبن بلدي بلدي بلدي كلشي بلدي ههههههه

بعد الفطور يمشي السوق .. يشتري الحاجه اللي جات اليوم خضروات او فواكه .. حتى الدجاج مافي امل يشتري مثلج .. يشتريه حي ويذبحونه نفس اليوم ويتاكل نفس اليوم .. عارف اوقات حقين السمك متا يجيبون سمكهم وعارف اوقات الجزارين متى يذبحون بقرهم ههههه

الغداء ساعه وحده الظهر ونفس الشي اشياء مطبوخه بالبيت !! نادر ياكل في المطاعم !!
تبدا سهرته ساعه 4 العصر ويقفل بيبانه ست او سبع وينام !!

هذا النمط صحي وراعيه مايمرض لانه عايش على حاجات اورجانيك وفررريش

نيجي للي مثلنا للأسف .. ورغم ان الاكل المغربي من انظف الاكل في العالم ! لكن احيان مشاوي على الطرق السريعه لاتخلو من حاجات قديمه وحتى احنا ناكل حلزووون !!! معدتك اربعين سنه ماكلت حلزووون وفجاه داخل فيه شرق وغرررب !!! بالنسبه لهم هم معدتهم متعوده لكن احنا الخليجيين معداتنا حساسه من الاشياء هذي !

المهم بعد هالمقدمه نيجي للمستشفيات في المغرب اذا مرضت !

الخاص .. الداخل مفقود والطالع مولود ... اول شي دخول على اختصاصي 200 ريال عكس مصر !!
هذا دكتور بيرسلك تعمل تحاليل 500 ريااال مع مركز تحاليل معين !! فتخيل انت مريض ومتكسر
وماسك سرى للدكتور .. على مايجي طويل العمر وبعد ماتشوفه يرسلك تحاليل ... تروح تنزل في درووج العماره وانت مريض وتركب تاااكسي وانت مريض وتروح للمختبر وانت مريض وتستنا دورك وانت مريض وبعدين ياخذون تحاليلك وانت مريض وبعدين تستنا ساعتين او ثلاثه او عشان يعطونك النتايج وبعدين تركب تاكسي وانت مريض وتروح عمارة وتطلع دروووج وتشوف الدكتور عشان يشوف تحاليل وبعدين يعطيك ادويه وتنزل مره ثانيه وتركب تاكسي وتروحون تدورون صيدليات اللي مناوبه بالليل وهي معدوده ( الله يعز السعوديه الدواء والنهدي 24 ساااااعه مفتوحين ) وهناك تدفع مايقارب 300 ريال ادويه وبالاخير احسب تقريبا كل مرضا لك بألف رياااال اقل شي اذا تسمم او لوز او الام في الصدر !

بالنسبه لمستشفيات المخزن ( الحكوميه ) فهي بكل بساطة طوابير الذل !! الناس طايحه واللي شايل ابوه واللي جار امه وصراخ ومهاوش !! رحت بالليل ثلاث مرااات !! من ادخل مستشفى محمد الخامس من الباب ياجماعه وقسم بالله الدم في الارض !! شمكاره ودمان وعادي تشوف واحد يده مشرررطه !!! يسالونه في المستشفى من شررررط يدك !! مايجاوب سكراااان !! يقول صاحبه تذكر الحب وشرط يده !!

واحد جالس ف الارض والدمان تنزف منه !! ولا واحد معطيه وجه !!

شايب وولده يكسر الباب يقووول دخلو ابوي !! ممرضات يقولون ماعندنا مكان ! جاه طبيب وقال ابوك فيه الموت وبلا ماتخليه عندنا اديه داره يرتاح تايدي مول الامانه امانتو !!!

السكورتي السكورتي السكورتي اللي عند الباب هو السر !! اللي يعطيه فلوس حيدخل عند الدكتور ويتعالج واللي جاي يستنا علاج الحكومه ... خله منطق يستنا علاج الحكومه !!

اما بالنسبه للنساء الحوامل فحدث ولاحرج ... مره مشيت مع شغاله بنتها تولد وكلموها ...
انا لاشغل ولا مشغله ... قلتلها اروح معاك .. ركبنا سياره ورحت انا وياها ومعنا بنت اختها عمره 11 سنه حقت مشاوير البقاله تصلح وتجيب شاحن او ماء اذا بغيت .. المهم وصلنا دخلت لقينا البنت ورجلها يستنون يدخلون قسم الولاده .. والبنت تصااارخ !! بوووولد بووولد والرجل يطق الباب يدخلونها !
تصدقون مافتح الباب لين عطاتهم 100 درهم !!

طيب بالنسبه لي انا ومن واقع تجربه .. المستشفيات الحكوميه لنا كخليجين افضل .. من دخلت الباب عط 100 درهم سكورتي 100 درهم دكتور وبتسبق نااااس هذي كلها في الفحص والعلاج !! لكن التحاليل والادويه عليك

اه بالنسبه للي عندهم تامين طبي من عيالهم وعايشين بالمغرب ... ببساطه بله واشرب مويته !!
مستشفيات وكلينيك كلها فاتورتها فرنسيه !! مايعرفون يكتبون عربي ولا انجليزي !!
التامين هنا يشترط عربي او انجليزي !! حاولو كم واحد ولا في فايده معقده

بالنسبه للامراض اللي طويله ... رسالة شكر للسفارة السعوديه في المغرب .. جيب تقارير طبيه للسفاره وبتتكفل في علاجك ( تسجل مديونيه عند الداخليه ) .. واحيان يتم دفعها من مصروفات السفاره


وعلى قولة المغاربة اللي بغا يطلب ... يطلب غير الصحـــه

التعديل الأخير تم بواسطة ابوسلمان الثاني ; 2023-03-17 الساعة 07:36 AM
رد مع اقتباس