المشاركة الأصلية كتبت بواسطة رحال965

السياح المحترمين الي يرفعون الراس ويخلونك تفتخر تقول انا خليجي عسى الله يزيدهم ويغنيهم ويكثر خيرهم ويزيد سفراتهم عشان يرفعون راسك ويبيضون وجهك، ولكن للاسف مو الكل مثلهم واحنا ما ننتقد الا التصرفات السلبية اما الايجابيات نبيها تصير هي الحد الادنى لنا

اخر سفرة لي قعدت شهرين احتكيت فيها بالمغاربة بشكل كبير وعلى قولتهم (وليت مغربي) وانصدمت بالنظرة الي ماخذينها عنا وللاسف مو جاية من فراغ، نسبة لا يستهان بها من ربعنا يجي من اقصاه كأنه مشفوح ما عمره شاف حريم، كمثال في بعض الاماكن ادخلها القى ربعنا قاعدين ومخازز بالبنات بشكل غلططططط والمشكلة البنت رافعة الجام عليه ومتضايقة منه وهو شكله غلط ما يشيل عينه عنها ولاصق فيها مو معطي مسافة بينه وبينها بس باقي يقعد معاها بالطاولة وهي تتجاهله والناس كلها تشوف هالمنظر والي ما يشتري يتفرج، والله اني كنت اتفشل وانا مالي شغل واسب والعن بقلبي واقول ليت من يسحب جوازك خمس سنين عشان تتأدب، والبعض الله يهديه مايعرف يفرق بين بنات الناس وبين البزنس ويحاول يتحرش ويقط وجهه على اي وحدة يشوفها بأي مكان، شي محزن وجابولنا الشوهة على قولة المغاربة، انا كنت ولا ازال مصمم على فكرة ان الشعوب الخليجية ارقى بكثير من الاوروبية واحاول اصحح هالنظرة عند المغاربة، لكن يجونك هالدبش بتصرفاتهم يخلونك تدعي على الي ختمله مغادرة والي ختمله دخول والطيارة الي جابته بكامل طاقمها.

امر آخر هو ان الوضع بالمغرب للاسف صار كأنك في سوريا قبل الحرب (والحمدلله اني ما رحتلها ولكن حسب ما كنت اسمع) لاني شفت ثقافة الهياط والاغاني الهابطة والدبكات ورش الفلوس والاستفزاز وقلة الادب منتشرة بشكل كبير، وصلت مرحلة ما قمت احب اسهر برا لان المستوى صاير سيء جدا وفي بعض الاماكن مسوي عليها حملة مقاطعة من كثر الوقاحة الي فيهم.

لكن الواحد يتأمل خير، عل وعسى تنظف الديرة